Read Khiamniungan Naga 1 Nokpao 22 Bible Online

1 Nokpao 22 - Khiamniungan Naga bible

1 Nokpao 22

¹Israel naiuso Siria ne jetko pon nime nokmei noiküla,

²lüko sampon nouko Yihudahai Nok- pao Jehoshafat, Israelhai Nokpao Ahab ko pheteau khu.

³Nokpao Ahabüh apa asonghoiso tü sangkü ngiom, “Siriahai Nokpao ainou Gilead nai noitsün Ramot laokü epshiau samüh tiauta tso tsak tsüchhiji? Nung sam ün noin!”

⁴Naiuso Ahabüh Jehoshafat tü sangkü ngiom, “Ramot komao ni ngüko khuha-emo?” “Ni tilai khu-e, ngo khemlokü noin,” ta Jehoshafatüh thalakü ngiom, “naiuso nungti jü süpaiso naiuso mokthso chiai noitsün ehli süpai nouso khemlokü noin.

⁵Lüko chongting nai samüh APAOU tü sangluko.”

⁶Nungtiphe Ahabüh e-po nouso tsom püle thatso jonküta sangkü ngiom, “Ngo khukü Ramot akom ta süne lakom?” Ngüsoüh “nung lükom” “APAOU nou nihau ashiolotsün kiu-e ta thala.”

⁷Lüko Jehoshafatüh sangkü ngiom, “Samüh APAOU tü sangluao loüh nungai e-po tsak tsünoi süne?”

⁸Ahabüh thalakü ngiom, “Imla thso Mikaia ta niankü loüh nungai tsak noishin. Lüko ngo apa chinyanji, tiautenai apaüh tilaitso jü thaiutha khapiam amei tsükiuji; nungai asaita tsümeikülu noiji.” “Ni nungtito tsüngioau noin!” ta Jehoshafatüh thala.

⁹Nungai Ahabüh apa mikhem noikham nai noitsün asong tsaktü jon naiuso apatü khukü shakta Mikaia nialokü ashi ta ngiom.

¹⁰Nung nokpao nime, Israel nokpao naiuso Yihuda nokpao Jeho- shafat neüh nokpao shitho thokü Samaria bekhan ai naptsün kengpun nai momo nokpao noikham ko moknoi, naiuso e-po nouso apemüh ngüne khako khapiam ngio chitekü noiküla.

¹¹Ngüso ongko tsak Kenaan thso Zedekiaüh son jangong shan küta Ahab tü ngiom, “APAOU nou nungti ngioji: ‘Nungüh ni Siria haiko ehli li-e naiuso ngüso shilepkü lomo-e.’”

¹²E-po amao nousoüh lüko apemüh nung tsaklu ngiokü noiküla. “Ngüsoüh ngiom, Ramot thako ehli lükhu naiuso ni ashiolotsün ep-e.” “APAOU nou ni hau ashiolotsün kiu-e.”

¹³Nungai asong tsak, sau Mikaia nialo au khu, apaüh ngiom, “Amao e-pohoi nou nokpao thaiutha ashio eptsün khapiam ngio ngiokiu, naiuso ni lüko nunglilu chhi nai mei-e.”

¹⁴Lüko Mikaiaüh thalakü ngiom, “Aa noitsün APAOU nianko apaüh ngü tü ti lüngio ta ngioji ngo nung ngioau thaloji!”

¹⁵Tilai apa Ahab Nokpao khako shin, nokpao nou apa tü sangkü ngiom, “Mikaia, Nokpao Jehoshafat jeüh khukü Ramot akom süne lakom?” “Lükom!” ta Mikaiaüh thala. “Ni lu shioau noin. APAOU nou ni hau ashiolotsün kiu-e.”

¹⁶Lüko Ahabüh thalakü ngiom, “Tilai ni ngüko APAOU nianko chiteji, ngiotsüo nou achite! Ngo nung nihau titsojam achiteta?”

¹⁷Mikaiaüh thalakü ngiom, “Ngo Israelhai süpaihoi onnemok jimtsün tsühakü onnemokhoi king nouso ai pengpunkü noitsünli epji. Naiuso APAOU nou ngiom, ‘Nung khaiuniahoi nouso ahei tsünoi; ngüso aalokü tsamai lükhu-i.’”

¹⁸Ahabüh Jehoshafat tü ngiom, “Apaüh jü thaiutha tilaitso khapiam ngio amei tsüngioji ta ngo ni tü tsüngio süne? Nung asaita tsotsak to tsümeikülu noiji!”

¹⁹Mikaiaüh tsülaokü ngioji, “Lo APAOU nou ti ngioji nungtü anglu! Ngo APAOU nou aün nai apa honghoi nouso apa lemkü tsakü, apa nokpao noikham nai moknoikü epm.

²⁰APAOU nou sangkü ngiom, ‘Ramot nai khukü ta apa loatkü wanau sauüh Ahab kausaiate?’ Honghoi nouso ajantsoüh tsak naiuso amao ajantsoüh tsak ta ngiom;

²¹onthso tsaküh khaai APAOU dongai shimkü shiküta, ‘Ngo apa kausaiate,’ ta mongiokün lektso nungti noiküla.

²²‘Titi thekü?’ ta APAOU nou ngiom. Onthso nou thalakü ngiom, ‘Ngo khukü Ahab ün e-pohoi apem hau yaang ngio chite-i-e.’ APAOU nou ngiom, ‘Lükhu küta apa lükausaiat. Ni ashiolotsün eppe.’”

²³Nai Mikaiaüh philokü ngiom, “Nungti athawaotsün noiküla. APAOU nou nung ni nou e-po nouso hau nitü yaang ngio ngio-in. Lüko apa pemüh ni aküothe nou waohe-e ta ngiowaniu!”

²⁴Nungaih e-po Zedekia Mikaia dongai sungkü apa kha ai pat, küta sangkü ngiom, “APAOU onthso ngü wankü tilai khuküta ni tü chiten?”

²⁵Mikaiaüh thalakü ngiom, “Ni tilai phiai apamluau tsampai ajantso ai shinape ni nung epsan-e.”

²⁶Mikaiaüh Nokpao Ahabüh apa asonghoi tsak tü ngiokhem kiukü ngiom, “Mikaia lükelo naiuso apa Amon dongai nialokü lükhu, apa nung noknio nai nokshingpaou noin. Naiuso Joas nokpao dongai kankü lükhu.

²⁷Ngüso hau apa ake tsamai luwan-i naiuso ngo meikü laokü moshikün lektso themtsai naiuso khiam noulu lütsad.”

²⁸Mikaiaüh wekü ngiom, “Ni meikü laolokü shinaito,” “nungai to APAOU nou ngü tsangkü tsüchite!” Naiuso apaüh ngioshin, “Khaiunia pungkü nou ngü ti ngioau noin nungtü anglu!”

²⁹Nungaih Israelhai Nokpao Ahab naiuso Yihudahai Nokpao Jehoshafat ne Gilead nai noitsün Ramot noknio komao khu.

³⁰Ahabüh Jehoshafat tü ngiom, “Sam ehlithang nai khunai, ngo jüpem nung amaohai tsakli shane, lüko nito anokpao shitho nouso thokü athe.” Nungtiphe Israelhai nokpao ehlithang nai amaohai tsali shanlokü nap.

³¹Siriahai nokpaoüh apa ün mokthso süpaihoi aosamkü nime nou niakeitsünso to tsaktso laloat lüko Israelhai nokpaolu lüloat ta ngio- khem kiukü noiküla.

³²Nungtiphe tilai ngüsoüh Nokpao Jehoshafat ep, ngüso apemüh apa Israelhai nokpao ta yangkü ngüso apa loatau sahkü shin. Lüko tilai apaüh wekü ngiom,

³³ngüsoüh apa Israelhai nokpao tsüde ta ilaküta apatü komtsün laowan.

³⁴Tsüngeankü, Siriahai süpai tsaküh Uokopchon tsak kopnai nung chon nou Nokpao Ahab tü chekjei nouko pep. “Ngü tawaianiu!” “Laplokü ehlithang ainou asoian!” ta apa mokthso niatsün tü ngiom.

³⁵Ehli nou thsüokü iula, Nokpao Ahab apa mokthso chiai noikü Siriahai tü kha sheilut. Apatü tawaitsün müo ainou she tsangkü saom naiuso mokthso tsamkei athun saokü she nou tsangpokkü apa ean.

³⁶Ajenap shimkü Israelhai apem dongai nung ngiongem pungpeng: “khaiunia pungkü momo shing- khannio naiuso noknio ai laokü lükhu ta ngiom!”

³⁷Nungti Nokpao Ahab ean. Apa mea Samaria ai kankü khukü khanan.

³⁸Apa ün mokthso tsamkei nouso Samariahai temkhao ai tsaowan, nungko jii nousoüh apa she sheluttsün naiuso ajisiwoptsünsoüh nungko pengan, nung APAOU nou ngiotsünli thawaokü noküla.

³⁹Nokpao Ahabüh chhisiyatsün alum, apa meshen tsam shenpok hüo nou alengyamlutkü taiutsün thaiu- tha, naiuso apaüh shantsün noknio nouso apem Israelhai Nokpaohoi Ngiolat Thsam nai satkü taim.

⁴⁰Apa ean taoko apa thso Ahaziaüh apa nokpao noikham lilo.

⁴¹Israelhai Nokpao Ahab nok- shing pon püle nouko nai, Asa thso Jehoshafat Yihudahai nokpao tsalo,

⁴²apa nung taoko achetpon aosamkü pungo noiküla, naiuso apaüh Yirusa- lam nai pon kheikü pungo nok-shing. Apa nyiu Shilhi thso menyiuthso Azuba noiküla.

⁴³Apa khako apa po Asa khekkü, apaüh APAOU khako ti thakü noin nung chhin, lüko tsünge- künsoüh amkhamtsün amkham- thang nouso tsülotheankü taiu naiuso khaiuniahoi nou nung athang nousoko angan nyamtsün jahkü aloat chaithio nouso tsülaokü kium.

⁴⁴Jehoshafatüh Israelhai nokpaoko nokmei shan.

⁴⁵Jehoshafatüh chhisiyatsün alum, apa mongnyankü ehlitsün apem, Yihudahai Nokpaohoi Ngiolat Thsam nai satkü taiu.

⁴⁶Apa po Asa tao ainou losaokü poitaiukü noitsün Goa tsüngekünsoüh amkhamtsün athang nai yathsüotsün ajisiwophoi melo menyiu apem apaüh moisemkü loatkü wan.

⁴⁷Edom goumchi nai nokpao tsünoikü: nungko Yihudahai nokpao tsangkü thiotaiutsün alih tsaküh nokshingkü noiküla.

⁴⁸Nokpao Jehoshafatüh khiamnok nai tsakeitsün kheng nouso chaiou lakkeng goumchi Ofir si apa goumchi jetko tsakei au shan; lüko nungso Eziongeber nai lothekü tilaitso tsü- kishikü wanan.

⁴⁹Nungaih Israelhai Nokpao Ahaziaüh apa khaiuniasoko kheng nai kiha au ngiom, lüko Jehoshafatüh tsüthalo.

⁵⁰Jehoshafat ean küta apa David Noknio nai nokpaohoi etam ai khanan, naiuso apa thso Jehoramüh apa nokpao noikham lilo.

⁵¹Yihudahai Nokpao Jehoshafat nokshing pon chekü chinyat taoko nai, Ahab thso Ahazia, Israel nai nokpao tsalo, naiuso apaüh Samaria nai pon nime nok-shing.

⁵²Apa po Ahab hokngamtülu thaiukü, apa nyiu Jezebel, naiuso Nokpao Jeroboam sauüh Israelhai hau angei sunhe-i, ngüso chhisiyali apaüh APAOU thako angei sunlo.

⁵³Apaüh Baal tü amkhamkü yathsüokü, apa poüh chhitsünli, apaüh Israelhai Goa, APAOU nou mongmat-ikü noiküla.