Read Khiamniungan Naga 1 Nokpao 21 Bible Online

1 Nokpao 21 - Khiamniungan Naga bible

1 Nokpao 21

¹Jezreel nai Nokpao Ahab tsam dongko sainaoshep eiu tsak khaiunia tsak nian nou Nabot ün noiküla.

²Nyitso Ahabüh Nabot tü ngiom, “Jü tsam dongko shimkü noiphe ngü hau ni nou sainaoshep eiu akiu, naiuso ngü nung kiansinga piu au aimong tsak hau paotsanglo-e. Ngü nung liko nihau sainaoshep eiu ameitso kiushi-e, tsüdekünai, ni mongchio naito, ngü ni hau thamaikü chai kiushi-e.”

³Nabotüh thalakü ngiom, “Ngü nung sainaoshep eiu jüpaosiposo ainou tengkam epkü noin. Ngo nung sainaoshep eiu nihau the-an-iau APAOU nou lolaoji!”

⁴Nabotüh apatü ngiotsün ngio nou Ahab mongai thatü tsüpothakü apa tsamai khuwan. Apa, apa thenai kha nou dioai tü sheilutkü titso tsühekü saikü noian.

⁵Apa tsammongnyiu Jezebel apa dongai khuküta sangkü ngiom, “Tiauta ni thatü tsümong- lingkü noin? Ni tiauta tsüheshiu?”

⁶Apaüh thalakü ngiom, “Nabotüh ngo tü ti ngiom nung shioko. Ngo apa ün sainaoshep eiu tuh au ngioküla, apaühlu mongchio naito, nung liko amao sainaoshep eiu tsak kiu-e ta ngioküla lüko apaüh ngo tü nung loau tsüshio-e ta ngiom!”

⁷“Mei, naito nokpao nou ni süne tsüde?” ta Jezebelüh thalakü ngiom, “Then ainou asaowan, lühesishiu naiuso monglingkü lünoi. Ngü Nabot ün sainaoshep eiu nou nihau lokiu-e!”

⁸Nungaih nyiuhai nou thsamsat tsak sat, nungko Ahab niansat thanglut, küta ii nou thaolutkü, nung thsamsat Jezreel paopunghoi naiuso ahei nouso dongai hong.

⁹Nung thsamsat nousoko nungti sattaiukü noiküla: “Keithon ajekhaiu tsak thatsanküta, khaiuniahoi nou lüjon- kam, naiuso Nabot hau asuhat noikham athang nou lükiu.

¹⁰Alo- chitsün khaiunia nime lüjon küta apa khako Goa naiuso nokpao lochikiukü chhitsün mi lolut kiukü lüngio-i. Naiuso apa noknio ainou nialokü bechiai shiküta apa lung nou lüthoppat-an.”

¹¹Jezebelüh ti thoilut, nung Jezreel paopung naiuso aheihoi nousoüh chhin.

¹²Ngüsoüh ajekhaiu tsak keithon loau welutkü khaiuniahoi jonkam, naiuso Nabot hau asuhat noikham athang nou kium.

¹³Alochikiutsün khaiunia nime nou apa nyong khako Goa naiuso nokpao lochitsün thako phio-i, naiuso apa noknio bechiai nialokü khuküta yakkatkü wan.

¹⁴“Nabot loatkü waniu” ta ngiongem Jezebel dongai hongkü noiküla.

¹⁵Jezebelüh nung ngiongem lukü thunkü, apaüh Ahab tü ngiom, “Na- bot eaniu. Lo khukü apaüh nihau janau tsümongchiotsün sainaoshep eiu nou lülo.”

¹⁶Nungailu shakta Ahab nung sainaoshep eiu thaloau khu.

¹⁷Nungai APAOU nou Elija sübao Tisbe ainou e-po tsak noiküla apa tü ngiom,

¹⁸“Samariahai Nokpao Ahab dongai lükhu. Ni apa Nabot ün sainaoshep eiu ai nung eiu nou loau thaiutha noikü eppe.

¹⁹Ngo, APAOU nou apatü nung ngioji ta lüchite, ‘khaiunia nou loatphiai lüko ni apa jengtsaiu saokü loji süne?’ Ngü nung ngioji ta apa hau lüchite: ‘Jii nousoüh Nabot she shishiutsün athang tongtü nouko lu ngüsoüh ashe lüko shishiu-e!’”

²⁰Tilai Ahabüh Elija ep, apaüh ngiom, “Jü eh, ni ngo epm süne?” “Ah, ngo epm,” ta Elijaüh thala. “Ni apim thumkü nou APAOU khako ti tsümei nung chhiau kiuwaniu.

²¹Nungtiphe APAOU nou ni tü ngioji, ‘Ngo akhako aküothe nou kankü shie. Ngü ni naiuso atsamkhaiu ko apung nouso apem thumkü soimokü wan-e, oum si sonthi apem wekülu soimokü wane.

²²Atsamkhaiu Nebat thso nou Nokpao Jeroboam tsamkhaiu khekkü naiuso Ahija thso nou nokpao Baasha tsamkhaiu khekkü noi-e, tiautenai ni jü amongmat Israel hai angei nai nialokü khuwantsün shioko sung-iu.’

²³Jezebel thaiutha APAOU nou nungti ngioji: nung jii nousoüh apa mea Jezreel noknio nai he-e.

²⁴Atsammongso ajantso noknio nai ean nai, nung jii nou hean-e, naiuso ajantso kengpun nai ean nai, nung meahe letche nousoüh hean-e.”

²⁵(Ahab li APAOU khako thumkü tsümeikün chhisiya thaiutha pim kiuwantsün nungaih amao sautso tsünoiküla- nung apem apa tsam- mongnyiu Jezebelüh kojakü thoitsün shioko noiküla.

²⁶Amorhai sauhai APAOU nou Israelhai yatsün taoko koman, nungsoüh sotsom amkham- tsün chhisiyali apaüh sotsom am- khamtsün tsangkü angei atsaoteng nouso sunlo.)

²⁷Tilai Elijaüh chitekhem, Ahabüh apa nepat chipek, küta ngiosan, naiuso nethe nouso tenlo. Apaüh chiheau tsülokü, nethe chiai saian, naiuso keithonkü omhe angja lokü noiküla.

²⁸APAOU nou e-po Elija tü ngiom,

²⁹“Jü khako Ahab titi apa chija henkü iulan ni nung epsan mo? Apaüh nungti chhiphe, ngo apa aakih taokoto aküothe kankü tsüshi-e; nung apa thso Ahab vetaoko apa tsamkhaiu khako aküothe nou kankü shi-e.”