Read Khiamniungan Naga 1 Nokpao 17 Bible Online

1 Nokpao 17 - Khiamniungan Naga bible

1 Nokpao 17

¹Gilead goumchi nai Tisbihai nou e-po Elijaüh Nokpao Ahab tü ngiom, “Aa noitsün Israel Goa, sau ngü yathsüoji, ‘APAOU nianko pon nime tsüdekünai pon süme thaiutha ngü mongioshikün lektso goumchi nai khiamle tsüdekünai ah ou tsünoi-e ta nitü ngioji.’”

²Nungai APAOU nou Elija tü ngiom,

³“Nung athang nou wanküta Yordan ajepek nai khukü Kerit haiutso shimkü achija pamkü lünoi-an.

⁴Nung haiungan nou ni hau khiam ashiu au kiu-e, naiuso athaiutha nungai eheshiu kankü shiau taokom waio nouso tü ngü thoilut-iu.”

⁵Elijaüh APAOU nou thoiluttsün ngio angkü, Kerit haiungan nai khukü noi.

⁶Apaüh haiungan khiam shiu, naiuso taokom waio nousoüh apa hau themtsai naiuso nyih ahom si asham tsütokü kankü shikium.

⁷Atao intso noiküta ah tsü-ouphe nung haiungan nou appan.

⁸Nungai APAOU nou Elija tü ngiom,

⁹“Loto Sidon shimkü noitsün Zarefat noksong nai khukü lünoi-an. Nung noksong ko kihtsün jihinyiu tsak ta ni tsadao ngü thoilutkü noin.”

¹⁰Nungtiphe Elija nung Zarefat noksong bekhan dongko shitsün taoko, apaüh jihinyiu tsak pailokü ep. Apaüh nung jihinyiu tü “ngü hau khiam ashiu au kankü ashikiu ta ngiom.”

¹¹Naiuso nung jihinyiu nou khiam loau khutsün taoko, apaüh jonkü ngioshin, “Tsüojinyangkü ngü hau themtsai lüko intso kankü ashikiu.”

¹²Nyiuhai nou thalakü ngiom, “Aa noitsün APAOU a Goa nianko ngü themtsai titso tsütaiu ta ngiomong- shingkü ngioji. Ngü taiutsün apem nai wonne phalam tsak naiuso meng tsakko olipkhiam mem tsaklu noin. Ngü nungko ajahe-au pai ajantso kamloküta khukü ngü ti intso taim nung jüthsoje nemtso hau eheau khemsanau tsamai laokü khuau ngo shikü noin. Nung je thaiutha eheshiu aphiteng noi-e, naiuso nung phiaito je naiuatkü ean-e.”

¹³Elijaüh nung nyiuhai tü ngiom, “Yangelatkü lanoi.” “Khuküta ni nou eheshiu lükhemsan. Lüko chongting nai ni taiutsün ainou themtsai ehentso tsak chong lüshan naiuso nung jüdongai kankü ashi, naiuso nungphiai apoi nou ni naiuso athso aje thaiutha lükhemlo.

¹⁴Tititenai nungti APAOU, Israel Goa nou ngioji: ‘Ngo APAOU, nou nung ajekhaiu mothonkün khako wonne nou nung chiotso tsükengan-e naiuso olip khiam nou nung meng tsükengan-e.’”

¹⁵Jihii nou khukü Elijaüh apatü ngiotsünli chhin, naiuso nung chih- sikhiam nou ngüso apem thaiutha ajekhaiu piakü heshiuau saiükü noiküla.

¹⁶APAOU nou Elija tsangkü thalotsünli wonne nou chiotso nou akeng tilaitso tsüwan tsüdekünai loüh Olip khiam nou meng tilaitso akeng tsüwanan.

¹⁷Atao intso noiküta, nung jihinyiu ün melothso nou akia noi; apa akia nou atsaolu tsaotsaokü iulakü, athon nai ean.

¹⁸Nung jihinyiu nou Elija tü ngiom, “Goa ün khaiunia, ni ngütü nung tiauta chhin? Ni nungko Goa hau jü angeiso yangsan-ikü naiuso nungti jüthso ean-iau shan süne?”

¹⁹“Nung melothso nou ngühau akiu,” ta Elijaüh ngiom. Apaüh nung melothso nyiuhai nou phamongko nou luoklo, küta apa noitsün asungthun tsampai nai kankü sungkü then nai letaiu.

²⁰Nungai apaüh sang songkü misao saokü ngiom, “O APAOU jü Goa, ni nung jihinyiu noutü tiauta nungti tsümei- kün chhisiya chhikü noin? Nung nyiuhai nou ngo thatü paotsangkü kankeikü shikü noiküla, naiuso lo ni apa thso loatji!”

²¹Nungai Elijaüh apa chija methso khako pha samjam luoksankü ta misaoloum, “O APAOU jü Goa, nung methso aa akiushi!”

²²APAOU nou Elija misao thala; nungai methso nou iloau yalo naiuso ahkü shishin.

²³Elijaüh nung melothso nou tsampai asaothun nai noitsün apa nyiu dongai loklokü saokü apatü ngiom, “Athaplu, athso aa noin!”

²⁴Nungai Nyiuhai nou thalakü ngiom, “Loto ngo ni Goa khaiunia tsak ta ngeji naiuso APAOU nou atsüoting ni tsangkü chiteji!”