Read Khiamniungan Naga 1 Nokpao 5 Bible Online

1 Nokpao 5 - Khiamniungan Naga bible

1 Nokpao 5

¹Tairhai Nokpao Hiram nung David ko asaita haimei tsak noi- küla, naiuso tilai apaüh Solomonüh apa po David nokpao lilo-iu ta lula, Solomon dongai mele si mele jetko tsakiutsün hongthon tsak hong.

²Solomonüh nung ngiongem Hiram dongai laokü kankü hongshin:

³“Jüpo Davidüh apa lemkü noitsün goumchi ehoiko tsülaokü ehlikü shin ta ni ngeji, nung tsangkü apa Goa, APAOU nou apa hau apa ehoiso thako ashiolotsün thumkü mokiukün lektso apaüh APAOU tü amkhamao amkham tsam tsak lahsanau tsüshiokü noiküla.

⁴Lüko lo APAOU jü Goaüh jü elung apemai lemkü ngü hau nokmei nou kiu-iu. Ngoko sau eh tsünoi, naiuso komheane nou ta nungko ti ahat tsünoi.

⁵APAOU nou jüpo David tü nungti thalokü taim, ‘Athso, sau ngü aphiai nokpao au shane, apaüh jü thaiutha amkham tsam tsak lahsane.’ Naiuso ngü APAOU jü Goa amkham au nung tsam nou lah-e ta thatlo-iu.

⁶Nungtiphe akhaiuniaso Cedar pai nouso sah- hong au thaiutha Lebanon ai ahongi. Jü khaiuniasoüh ngüsoko aikü chhi-e, naiuso ngo akhaiuniaso hau amai ni tititso thate nungli kiu-e. Tiautenai akhaiuniasoüh chhitsün- lito jü khaiuniasoühto pai sahhong autso tsünge ta ni meikü ngen.”

⁷Hiramüh tilai Solomon ainou ngiongem ep, apa thatü mongleng, naiuso apaüh ngiom, “APAOU lülom tititenai lonyi David hau nokpao tsak nung goumchi asong chiai nokshingau mongthat mongsai noikü methso tsak apa lilo-au kium!”

⁸Nungaih Hiramüh Solomon dongai ngiongem hongshen: “Ngo ni hongtsün ngio- ngem epiu naiuso ngo nia sangtsün chhikiuau khemlokü noin. Ngü Cedar naiuso tsonpai nouso kiuwe.

⁹Jü khaiuniasoüh paipem nouso Le- banon ainou khiamnok nai thalutkü kankü sao-e, naiuso ngo nung ke-ekü ni chosantsün athang haiukok tongtü saokü lahkü kankü sao-i-e. Nungko jü khaiuniasoüh nungso sokthame, naiuso akhaiuniasoüh nungso pao- tsang lou-e. Ni chhikiuau, jü khaiuniaso thaiutha eheshiu nihau kiu-i-au ngü mongchioji.”

¹⁰Nungtiphe Hiramüh Solomonüh pohtsünli Cedar naiuso tsonpai pem nouso apem kiu,

¹¹naiuso Solomonüh Hiram au jinyak matrik ton heng 2000 naiuso olip khiam asang- lingteng liter shen 400, 000 nou apa khaiuniaso tsadau pon pungkü kium.

¹²APAOU nou apa athalo taiukü Solomon hau mongthat mongsai nou kium. Hiram naiuso Solomon ne jetko nokmei noiküla, naiuso ngü- neüh aikü tsak si tsak jetko athalou-e mongkü shan.

¹³Nokpao Solomonüh Israel goumchi athum ainou khaiunia akonghoi ta thekü heng 30, 000 jonkam,

¹⁴naiuso nungso khako Adoniram atengau taiukiu. Apaüh nungso hoi süme heng che che 10, 000 hau thekü janthat, naiuso nungsoüh hoipungkü nou Lebanon ai alei tsak tsak wan naiuso alei nime me tsamai yanoi.

¹⁵Loüh Solomonüh kinggoh nai lung langtsün khaiunia heng 80, 000 taiu, nungko khaiunia heng 70, 000 nouso nung kanao taiu,

¹⁶naiuso khaiunia tsom aosamkü süme 3, 300 nouso nung chhisiya apem noutü thaisankü thapau taiu- kiu.

¹⁷Nokpao Solomon ngiokhem ko ngüsoüh Amkham Tsam athanya au lung asong meimeikü langsan.

¹⁸Solomon si Hiram ne chhisiya khaiuniahoi naiuso Biblo noknio ainou khaiuniahoi nou lung nouso naiuso Amkham Tsamlah au khiopun nouso khemsan.