Read Khiamniungan Naga 1 Nokpao 18 Bible Online

1 Nokpao 18 - Khiamniungan Naga bible

1 Nokpao 18

¹Atao intso phiai, ah wai tao sampon nouko APAOU nou Elija tü ngiom, “Ni Nokpao Ahab dongai khukü lühan, naiuso ngü ah-ou nou honge.”

²Nungtiphe Elija tsalokü khu. Samaria nai naiusile nou aküo thatü thsoükü tsaokü iulakü noiküla;

³nungtiphe Ahabüh sau nungtaoko nokpao tsam tü jimau ahei taiutsün Obadia tü jon. (Obadia nung APAOU tü thumkü mongkiukü amkhamtsün tsak noiküla,

⁴naiuso tilai Jezebelüh APAOU ün e-po nouso loatkü noiküla, Obadiaüh nungso tsom tsak nialo küta ahoi nime aopüngongo hau thekü ngüso ken nai pamkü noi-i, naiuso ngüso hau eheshiu kiukü tsad.)

⁵Ahabüh Obadia tü ngiom, “Sam khukü mokthso nouso naiuso athso nouso aa noi-iau khenglio nou saiukü noi süne tsünoi ta haiutso naiuso haiusai apemai thapluko. Samüh sam thainianso tsaktso loat- kü hau tsünoiko-e.”

⁶Ngüso pungkü nou tisübao goumchi haoson nai chong khukü thappe nung ngemlo, naiuso yam amomo ai khuau tsaloum.

⁷Obadia apa yamai khutsün tao, alekta Elija pheten. Apaüh Elija tsangsheiküta apa khako kauthio, naiuso sangkü ngiom, “Nung atsüoting ni süne APAOU?”

⁸“Ah, Ngo Elija noin,” ta apaüh thala. “Khukü ni ün APAOU nokpao hau ngo nungai noin ta lüchite.”

⁹Obadiaüh thalakü ngiom, “Ni ngo Nokpao Ahab tsangkü loattsün ahat nai taiuau aiutsün nung ti angja chhitaiukü noin?

¹⁰Aa noitsün APAOU, ni nou Goa, nianko nokpao nou nitü goumchi nai mele pungkü yamkeikü noin ta ngo ngiomong- shingkü ngioji. Tilai nokpao nou ni apa goumchi ko tsünoiküla ta lula-e, Ahabüh nung nokpao ainou ni tsüepshi-e ta ngiomongshingkü ngio-iau pohkü noiji.

¹¹Naiuso lo ngo khukü apa hau ni nungko noin ta chite-iau aiuji süne?

¹²Ngo khuwankü thunkü APAOU Onthso nou ni tsüngekün athang ajantso ai kankü khuwan nai, naito ti? Nungai tilai ngü Ahab hau ni nungko noin ta chite-e, naiuso apaüh ni tsüepsan nai apaüh ngo loatkü wane. Ngo methso tao nai yakü APAOU noutü thumkü kiukü amkhamtsün tsak noikü shin ta lüyangsan.

¹³Tilai Jezebelüh APAOU ün e-po nouso loatkü noiküla, ngü ngüso haoson aopungongo ta ahoi nime hau thekü ken nai tsang- san, naiuso ngüso hau chihsikhiam waoshenkü noiküla ta ni tsülula süne?

¹⁴Nungtiphe ngü titi nokpao dongai khuküta ni nungko noin ta chiteau ngiokhem kiuau shioji? Apaüh ngo loatkü wan-e!”

¹⁵Elijaüh thalakü ngiom, “Ngü yathsüotsün aa APAOU nou nianko ngo lonyi nokpao khako han-e ta ngo thaloji.”

¹⁶Nungtiphe Obadia, nokpao Ahab dongai khuküta apatü ngiom, naiuso nungai Ahab Elija ko pheteau tsalom.

¹⁷Tilai Ahabüh apa epm, apaüh ngiom, “Israel nai thatü thsüokü angja losantsün ni nungko noin!”

¹⁸Elijaüh thalakü ngiom, “Angja losantsün ngo tsüde.” “Lüko apo aje noin. Asamüh APAOU ün athoilut nouso angio tsü-angkü Baal amkham.

¹⁹Lo Israelhai apem tü ngüko Karmel King nai aphete ta lüngio. Asamko aikü Menyiu Nokpao Jezebelüh jongtsünso Baal ün e-po 450 nouso naiuso menyiu Ashera ün e-po 400 nouso nialokü ashi.”

²⁰Nungtiphe Ahabüh Israelhai apem naiuso Baal ün e-po nouso Karmel king ai pheteau jonkam.

²¹Elija khaiuniahoi nouso dongai sungküta ngiom, “Asam mongyang jeiailoau atao tilektso lo-e? APAOU nou Goa naito, apa lu amkham; lüko Baal nung Goa naito, apa lu amkham!” Lüko khaiuniahoi nou ngiopem tsaktso tsüthashi.

²²Nungai Elijaüh ngiom, “Lo saokü nouko APAOU ün e-po ngolu poikü noin, lüko nungai Baal ün e-po nouso 450 noin.

²³Jangtsopong nime kankü ashi: Baal ün e-po nousoüh tsak lokü, nung lüloat-küta nelangkü lütapne- naiuso nungso pai chiai lütaiu-küta in nou lasonlut. Ngo lüko amao jangtsopong tsak nou ta nungtilu chhi-e.

²⁴Nungai Baal e-po nousoüh ngüso goa tü misao lüsao, naiuso ngü APAOU tü misao sao-e, küta nungko sübao Goaüh in hongtsün tsangkü thala-e-Goa nou apa noin.” Khaiuniahoi nou ngüso mongchio nou thalo.

²⁵Nungai Elijaüh Baal ün e-po nouso tü ngiom, “Asam khaiunia piakü phe, asamüh jangtsopong tsak lokü nung chong lükhemlo. Asam goa tü misao lüsao, lüko pai chi nai in nou lajahlut.”

²⁶Ngüsoüh ngüso hau kankü shikiutsün jangtsopong nou loküta nung khemsan, naiuso Baal tü anyi- wem saokü misao saom. Ngüsoüh “Sam tü athala Baal!” ta vekü ngiom-naiuso ngüsoüh shansantsün amthang nou lemkü jihang hang. Lüko ngüso dongai athalatsün ti tsüshi.

²⁷Anyiwem tao Elijaüh ngüso tü lonyai au yachu: “Songkü vekü misao lüsao. Apa goa noin! Tsüngean apa sailakü mea meanjisao, tsüdekünai apa süme lüko eiuwanau shiom! Tsüdekünai apa saikü noian sau, naiuso asamüh apa lothsümonau noin!”

²⁸Nungtiphe e-po nousoüh loüh thatü sang asong nou misao sao naiuso ngüso amkham yam saisileli she nou motsangkün lektso ngü ngüso chija ngüso pemai sahtso naiuso sahkiang nousoüh laiulokü noiküla.

²⁹Ngüso anyiwem saokü vekü sheikü noiküla; lüko athalatsün titso tsüshi, sang-i tsak lüko tsülula.

³⁰Nungai Elijaüh khaiuniahoi nouso tü ngiom, “Jü dongai shimkü ashi” naiuso ngüso apem apa lemkü kamshin. Apaüh APAOU amthang lotheankü noitsün lomeiau yalo.

³¹Apaüh lung chekü nime lo, APAOU nou Israel nian niankiutsün Yakob thsoso nianphiai mele chekü nime nian pungkü thaiutha lung tsak tsak.

³²Nung lung nousoüh apaüh APAOU amkhamtsün athang shanshi. Apaüh nung lemkü singtsangkhan nou thaiu, nung khiam liter cheküphe to chomkü hauli thaiusat.

³³Nungai apaüh pai nou amthang chiai letaiu, küta jangtsopong nou nelangkü tapnekü nung chiai lelut. Apaüh ngiom, “Khiam nou meng püle alomean küta nung amthang naiuso pai chiai lütsalut.” Ngüsoüh angiotsünli chhin,

³⁴naiuso apaüh ngiom, “Loühjam achhishi” -naiuso ngüsoüh chhin. Apaüh ngiom, “Loühjam lüchhishi,” naiuso nung lüko ngusoüh chhin.

³⁵Khiam nou amthang ainou jangkü saokü singjangkhan nou meankü noiküla.

³⁶Anyiwem aloat chaithio kiutsün ataoko nai e-po Elija amthang dongai shikü misao saokü ngiom, “Oh APAOU, Abraham, Isak, naiuso Yakob Goa, ni Israelhai Goa noin, naiuso ngo ni yathsüotsün noin, naiuso nung apem ni thoiluttsün nai chhisiyakü noin ta lo mitha akiu.

³⁷Ngü tü athala, APAOU, ngü tü athala, nungaito nung khaiunia nousoüh ni APAOU, Goa noin, ta nge-e, naiuso nung ngelatsün nou ngüso adongai laokü nialokü shiji.”

³⁸APAOU nou in hong-ikü nungüh chaithio, pai, naiuso lung nouso chethe-an, goh nou tü jek nou singtsangkhan nai noitsün khiam apem appan.

³⁹Tilai khaiuniahoi nou nung ep, ngüso chija goh ai loian, küta wekü ngiom, “APAOU lu Goa noin; APAOU lu Goa noin!”

⁴⁰Elijaüh ngiokhem kiukü ngiom, “Baal e-po nouso lüthalo, ngüso tsaktso lakhulükhun-i!” Nungaih khaiuniahoi nousoüh ngüso apem thalo, küta Elijaüh ngüso Kishon Haiu nai nialokü saokü loatkü wan.

⁴¹Nungaih Elijaüh Nokpao Ahab tü ngiom, “Lou, lükhu, küta lühe. Ngo ah-ou ngemli shitsün lulaji.”

⁴²Ahab eheau khunai, Elija Karmel Kingson nai sungh, nungko apaüh apa khaiu apa singkau jetko ngamthiokü kauthio.

⁴³Apaüh apa tsamki tü ngiom, “Lükhu küta sheasong dongai lüthaplu.” Tsamki nou khukü, “ngo titso tsüep ta ngiokü laokü shishin.” Elijaüh apatü khuküta lüthaplu ta chinyatjam ngoikü ngiokü noiküla.

⁴⁴Chinyatjam nouko nai tsamki nou laokü shiküta ngiom, “Ngo khaiunia tsak phatü hentsokü thengmia tsak sheasong ainou sungkü ep.” Elijaüh apa tsamki tü ngiokhem kiukü ngiom, “Nokpao Ahab dongai lükhu küta apatü mokthso tsamkei nai noiloküta ah-ou nou apa mololaokün khako tsamai laokü lükhuwan ta lüngio.”

⁴⁵Atao intso noiküphiai maou nou thengmia anyakhem nou nyingjei, ahsheih nou shei au, naiuso ah-ou thsüokü nou ou-au yalo. Ahab apa mokthso tsamkei nai noiloküta Jezreel dongai laokü khuau tsalo.

⁴⁶APAOU oukong Elija da saokü noiküla; apa neüh apa omthsa lojenlo, küta Jezreel dongai khutsün yam apem Ahab khako jingkü khu.