Read Khiamniungan Naga 1 Nokpao 16 Bible Online

1 Nokpao 16 - Khiamniungan Naga bible

1 Nokpao 16

¹APAOU nou Hanani thso e-po Jehu ko chitekü Baasha thaiu- tha nung ngiongem apa hau kium:

²“Pukhao ainou ngo ni jü khaiunia Israelhai ahei au shankium. Naiuso lo ni Jeroboamüh chhitsünli angei sunlo-iu naiuso jü khaiuniaso angei nai nialükhun-iu. Ngüso angei nousoüh jü amongmat sung-in,

³nungtiphe ngo Jeroboam tsam- khaiu tü chhikü shitsünli ni naiuso atsamkhaiu tü lüko chhi-e.

⁴Atsam- mongko mepem ajantso nung noknio nouko ean nai apa mea jii nou hean-e, naiuso mepem ajantso khengpun nai ean nai apa, mea heantsün letche nousoüh hean-e.”

⁵Baashaüh chhisiyatsün alum naiuso apa mongnyan chhi nouso alum Israelhai Nokpaohoi Ngiolat Thsam nai satkü taim.

⁶Baasha ean küta Tirza nai khanan, naiuso apa thso Elaüh apa po nokpao noikham lilo.

⁷Baasha naiuso apa tsamkhaiu thako APAOU ainou ngiongem e-po Jehu tsangkü kiu tiautenai Baa- shaüh APAOU thako angei sunlokü noiküla. Apaüh APAOU mongmat sungitsün nung apa khako Nokpao Jeroboamüh chhisiyatsünli chhitsün thaiutha lu tsüde lüko apaüh Jeroboam tsamkhaiu chaoattsün thaiutha saokü noiküla.

⁸Yihudahai Nokpao Asa nokshing pon kheikü luok nouko nai, Israel nai Baasha thso Ela Nokpao tsalo, naiuso apaüh Tirza nai pon nime nokshing shingkü noiküla.

⁹Zimri nian nou apa khemko nokpao ehli tsamkei haove khako awewe chiai oukong noitsün nou apa thako mongkhemkü that. Ajekhaiu tsak ko nokpao Ela, nokpao ün heng khaiuko oukong taiutsün nian nou Arza tsamai, Tirza nai theng nou tukkü noiküla.

¹⁰Nungai Zimri nung tsamai nap, küta nokpao Ela loatkü wan, küta apa liko nokpao tsalo. Nung Yihudahai Nokpao Asa nokshing tao pon kheikü chinyat nouko thawao.

¹¹Zimri nokpao noikham nai noiau oukong epkü thonkü apaüh Baasha tsamkhaiuko nou khaiunia apem loatkü wan. Melo tsammong naiuso haimeihai apem loatkü wan.

¹²Nungti e-po Jehu tsangkü Baasha thako thawaoau APAOU nou ti ngiokü noiküla, nungli Zimriüh Baasha tsammongso apem loatkü wan.

¹³Ngüsoüh sotsom tü amkhamkü Israelhai angei nai nialükhun nou shioko, Baasha naiuso apa thso Elaüh Israel Goa, APAOU nou mong- mat sung-in.

¹⁴Elaüh chhikü shitsün chhisiya alum Israelhai Nokpaohoi Ngiolat Thsam nai satkü taim.

¹⁵Yihudahai Nokpao Asa nokshing pon kheikü chinyat taoko nai Zimriüh Tirza nai Israel khaiuko ajekhaiu chinyatnyi nokshingkü noiküla. Israel süpaihoi nou Filistia nai Gibbethon noknio thalotsün taoko,

¹⁶ngüsoüh nokpao Zimri thako tsalo, naiuso Zimriüh nokpao thako mongthat tsümeikü thatküta apa loat-iu ta ngüsoüh lula, nungko yakü ngüsoüh Omri nung Israelhai nokpao noin ta wepeng.

¹⁷Omri naiuso apa süpaihoisoüh Gibbethon leankü khuküta Tirza noknio kom- hean.

¹⁸Tilai Zimriüh noknio nou loiankü ep, apa nokpao tsam pemongai nap, küta nokpao tsamtü in jeklut, naiuso apa nung innyai nai napkü ean.

¹⁹Nung apa ün angei APAOU thako chhisiyatsün shioko tha- waokü noiküla.

²⁰Zimriüh chhitsün chhisiya alum, apa akausai amongkhem saokü hakü, Israelhai Nokpaohoi Ngiolat Tsam nai satkü taiu.

²¹Israelhai mongyang nime hau janekü sung: ngüso ajantsoüh ngüso nokpao the-iau Ginat thso Tibni mongchio, naiuso ajantsoüh Omri mongchiokü noiküla.

²²Athon nai, Omri the-iau mongchiotsünsoüh shiolo; Tibni ean naiuso Omri nung nokpao tsalo.

²³Nungti Yihudahai Nokpao Asa nokshing pon aosamkü tsak noitsün taoko Israelhai nokpao au Omri tsalo; naiuso apaüh pon chekü nime nokshingkü noiküla. Chongting pon luok nou apaüh Tirza nai shing,

²⁴küta apaüh Samariahai king goh ai Shemer ta niankü khaiunia tsak nouko tangkason heng 6, 000 nou tuhsan. Omriüh nung king goh lomeikü shanshikü noksong tsak shan, küta nung aya king gohpao nou Shemer nianphiai, nokshing tsak nian nou Samaria ta niankü shan.

²⁵Omriüh apa khako nokpaohoi nouso chiai phopkü APAOU thako angei sunhekü chhin.

²⁶Apa khako Jeroboamüh chhikü shitsünli, apa angei tsangkü khaiuniahoi nou angei naiuso sotsom amkham-ikü nialükhun nou shioko apaüh Israel Goa, APAOU nou mongmat sung-ikü noiküla.

²⁷Omri chhisiya naiuso ashio eptsün chhisiya nouso apem Israelhai Nokpaohoi Ngiolat Thsam nai satkü taim.

²⁸Omri ean küta Samaria noksong nai apa khanan, naiuso apa thso Ahabüh apa nokpao noikham lilo.

²⁹Yihudahai Nokpao Asa nokshing pon aosamkü petjei nouko, Omri thso Ahab Israelhai nokpao theau tsalo, naiuso apaüh Samaria nai pon kheikü nime nokshingkü noiküla.

³⁰Apaüh apa khako nousoüh chhikü shitsün chiai sheikü APAOU thako angei aphop chhishin.

³¹Apa thaiu- tha Nokpao Jeroboamüh angei chhi- siyatsüntü aphop tsaokü noiküla; apaüh Sidonhai Nokpao Ethbaal thso menyiuthso Jezebel tsamsigoh saokü yangkü thatü shilakü angei nou chhin, naiuso Baal tü amkhamkü noiküla.

³²Apaüh Samaria noksong nai Baal amkhamau amkham tsam tsak lahsankiu, apa thaiutha amthang tsak shan küta nung amkham tsam nai taiu.

³³Apaüh Ashera sotsom kheknai sotsom lüko shanküta taiu. Apaüh apa khako Israelhai nokpao hoiüh chhitsün tü simkü APAOU mongmat sung-ikü noiküla.

³⁴Apa nokshing taoko Bethel ainou Hielüh Yeriko noknio shan. Yeriko noknio athanya yalotsün taoko Hiel ün melothso yamchong Abiram chaithio kiuwan, naiuso tilai bekhan nouso chhisiya yalo nungai apa melothso niophi Segab chaithio kiuwan. Nung APAOU nou Nun thso Yihusua tsangkü chitekü taiutsün ngioli thawao.