Read Khiamniungan Naga 1 Nokpao 6 Bible Online

1 Nokpao 6 - Khiamniungan Naga bible

1 Nokpao 6

¹Israelhai Ijip goumchi ainou shikhuküta, pon tsom püle küta aopetjei nouko nai, Solomonüh Israel mele khako nokshing shingtsün pon püle nouko, ngüso alei nime sübao tü Ziv alei ta jonji, nung alei nouko apaüh Amkham Tsam lah au tsalo.

²APAOU Tsam sübao Solomonüh lah nung tsammong nai atheng meter 27, apon nai meter 9, naiuso atsok nai meter 13:5 ta noiküla.

³Anaptsün tsampai meter 4:5 aokü naiuso apon nai meter 9, asiopuo nou khako mothikü athang tsaklilu ponkü shan.(Nung Amkham Tsam kha ai mothikü jiplutshikü lahtsün thaiu- tha noi-e.)

⁴Amkham Tsam dioai nouso apaüh koukhanthso amongai song, naiuso kengchi ai hen ta losatkü shan.

⁵Kengchi dioai nouso thakü akuk nouso ai naiuso Amkham Tsamphi nai, tsampai athung süme lah, tsamthung pungkü atsok nai meter 2:2 noiküla.

⁶Tsampai pungkü asaothunting tsampai nou meter 2:2 ponkü noiküla, awem tsamthung nou meter 2:7 meter ponkü noiküla, naiuso asungthunting tsampai nai meter 3:1 apon noiküla. Uchio pungkü nai amkham tsam dioai nung akhei Uchio nou ta matchaikü noiküla tiautenai amongai kheam tsühakü tsampai nou nung dioai nou tü niolutkü hau shan.

⁷Amkham Tsam lah au nou lung nouso alangtsün nai khemsankü shanan, nungtiphe amkham tsam lahtsün taoko senkhaiuhop, Uo naiuso son jengtsaiu nouso kankeikü angem ti tsüsungi au shan.

⁸Tsampai akheiting nai naptsün tsampai nime si süme ne dongai sungtsün yam sunkü Amkham Tsam ajepekki nai shinkü shan.

⁹Nungti Nokpao Solomonüh Amkham Tsam lahtsün khemkü shin. Apaüh diothup hau kheam naiuso Cedar pai ainou khiopuo nou shan.

¹⁰Tsampai süme nouso pungkü meter 2:2 tsokkü, Amkham Tsam kengchi dioai nouso tü sheilutkü shan, naiuso nungso tü cedar kheam nousoüh jippekü shan.

¹¹APAOU nou Solomon tü ngiom,

¹²“Ni jü ngiokhem naiuso athoilut nouso apem ang naito, ngo apo David tü ti thalokü taim nung ni hau chhikiu-e.

¹³Nia shantsün nung Amkham Tsam nai ngo jü khaiunia Israelhai ongko noi-e, naiuso ngü tilaitso ngüso wankü tsükhuwan-e.”

¹⁴Nungti Solomonüh Amkham Tsam lahtsün chhisiya nouso khem.

¹⁵Uchio ainou diothup saokü tsammong nai dioai nouso cedar pai nousoüh shan, naiuso uchio nou tson pai nou shan.

¹⁶Akheiting tsampai, sübao tü Thatü AsioThang, ta jonji, nung Amkham Tsam ashei nai shan. Nung atheng nai meter 9, naiuso nung Uchio ainou diothup sung- ngoikü cedar pai nou tsampai that shan.

¹⁷Tsampai Thatü AsioThang khako noitsün nung atheng nai meter 18 noiküla.

¹⁸Cedar pai nou taopun nouso kiangkiangkü aleng- yam lolut; amongai cedar pai noulu thajeikü shan, nungüh dioai nai lung nouso epau tsüshiokü noiküla.

¹⁹Amkham Tsamphi nai APAOU ün Athalou-e Ngiokhem Paidan taiuau akheiting tsampai nou shan,

²⁰Nung akheiting tsampai nou atheng nai meter 9, apon nai meter 9, naiuso atsok nai meter 9, nungso apem ai chaiou lakkeng son nou thajeikü saijeikü noiküla, amthang nou Cedar pai nou lopokkü shan.

²¹Amkham Tsam among nou chaiou lakkeng nou nyingjei, naiuso akheiting tsampai nai naptsün yam yankü chaiou lakkeng au nou phankütaiu naiuso nung tsampai nou lüko chaiou lakkeng nou nyingjeikü noiküla.

²²Amkham Tsam tham amongai chaiou lakkeng nou nyingjei, naiuso Thatü AsioThang nai amthang nou lüko chaiou lakkeng nou nyingjei.

²³Akoi potsün thainian nouso olip pai nou shanküta nung Thatü AsioThang nai taiu, nung ne atheng nai meter 4:4le noiküla.

²⁴Nung ne nemtso atheng atham naiuso athapao tsaklu noiküla. Nung thainian pungkü tü akoi nime me, akoi tsak tsak alaiu nai meter 2:2 noiküla, nungti akoi tsakthun nou akoi tsakthun nouko nai ajete nou meter 4:4 noiküla.

²⁷Nung ne Thatü AsioThang nai tsakai tsak, tsakai tsak ta taiu, nungti nungne nemtso akoi nou pengpun nai tsampai awem nouko thanekü noi, naiuso amao akoi nime nou dioai nouso tü thankü noi.

²⁸Nung akoi potsün thainian nou chaiou lakkeng nou nyingjei kü noiküla.

²⁹Tsampai atheng naiuso akheiting nou nemtso dioai nou akoi potsün thainian sotsom naiuso mepai si taopun nouso satlutkü alengyam lolut.

³⁰Uchio nou lüko chaiuo lakkeng nou nyingjei.

³¹Olip pai nou shankü kou patkü Thatü AsioThang nai naptsün koukhan dongko taiukiu; asongthun koukhan nou komshikü shan,

³²Koukhan nouso akoi potsün thainian nou thanglutkü alengyam sotsom nouso naiuso mepai nouso naiuso taopun nouso lolutkü shan. Kou nouso, mepai nouso, akoipotsün thainian nouso chaiou lakkeng nou nyingjeikü shan.

³³Tsampai atengting nai napau kuo nou olip pai nou shankü, dioai haoson püle nouko tsak shankü noiküla.

³⁴Nungko tson- pai nou shantsün kuo nime khapsikü noiküla;

³⁵naiuso nung akoi potsün thainian sotsom nou mepai nou, naiuso taopun nouso chaiou lakkeng nou nyingjeikü thanglutkü shan.

³⁶Apaüh mikhem tsam amongai nou lung alang langkü apat süme nouko cedar pai apat tsak ta thekü shan.

³⁷Amkham Tsam athanya nou Solomon nokshing pon püle nouko alei nime, Ziv alei nouko nai tsalo.

³⁸Solomon nokshing pon chekü tsak nouko, alei petjei, Bul alei, nouko nai athattaiu nouli tongtü Amkham Tsam chhisiya nou khem. Nung Amkham Tsamlah au Solomonüh pon chinyat thekü noiküla.