Read Khiamniungan Naga 1 Nokpao 19 Bible Online

1 Nokpao 19 - Khiamniungan Naga bible

1 Nokpao 19

¹Nokpao Ahabüh apa tsam- mongnyiu Jezebel hau Elijaüh chhisiyakü shitsün alum naiuso apaüh titi Baal ün e-pohoi apem loatkü wan nung chiten.

²Nung nyiuhai nou Elija dongai ngiongem tsak hongkü ngiom, “Lühom nung tao nouko ni Baal e-po nouso ta chhitsünli ngü ni ta tsüchhikü naito, goa nousoüh ngü da ee nou ashiuh.”

³Elija hatkü apa meshen aa kiploau thaiutha khulükhunan; apaüh apa tsamki nialokü Yihuda goumchi Beersheba nai khuwan. Apa tsamki nungko taiukü,

⁴Elija liutsa nai ajekhaiu tsakthum tsakeikü khu. Apa paikhemso tsakko laolokü moknoi naiuso nungai apa meshen chija e-ao thaiutha yanghe. Apaüh misaokü ngiom, “Nung thatü thsüowaniu, APAOU.” “Jü aa nou alowan; ngo lüko esan au shiom!”

⁵Apa paikhem nai noi naiuso saila-an. Alekta hong tsaküh apa tü thankü ngiom, “Achu küta lühe.”

⁶Apaüh lemkü thaplunai, themtsai tsan tsak naiuso khiammeng tsak ta apa khaiu dongko ep. Apaüh nung heshiu, naiuso loüh jam saila-anshin.

⁷APAOU ün hongthon laokü shikü apa müjam lothsümonkü ngiom, “Achu küta lühe, tsüdekünai nung süme nou athaiutha thatü chekkü noi-e.”

⁸Elija chukü heshiu naiuso nungüh apa hau asio king Sinai ai khuau ajekhaiu aopülenyi thaiutha oukong kiukü noiküla.

⁹Nungai apa nung soh nai shamanau thaiutha ken tsak ai khu. Alekta APAOU apako chitekü ngiom, “Elija, ni nungko ti chhiji?”

¹⁰Apaüh thalan, “Akhengteng APAOU Goa, ngü asaita nilu yathsüokü shin. Lüko Israel haiüh niko thalou-e taiutsün lothean-iu, ni amkhamtsün amthang lothean-iu naiuso ni nou e-po nouso apem loatan-iu. Jüpemsalu poitaim, naiuso loüh ngü loatkü wanau koweji!”

¹¹“Lükhu, küta kingson nai jükhako tsakü anoi,” ta APAOU nou apa tü ngiom. Nungai APAOU nou yankükhu naiuso apaüh ahsheih athsüoting tsak hong, nungüh king nouso paipekan naiuso lung nouso yakpengan, lüko APAOU nouto nungh ahsheih nai tsünoiküla. Ahsheih nou laowan naiuso nung thanko goh- haium tsak shin-lüko APAOU nouto nung gohhaium nai lüko tsünoiküla.

¹²Gohhaium nou phiko, in tsak sungh, lüko APAOU nou nung innyai naiüh tsünoiküla. Naiuso in nyai phiko, nungko ashethop sang-i tsak noiküla.

¹³Tilai Elijaüh nung sang-i lula, apaüh apa kha phakhut nou loipok küta kengchiai shikü kenkok nouko tsakü noiküla. Sang-i tsaküh apatü ngiom, “Elija, ni nungko ti chhiji?”

¹⁴Apaüh thalakü ngiom, “APAOU, Akongting Goa, Ngü asaita ni naiuso nilu yathsüokü shin. Lüko Israel haiüh niko thalou-etaiutsün lotheaniu, ni amkhamtsün amthang nouso lotheaniu, naiuso ni nou e-po nouso apem loatkü wananiu. Ngü pemsatenglu poikü noin, naiuso ngüsoüh ngü loatau koweji.”

¹⁵APAOU nou apatü ngiom, “Da- maska shimkü liutsa nai lulaoshi, naiuso noknio nai napküta Hazael nung Siria nokpao theau lütsomkiu.

¹⁶Nimshi thso nou Jehu nung Israel nokpao theau lütsomkiu, naiuso Abel Meholahai nou Shafat thso Elisha nung niko nou e-po noikham liloau lütsomkiu.

¹⁷Khaiunia ajantso Hazael sah khako nou thakhunai apa Jehuüh loate, naiuso khaiunia ajan- tso Jehu sah khako nou thakhunai apa Elishaüh loate.

¹⁸Lüko ngü Israel nai ngütuü mongyang saitha noitsünso naiuso Baal tü tsükauthiokü tsüdekünai apa sotsom tü son nou tsüchepkünso khaiuniahoi heng chinyat jü thaiutha poitaiu-e.”

¹⁹Nung ainou Elija pungekü khunai apaüh Elisha jangtsopong ahoi tsakko eiu ah-tsün nai noikü ep; apa khako jangtsopong ibkü ah-tsün chekü tsak apa athon nai noiküla. Elijaüh apa phakhut ngiosan küta nung Elisha tü ngiolut.

²⁰Nungai Elishaüh apa jangtsopong wankü, Elija phiai jingkü khukü ngiom, “Ngü hau jüposinyiu netü apunge au khukü son nai achep-i, nung phiai ni tü hoilut-e.” Elijaüh thalakü ngiom, “Laokü lükhu, Ngü ni tsülolaoji!”

²¹Nungai Elisha apahoi jangtso- pong nouso lokü chhitsünso dongai khuküta nungso loat, naiuso nyih nouso thengsan, ngüsoüh inja nai pai thaiutha khe nouso kankei. Apaüh nyih nouso khaiuniahoi nouso hau kium, naiuso ngüsoüh nung he. Nungphiai apa tsalokü Elija phiai hoilutkü khukü apa yathsüo.