Read Khiamniungan Naga 1 Nokpao 20 Bible Online

1 Nokpao 20 - Khiamniungan Naga bible

1 Nokpao 20

¹Siriahai Nokpao Benhadadüh apa süpaihoi jonkam, naiuso apa tü nokpao hoi aosamkü nimeüh ngüso mokthso naiuso ehli tsamkei nouso hakü hachukü sungküta Sa- maria lemlo, naiuso nung komhekü thaloau ehli tsalo.

²Apaüh Israelhai Nokpao Ahab tü ngioau noknio nai ngiongem kantsünso hongkü ngioji, “Nokpao Benhadadüh mongchiotsün nung

³ni, atangkason, a chaiou lakkeng, a menyiuso, naiuso ni nou akongting thsohoi apem ngü ta ahoilutan ta ngiom.”

⁴Naiuso Israelhai Nokpao Ahabüh thalakü ngiom, “Jü APAOU Benhadad tü lüngio, ni ngiotsünli ngo mongchioji, apaüh ngo naiuso ngü taiutsün alum loau shio-e.”

⁵Atao intso noiküta Benhadad ainou ngiongem kantsünso Ahab dongai asaotsün amao tsak kankü laokü shishin: “Atangkason, a-chaiou lakkeng, a menyiuso, naiuso a methsoso ngü hau alethiowan ta ngo adongai ngio hongkü noiküla.

⁶Loto, titilünou, ngü a nokpao tsamai naiuso ni nou asonghoiso tsamai ngüsoüh tilüsong amai piaküli yange nungso kamloau jü asonghoi nouso honge. Ngüso lühom nungtaoko nai atsamai noi-e.”

⁷Nokpao Ahabüh goumchi aheihoi nouso apem jonkam küta ngiom, “Nung khaiunia nou sam lomowanau mongchiotsün asamüh epji. Apaüh jüdongai jü tsammongnyiuso, methsoso, tangkason, naiuso chaiou lakkeng nousotü saokü ngiongem kantsünso hongkü noiküla, naiuso ngo nungko mongchiokü shin.”

⁸Goumchi aheihoi naiuso khaiuniahoi nou thalakü ngiom, “Ni apa tü ti la anglu; naiuso lanyapkiu.”

⁹Nungtiphe Ahabüh Benhadad ün ngiongem kantsünso tü thalakü ngiom, “Ngo chongting saotsün ko mongchiokü noin, lüko müjam nou koto ngü mongchioau tsüshio,” ta jü APAOU nokpao tü lüngio. Nungai ngiongem kantsünso pungekü khu naiuso loüh Benhadad ainou

¹⁰amao ngiongem tsak kankü laokü shishin: “Ngo anoknio nung lotheanau thaiutha khaiuniahoi nou saiukü kankü shi-e küta ngüso pha nai lungtso nouso lüko apem kankü khuwane. Ngo nung tsüchhikünaito, goa nousoüh ngü tü ee nou ashiuh!”

¹¹Nokpao Ahabüh thalakü ngiom, “Süpai atsüoting tsak nou to ehli khako tsüdekü ehlihekütün phiai bülom au noiji, ta Nokpao Benhadad tü lüngio.”

¹²Benhadad tü hachutsün amao nokpaohoi nouso ngüso nejenkhio nai theng shiukü noitsün taoko Ahab ün athalatsün Benhadadüh epm. Nungai apaüh khaiuniaso tü nung noknio komheau akhemlo ta ngio- khem kium, nungai ngüso khemlokü noiküla.

¹³Nungtaoko, e-po tsak Nokpao Ahab dongai khukü ngiom, “APAOU nou ngioji, ‘Nung süpaihoi apia nouso tü hatkü lanoi! Ngü nungso khako nihau ashiolotsün kiu-e naiuso ni ngo APAOU nou noin ta nge-e.’”

¹⁴“Nung komheau sauüh heikü the-e?” ta Ahabüh sangkü ngiom. Nungai e-po nou thalakü ngiom, “Khiamkhan nokshingpaou nouso khemko noitsün süpai oum nousoüh nung chhi-e ta APAOU nou ngioji.” “Atengting oukonghoi nouso sauüh hei-e?” ta nokpao nou sangshin. “Ni hei-e” ta e-po nou thalakü ngiom.

¹⁵Nungtiphe nokpao nou süpai oum nouso sauhai khiamkhan ahei- hoi khemko noiküla nungso jonkam, ngüso apem nai mepem 232 noiküla. Nungaih apaüh Israelhai süpaihoi jonkam, ngüso apem nai mepem 7, 000 noiküla.

¹⁶Benhadad naiuso apa hachu- tsün aosamkü nime nouso ngüso nejenkhio nai theng shiukü noi taoko, nung ehkom nou anyiwem taoko tsalokü noiküla.

¹⁷Süpai oum nouso chongting nai khu. Benha- dadüh hongtsün oumhoi nousoüh Samaria ainou süpai ahoi tsak shiji ta apa hau ngiongem kankü shin.

¹⁸Nungai apaüh ngüso tü ngiokhem kiukü ngiom, “Ngüso ehliau shikü noilüko tsüdekünai nokmei thaiutha sangau shikü noilüko, ngüso tsüloatkü aa lüthalou.”

¹⁹Oum süpai nousoüh niakü, nungtü Israelhai süpaihoi hoilutkü nung komau yalou,

²⁰naiuso khaiunia pungkü nou meshen li-etsün khaiunia pungkü loatkü wan. Siriahai, Israelhaiüh komtsünko aikü khupengan, lüko Benhadad to süpaihoi ajantso hakü apa mokthso chiai moknoikü thakhukü noiküla.

²¹Nokpao Ahabüh ehlithang nou thalowan, mokthso nouso naiuso ehli tsamkei nouso piakü thalowan, naiuso Siriahai thatü thsüokü tawaikiukü shiolowan.

²²Nungaih e-po nou Nokpao Ahab dongai khukü ngiom, “Laokü lükhu küta ni nou süpaihoi lüloukamlo, naiuso ayan nou paotsangkü lüshan- shi, tiautenai Siriahai nokpaoüh nungthan thsanyan nyimtao nouko loüh jam poshi-e.”

²³Nokpao Benhadad ün asonghoi nou apatü ngiom, “Israelhai goa nou- soto king goahoi noin, nungshioko Israelhaiüh sam shiolowaniu. Lüko sam ngüsoko tsamei nai lih-e naito samüh atsüoting ngüso shiolo-e.

²⁴Lo nokpao aosamkü nime nouso ngüso ahei ainou awanan küta chhisiya nai ahei nouso lithiokü ngüso alian.

²⁵Nung phiai ni wankü khuwantsün süpaihoi asong tsakli, mokthso naiuso tsamkei nouso haove wekülu hakü ajonkam. Sam Israelhaiko tsamei nai eh nou liko, naiuso nung taoko naito samüh ngüso shiolo-e.” Nokpao Benhadad mongchiokü ngüso ayamhan nouko hoilut.

²⁶Nungthan thsanyan nyim taoko nai apaüh apa khaiuniaso jonkam küta ngüso ko aikü Israelhai komau Aphek noknio nai khu.

²⁷Israelhai kamshi naiuso khemlo; ngüso khukü Siriahai tü lashikü ahoi nime hau asaothang shankü noi. Goumchi thapekkü pengkü khutsünso Siriahaiko naito Israelhai athapau won ahoi nime lilu noiküla.

²⁸E-po tsak Nokpao Ahab dongai khuküta ngiom, “APAOU nou nungti ngioji: ‘Tiautenai Siriahaiüh ngo tsamei nouso goa tsüde lüko king nouso goa noin ta ngiojiphe, ngü ngüso süpaihoi asong khako asam hau ashiolotsün kiu-e, naiuso nungai ni naiuso akhaiuniasoüh ngo APAOU nou noin ta nge-e!’”

²⁹Siria naiuso Israelhai ngüso shamthang nai ajekhaiu chinyatnyi ngüso si ngüso asaothang lalutekü nai noi-an. Chinyatnyi nouko nai ngüso ehli au tsalo, naiuso nungko Israelhaiüh Siriahai 100, 000 loatkü wan.

³⁰Athakhu nouso Aphek noknio ai khuthio, nungai ngüso khaiunia 27, 000 khako noknio lungpe loilut. Benhadad lüko noknio nai khulut naiuso tsam tsak phiai tsampai nouko solokü noiküla.

³¹Nungai apa khemko noitsün asonghoi nouso apa dongai shikü ngiom, “Israelhai nokpao nouso to atsüojinyang noiji ta samüh lulakü noiküla. Sam oum lemkü nethe naiuso sam sang lemkü ao nou khiküta sam Israelhai nokpao ko phete au ayam asopkiu, tsüngean apaüh ni aa nou poitaiu kiuau shiom.”

³²Nungtiphe ngüsoüh ngüso oum lemkü nethe nou khi naiuso au nou ngüso sang lemkü khikü Ahab dongai khukü ngiom, “Ni yathsüo- tsün Benhadadüh apa aa ataiukiu ta kojakü ni tü ngioji.” Ahabüh thalakü ngiom, “Apa losaokü aa noin süne? Mei! Apa ngo ko deisinio tsakli noin!”

³³Benhadad ün asonghoi nou ii amei tsak thaiutha jiokü thapkü noi- küla, naiuso tilai Ahabüh “Deihai,” ta ngiom, ngüsoüh shakta nungtü thamshikü, “Ni ngiotsünli Benhadad nung adei noin!” ta ngiom. “Apa jüdongai nialokü ashi,” ta Ahabüh ngiokhem kiukü ngiom. Tilai Benhadadüh shisaom, Ahabüh apako tsamkei nai khuha au jon.

³⁴Ben- hadadüh apatü ngiom, “Jüpoüh apo ainou lotaiutsün noksong nouso ngo ni hau laokü kiushi-e, naiuso jüpoüh Samaria nai chhikü shitsünli, ni athaiutha Damaska nai chaile oule thang tsak shanau shio-e.” Ahabüh thalakü ngiom, “Nung- koko naito, ngü ni jahshi-e.” Apaüh Benhadad ko nung athalou-e tsak shan kuta apa khu-i.

³⁵APAOU athoilut tsangkü nai e-po ahoi tsak ongko mepem tsaküh e-po tsak tü shiuh au ngiokhem kiu. Lüko apaüh ashiuh au tsümongchio,

³⁶nungtiphe apaüh tsak nou tü ngiom, “Tiautenai ni APAOU ün athoilut ngio tsü-angphe, ni ngo ainou pungekü thunkü ni chongkhao tsaküh jeiatkü wan-e.” Naiuso apa pungekü khukü thunkü, chongkhao tsak shikü apa jeiatkü wan.

³⁷Nungaih nung e-po noulu amao khaiunia tsak dongai khukü ngiom, “Ngü tü ashiuh!” Nung khaiunia nou angiotsünli chhin; apaüh tsak nou tü thsüokü shiuh naiuso apa tawaikü noiküla.

³⁸Nung e-po nou kausaikü apa kha nepat tsaküh khipok, küta khukü Israelhai Nokpao nou yankü khutsün taiukü yamkuk nai tsa.

³⁹Nokpao nou yankü khutsün taoko apaüh apa tü jonkü ngiom, “Asuhatkü noitsün Nokpao, ngo ehlithang nai ehlikü noiküla nungai süpai tsaküh athalotsün ehoi ongko tsak jüdongai kankü shin naiuso ngiom, ‘Nung khaiunia tü ehükü anoi; apa khulükhun naito, ni nung mai apim aa nou kiu-e tsüdekünai nitü tangkason heng 3, 000 ja-e!’

⁴⁰Lüko ngo amao chhi tsak thaiu- tha thatü tsükengtingkü noiküla, naiuso nung khaiunia nou khulü- khunan.” Nokpao nou thalakü ngiom, “Ni achija aphio nou chite-iu, naiuso ni nung aphiowan nou mai thamshiau noin.”

⁴¹Nung e-po nou apa kha khipok taiu nou nepat chipekkan, naiuso nungailu nokpao nou apa e-pohoi ongko tsak ta ngesan.

⁴²Nung e-po nou nokpao nou tü ngiom, “APAOU ngio nou nung noin: ‘Tiautenai ngü lüloatan ta ngiokhem kiukü taiutsün khaiunia nou ja-anphe, nungliko ni apim aa nou kiuau noin, naiuso apa a süpaiso lomowan-e.’”

⁴³Nung Nokpao nou yangelatkü naiuso monghenkü Samaria nai tsamai laokü khuwan.