Read Khiamniungan Naga 1 Nokpao 3 Bible Online

1 Nokpao 3 - Khiamniungan Naga bible

1 Nokpao 3

¹Solomonüh Ijip nokpao Faraoko haimei shan, küta apa thsoko tsamsigoh yang. Solomonüh apa tsam, Amkham Tsam, naiuso Yirusa- lem lemkü pe nouso mothakhemkün lektso apaüh nyiuhai nou David noknio nai nialokü shikü kih.

²APAOU hau amkham tsam tsak molakiukün taoko, khaiuniahoi nou amthang amomo piakü nouko chaithio nouso kiukü noiküla.

³So- lomonüh APAOU tsüojin naiuso apa po David ayamhan nouso tü hoilut, lüko apaüh lüko thainian piakü chaoatkü nungso amthang amomo nai chaithio kiukü noiküla.

⁴Ataojam apa Gibeon nai chaithio kiuau khu, tiautenai nungai amthang thatü atengting naiuso apemüh vesantsün noiküla. Ayanan taoko apaüh nung athang nouko ajahtsün chaithio tsom piakü thiokü noiküla.

⁵Nunghsoh nai APAOU nou apa mea ai tsangsheikü sungküta apa tü sangkü ngiom, “ngü ni hau ti kiu-iau mongchioji?”

⁶Solomonüh thalakü ngiom, “Nia ni yathsüotsün jüpo David hau atsüojin asong asaita hankü shin, naiuso apa niko ngiotsüo, mong- kiukü, naiuso amei-e nailu noiküla. Naiuso apa hau lonyi apa thangko nokshing nai sau noin nung thso nou kiutsün tsangkü atsüojin asong tsülaokü hankü shikü noin.

⁷O APAOU Goa, ngo thatü methsoteng naiuso titi nokshing shinge nung tsünge lüko, ni ngü hau jüpo thangko nokpao au the-in.

⁸Akhaiuniaso aveluau tsüshiovekü piakün ongko ngo nungko noin.

⁹Ngo akhaiuniaso ngiotsüo nouko amei si tsümei jetko ngekü nokshing shingau pokü noin, nungtiphe ngü hau mongthat mongsai nou akiu. Tsüdekünaito, akhaiuniaso hoi asong nou chiai nokshing au ngo titi thekü shio-e?”

¹⁰Solomonüh nung sangtsün thaiutha APAOU monglengkü noiküla,

¹¹naiuso Apaüh Solomon tü ngiom, “Apim aakihlaiu thaiutha, memei thaiutha, a-eh hoiso ean-iau thaiutha tsüdekü ngiotsüo nai nokshingau mongthat mongsai thaiutha saotsün shioko,

¹²ni titü sangkü noin nung ngo chhi-e. Nung khako tsüdekünai nungphiai lüko sauüh tsüthayapkü hau ngü ni hau mongthat mongsai naiuso angelatsün piakü kiu-e.

¹³Ni ti tsüsao nung thaiutha lüko ngü ni hau kiu-e: amaohai nokpaohoi nou taiutsün khengai ni aakih chikü nai ni jengtsaiu naiuso nianlom taiu-e.

¹⁴Naiuso apo Davidüh chhikü shitsünli ni jüngio, jü ngiokhemso, naiuso jü athoilut angio nouso angkü kankei-e tünaito, ngo ni hau aakih laiukü taiukiu-e.”

¹⁵Solomon chunge naiuso Goa nou apako mea mean nai chite-iu ta apaüh ngelakü iula. Nungaih apa Yirusalem ai khukü APAOU Athalou-e Ngiokhem Paidan khako tsaküta ajahtsün chaithio naiuso aalo chai- thio nouso APAOU hau kiu. Nungphiai apaüh apa khemko noitsün asonghoi apem hau sümai tsak waokü noiküla.

¹⁶Nyitso ajisiwop chhitsün menyiu nime Nokpao Solomon khako shikü tsan.

¹⁷Ngüne ongko tsaküh ngiom, “Asuhatkü noitsün Nokpao, nung menyiu naiuso ngo tsam tsak- kolu aikü kihji, naiuso apa nungko noikü nai ngü sam tsamai melothso tsak chetkiu.

¹⁸Jüthso chetkü ajekhaiu nenyi phiai nung menyiu nou lüko melothso tsak chetsanshi. Tsam nai amaohai tsaktso tsünoikü jepemsalu noiküla.

¹⁹Nungaih soh- tsüo nung nyiuhai nou apa methso chiai mounlutkü nung tengat-an.

²⁰Nung nyiuhai nou asoh chuküta, jüdongko saikü noitsün jüthso lowan, naiuso apa then ai kankü khuwan; küta apaüh methso eankü noitsün mea nou jü then ai taiukiu.

²¹Nungthan nyap ahom tilai ngo chuküta jüthso au nyao chepi-au khu nungai ngü nung methso nou eankü ep. Ngo nungtü thatü metsüokü thapnai nung jüthso tsüdekü noiküla.”

²²Lüko amao menyiu tsak nou, “Tsüde! Nung methso aa noinou jüthso, naiuso eankü noitsün tsak nou athso!” ta ngiom. Achong menyiu nou thalakü ngiom, “Tsüde! Nung methso eankü nou athso noin, naiuso aa nou jüthso!” Nungti ngüne nokpao khako haiu-ekü noiküla.

²³Nungaih Nokpao Solomonüh ngiom, “Aje nemtsoüh aa noitsün methso momo thso ta ngioji naiuso eankü noitsün methso nung tsaküh tsak thso, tsaküh tsak thso ta ngioji.”

²⁴Nokpao nou salaiu tsak kankü shiau hong, naiuso tilai nung kankü shin,

²⁵apaüh ngiom, “Aa noitsün methso nou nime hau ahethat küta menyiu nemtso pungkü hau ayan ayan nou lükiu.”

²⁶Nung methso nyiu atsüo nou nung methso thaiutha apa mongpem atsüojin nou meankü iula, naiuso nokpao tü ngiom, “Asuhatkü noitsün Nokpao, tsüojinyangko, nung methso nou laloat! Nung apa hau lükiuwan!” Lüko menyiu amao tsak nou ngiom, “Je sauhau lüko nung lakiu, angiotsünli nung nime hau ahethat.”

²⁷Nungaih Solomonüh ngiom, “Nung methso nou laloat! Nung methso achong nyiuhai nou hau lükiuwan-nung nyiuhai nou methso nou nyiu atsüoting nou noin.”

²⁸Tilai Israelhaiüh Solomonüh mikhemtsün lulan, ngüso apem nou apa hau asuhat thatü aukü kium, tiautenai ngüsoüh nung chhisiya tsangkü Goa nou apa hau apülai angemsingem phaphiphamong tsü- yangkü ngiojane kiuau mongthat mongsai kiuwaniu ta ngelakü iula.