Read Khiamniungan Naga 1 Nokpao 2 Bible Online

1 Nokpao 2 - Khiamniungan Naga bible

1 Nokpao 2

¹Tilai David eanau atao saokü shin, apaüh Solomon jonküta apa hau aphiteng ayamhan nouso kium:

²“Ngü eao atao shisao-iu. Mong nyankü lüthe naiuso ni achija khaiunia tsak ta lühan;

³naiuso APAOU a-Goaüh ti chhisiya au kiuji nung lüchhi, Mosa Ngiokhem nai sattaiutsün apa ngiokhem nouso naiuso athoilut nouso apem ngio angkü lüthe, nungaito ni chhisiyatsün nouko naiuso ni khutsün alumai ouk noi-e.

⁴Ni apa ngio angnaito, APAOU nou tilai ngü tü jü thsaosithsosoüh apa athoilut nouso paotsangkü naiuso mongkiukü ngüso mongpemüh naiuso onthso nou yathsüo-e, ngüsoüh Israel nai nokshinge naiuso APAOU nou apaüh thalotaiutsün ngio nou tü tsa-e.

⁵“Loüh amao tsotsak noishin. Ni, Joabüh Israel süpaihoi ahei nime, Ner thso Abner naiuso Jether thso Amasa loatkü ngü tü ti chhin nungh lüyangshi. Ngüsoüh ehli taoko loat- tsün thaiutha apaüh ngüso nokmei taoko ngüso phaosan chaoattsün ni lüyangshi. Apaüh aphio tsülepkün khaiuniahoi loat, naiuso apaüh ti chhin nung thaiutha ngo lo thsale kanji, naiuso nung liko angja shitsün ko ngo omheji.

⁶Ti chhiau ni ngeji; ni apa akiasiyaüh to tsü e-iau noin.

⁷“Lüko Gilead ainou Barzilai melothsoso hau atsüojinyang lühan, naiuso ngüso lüpaotsang, tiautenai ngo adeisinio Absalom ainou khukeitsün taoko ngüsoüh ngü hau atsüojinyang hankü noin.

⁸“Nungaih loüh Benjamin hai, Bahurim noksong ainou, Gera thso Shimei noishin. Ngo Mahanaim ai khutsün ajekhaiu konai apaüh ngü tü thatü thsüokü athesan kiu, lüko tilai apa ngü ko Yordan Haiu ai phete, ngo apa tsüloat au APAOU nianko apa hau mongkü athalokium.

⁹Lüko ni apa angja tsükiukü to tsükhu-iau noin. Ti chhiau noin nung ni ngekü noin, apa loatkü wanau noin.”

¹⁰David ean naiuso apa mea nung David Noknio nai khannan.

¹¹Apaüh Israel nai pon aopüle, Hebron nai pon chinyat naiuso Yirusalem nai pon aosamkü süme ta nok-shing.

¹²Solomonüh apa po David nokpao noikham lilo, naiuso apa nokshing oukong mongkü shan.

¹³Nungaih Hagit thso Adonija, Solomon nyiu Batsheba dongai khu. Batshebaüh sangkü ngiom, “Ni nokmei nai shin süne?” “Ah, nokmei nai shin,” ta apaüh thala,

¹⁴naiuso apaüh ngioshin, “Ngo nitü sangau tso tsak noin.” “Nungti in noin?” ta nyiuhai nou sangkü ngiom.

¹⁵Apaüh thalakü ngiom, “Ngo nok- pao theau noin ta nung Israel nai khaiunia pungkü nou yangkü noiküla nung ni ngeji. Lüko nung amomo thawaokü noin naiuso jünio nokpao au then, tiautenai nung APAOU nou mongchiotsün noiküla.

¹⁶Naiuso lo, ngü akojatsün tsak kojaau aiuji; tsüo- jinyangkü nung ngü tü lashanan.” “Nung ti in noin?” ta Batshebaüh sangkü ngiom.

¹⁷Apaüh thalakü ngiom, “Tsüo- jinyangkü Nokpao Solomon tü lüsang Shunem ainou menyiuthso Abishak jü tsammongnyiu the-iau apaüh ni tü tsüshane ta ngo ngeji.”

¹⁸“Thatü mein,” ta nyiuhai nou thalakü ngiom, “Ngü nokpao nouko athaiutha chite kiu-e.”

¹⁹Nungtiphe Batsheba, Adonija thaiutha nokpao nouko chite au khu. Nokpao nou apa nyiuhau salam kiuau tsakü chu naiuso apa khako kauthio. Nungaih Nokpao apa noikham ai moknoi naiuso loüh tsak lüko kankü nap, naiuso nyiuhai nou apa uai moknoi.

²⁰Nyiuhai nou ngiom, “Ngo ni ainou atsüojinyang ehenthso tsak sangau noin, tsüo- jinyangkü nung ngü tü lashanan.” “Nung ti in noin, nyiu?” ta apaüh sang. “Ngo ni tü tsüshanane.”

²¹Nyiuhai nou thalakü ngiom, “Shunem menyiuthso nou Abishak, adei Adonija hau apa tsammongnyiu theau akiu.”

²²“Ni tiauta ngü tü Abishak apa hau lükiu ta sangji?” ta nokpao nou sangkü ngiom. “Ni apa hau nokpao noikham nou lüko kiuau ngütü sang au noin. Atsüo naito, apa to jüdei noin, naiuso meson Abiathar naiuso Joab so apa dongai noin!”

²³Nungaih APAOU nianko Solomonüh ngiomong shinge tsak shan, “Adonijaüh nung ta sangtsün thaiutha apa aa tsükiukü naito Goa nou ngü tü e nou ashiuh!

²⁴APAOU nou ngü jüpo David nokpao noikham ai mongkü shankiu-iu; apaüh meshen athalo taiukü nung nokshing nou ngü naiuso jü thsao- sithsoso hau kium. Adonija lonyilu eane ta aa noitsün APAOU nianko ngo thaloji!”

²⁵Nungtiphe Nokpao Solomonüh Benaia hau ngiokhem kiu, naiuso apa kengchiai khuküta Adonija loatkü wan.

²⁶Nungaih Nokpao Solomonüh meson Abiathar tü ngiom, “Ni a goumchi Anathot ai lükhuwan. Ni eau maikü noin, lüko ngo ni lo loatkü tsüwane, tititenai ni jüpo David ko hanai APAOU ün Athalou-e Ngiokhem Paidan paotsangkü noiküla, naiuso ni apa angja apem ko haoson thehakü shin.”

²⁷Nungaih Solomonüh Abiathar APAOU yathsüotsün meson chhisiya ainou nian wanan, naiuso nungti apaüh meson Eli naiuso apa thsaosithsoso thaiutha Shilo ai APAOU nou ti ngiokü noiküla nung atsüo thawaokü shan.

²⁸Joabüh athawaotsün thaiutha lula. (Apaüh Absalom tü tsüdekü Adonija tü hachukü noiküla.) Nung- tiphe apa APAOU noitsün Nejenkhio nai khothio naiuso amthang tsam- niokun nou tü helutkü noi.

²⁹Tilai Joab, APAOU noitsün Nejenkhio am- thang nai khothiowaniu ta ngiongem nou Nokpao Solomon shingoi, Solomonüh Joab dongai tiauta apa amthang nai khulut ta sangau ngiongem kantsün tsak hong. Apa Solomon lun hat nou shioko APAOU tü khulutkü noin ta Joabüh thalakü ngiom. Nungtiphe Nokpao Solo- monüh Joab loatkü wanau Benaia hong.

³⁰Apa APAOU noitsün Nejen- khio dongai khuküta Joab tü ngiom, “Nokpao nou ni Nejenkhio ainou kengchiai ashian ta ngiokhem kiuji.” “Nyah, Ngo nungko ean-e,” ta Joabüh thalakü ngiom. Benaia laokü khukü Joabüh ti ngio nung nokpao nou hau chiten.

³¹Solomonüh thalakü ngiom, “Joabüh ti ngioji nung lüchhi.” “Apa loatkü ta khankü lüwan. Nungaih ngo tsüdekünai amao David ün thsaosithsosoüh Joabüh aphio tsülepkün khaiuniahoi loattsün thaiuthako loto thsale sau da tsü- noishi-e.

³²Jüpo David tü tsüsangkü apaüh chaoatkü aphio sunlotsün thaiutha Joab hau APAOU nou angja kiu-e. Joabüh aphio tsülepkün khaiunia nime, apa tü meitsokü nou Israelhai süpai ahei Abner, naiuso Yihudahai süpai ahei Amasa ngüne loat.

³³Nungso chaoattsün mai angja nou Joab naiuso apa thsaosithsoso khako athontsüyangkü noi-e. Lüko APAOU nou apa nokshing noikham nai noitsün David ün thsaosithsoso hau asaita ashiolotsün kiu-e.”

³⁴Nungtiphe Benaia APAOU noitsün Nejenkhio nai khuküta Joab loat, naiuso apa meshen tsam kengpun nai khanan.

³⁵Nokpao nou Benaia Joab thangko apa süpaihoi ahei au taiukiu naiuso Abiathar thangko meson theau Zadok taiukiu.

³⁶Nungaih nokpao nou Shimei tü jonau hong naiuso apa tü ngiom, “Nungko Yirusalem nai athaiutha tsam tsak lülalo. Nungko lükih naiuso noknio nou lale-an.

³⁷Ni tilai lünou noknio leankü khunaito, ni tongtü eane-naiuso nung thsale nou nilu kane.”

³⁸“Thatü mei, Asuhatkü noitsün Nokpao,” ta Shimeiüh thalakü ngiom. “Ni ti ngioji ngo nung chhi-e.” Nungtiphe apa Yirusalem nai atao laiukü kih.

³⁹Pon süme phiai, Gathai nokpao Maaka thso Akis dongai Shimei ün sua nime khulükhunan. Tilai Shimeiüh ngüso Gat ai noin ta lulan,

⁴⁰apa meshen gado chiai moknoikü apa sua nouso yamao Gathai Nokpao Akis dongai khu. Apaüh ngüso eplo küta ngüso tsamai laokü nialokü shin.

⁴¹Tilai Solomonüh Shimeiüh ti chhin nung lula,

⁴²apaüh Shimei dongai hongkü ngiom, “Ngo ni Yirusalem leankü tsükhuau APAOU nianko thalo-ikü taiu. Naiuso ni nung chhi naito ni tongtü eane ta ngo ni tü lotsüokü taim. Ni nung tsümongchio- kü noikü ngo angio ang-e ta ngioji süne?

⁴³Nungaito tiauta, ni atha- lotsün lothean naiuso jü athoilut ngio tsü angkü chhin?

⁴⁴Jüpo David tü ni ti aphio chhin nung ni apem thatü meikü ngeji. APAOU nou nung thaiu- tha ko ni angja kiu-e.

⁴⁵Lüko apaüh ngü oukkiu-e naiuso apaüh David nokshing asaita kipsankü taiu-e.”

⁴⁶Nungaih nokpao nou Benaia hau ngiokhem kiu, naiuso apa khuküta Shimei loatkü wan. Loto Solomonüh nokshing nou apa oukong khemai thumkü taiu.