Read Khiamniungan Naga 1 Nokpao 7 Bible Online

1 Nokpao 7 - Khiamniungan Naga bible

1 Nokpao 7

¹Solomonüh lüko apa tsam tsak lah, naiuso nungko pon chekü süme lokü noiküla.

²Lebanon liutsa ainou pai lokü shantsün tsampai atheng nai meter 44, apon nai meter 22, naiuso atsok nai meter 13:5 ta noiküla. Nungko kheam inghoi nou ing tsak ko kheam chekü pungongo nou ing süme hau thekü noiküla. Nung chiai satpun hau cedar satpun nouso lolutkü noiküla. Jengtsaiu taiutsün tsampai saokü diuthop nou cedar pai nou shan, nungsoüh kheam nouso tü hachukü noiküla.

⁴Dioai nime nemtso ai koukhantso ing süme lolut.

⁵Kuokhan naiuso koukhantso nouso komshikü shan, naiuso koukhantso ing süme nou sübao dioai süme nai lolut nungso tsaküh tsak tü sheilutkü shan.

⁶Kheam Tsampai nou atheng nai meter 22, naiuso apon nai meter 13:5 ta shan. Nungko kheam nouso thengchukü akhemso tsak shan.

⁷Mikhemtsün Tsampai, tiai Solo- monüh mi nouso khemkiukü noiküla, nung uchio ainou tsamkhaiu ngoikü cedar pai nou shan.

⁸Solomonüh apa kih au tsam nou mikhemtsün tsampai phiai amao tsam nouso li khekkü lahsan. Apaüh apa tsammongnyiu sau Ijip nokpao menyiuthso noiküla apa hau lüko amao tsam nouso khekkü lahkiu.

⁹Nung tsam naiuso mikhem tsam nouso apem athanya ainou tsamkhaiu athon saokü lung keikü langtsün noulu shan. Lung nouso alangtsün nai akhei si achi atheng atham thatkü nai pailinsah nou lintsünli waokü shan.

¹⁰Athanya nouso lung songkü alangtsün nai langkü khemsankü shan, lung ajantso atheng nai meter 3 ayantso naiuso amao ajantso atheng nai meter 4 ta noiküla.

¹¹Nungso apem chiai athat thattsün lung nouso, naiuso cedar satpon nouso lolutkü noiküla.

¹²Nokpao tsam nai mikhem noikham, Amkham Tsam akheiting ainou mikhem tsam naiuso akhei tsampai lemkü alangtsün lung aphan süme noiküla naiuso alangtsün lung aphan süme pungkü thaiutha cedar pai satphu aphan tsak noiküla.

¹³Nokpao Solomonüh Tair noknio nai kihtsün Huram ta niankü khaiunia tsak sau taoson langtsün nai waimon noiküla apa jonau hong.

¹⁴Apa Napthali kau ainou jihinyiu tsak thso noiküla; apa po nung taoson langtsün waimon khaiunia tsak kihkü shin. Nung taoson langtsün chhisiya nouko apahau angelatsün naiuso amontsün paopei sunkü noiküla. Apaüh taoson langtsün chhisiya apem nai paotsangau Nokpao Solomonüh sangtsün monglingkü thalou.

¹⁵Huramüh taoson nime atheng nai meter 8 naiuso akuk nai meter 5:3 ta langsan, küta nungso apaüh Amkham Tsam ai naptsün koukhan nai kihkü taiu.

¹⁶Apaüh kheam alaiu nou khaio nai taiu nou aleng yamlutkü lung nime atheng nai 2:2 meter thekü shan.

¹⁷Kheam alaiu nouso pungkü chiai taiutsün lung nouso thsa-ekü alengyam nou yamlut,

¹⁸naiuso sasashep khekkü taoson ing nime lüko shan.

¹⁹Alengyamluttsün lung nouso lakkhaiu taopon khekkü atheng nai 1:8 meter,

²⁰naiuso nungso sonkhiang alengyamli shankü nung khengai taiutsün ko taiuküla. Nungko kheamlaiu nouso lemkü ing nime hau thekü sasashep taopun nouso noiküla.

²¹Huramüh nung taoson leng kheam nime nou Amkham Tsam nai naptsün khako kihtaiu, ajepekki nai kihtaiutsün kheam nou tü Jakin ta jon, naiuso ajenapki nai kihtaiutsün kheam nou tü Boaz ta jon.

²²Lakkhaiu taopun khekkü taoson kheam nouso kheam alaiu nouso chiai taiu. Nungti kheam alaiu nouso chhisiya khemkü shin.

²³Naiuso Huramüh taoson nou kheam temkhao tsak, a-ao nai meter 2:2, awemko yalo nou athun tsak tü thalutkü nai meter 4:4, naiuso akuk nou meter 13:2 thekü shan.

²⁴Nung khiam temkhao achi akihkuk lemkü taoson leng nou shantsün paikhun tsakli nou nung lemkü khilut.

²⁵Nung khiam temkhao nou taoson nou shantsün jangpong chekü nime phiko akha nou kengchiai shei-ankü ayam pungkü nai akha süme me shei-ankü shan.

²⁶Nung khiam temkhao nou milimeter 75. teikü noiküla. Nung akikuk thengkam khekkü noiküla, achiai kiangluttsün nung lakkhaiu taopun ouli noiküla. Nung khiam temkhao nou khiam liter heng 40, 000 chomlokü noiküla.

²⁷Huramüh loüh taoson tsamkei che, nungso apem atheng nai meter 1:8, apon nai 1:8, naiuso atsok nai 1:3 meter ta shan.

²⁸Nungso satlun au haoson wekü mothikü shan,

²⁹naiuso nung mothikü akap shanluttsün tü chongkhao, jangtsopong naiuso akoi potsün thainian nouso sailut; naiuso satlun nou tü achiai naiuso akhei ai ta chongkhao naiuso jangtsopong, nungso athun tsüjipekü shiangkü shanlut.

³⁰Tsamkei apem taoson ahok pülele nou taosonpem nou ta poukü noiküla. Aniokun püle nai chiukao tsak thaiutha ahachu au taoson püle nung ahachu au thetsün taopun nou alengyamlutkü lak shankü noiküla.

³¹Chiukau thaiutha ko achiting nai athanya komkü noiküla. Naiuso nung mokthso tsamkei halai ngüsankü centimeter 45 mokthso tsamkei achi nai yalokü naiuso helai centimeter 18 noiküla.

³²Nung mokthso tsamkei hok nouso atsok nai centimeter 66; nungso kou- thong khemko noiküla, naiuso tsam- kei khaolaotsün mokthso tsamkei nou tü tsak sunkülu noiküla.

³³Ahok nouso apem ehli tsamkei hok nouso khekkü noiküla; akhaolao-itsün, akihkuk nouso, ahok nai sontso nouso ahok awem nouso taoson jije nou shankü noiküla.

³⁴Tsamkei pungkü asaothun kikuk nai ahachu- tsün püle noiküla; nungso tsamkei haoson tsak noiküla.

³⁵Tsamkei pungkü akhengting nai lemkü ao nou centimeter 22, noiküla; nungtü ha- chutsün naiuso kouthang nouso tsamkei haoson tsak noiküla.

³⁶Nung ahachutsünso naiuso kou- thang nouso tü akoi potsün thainian, chongkhao nouso, chengpai nouso, nungso thaiutha tilüsong ko athang noin, akhikhikü noitsün khekkü alengyam lolutkü noiküla.

³⁷Nungti jangtso nou kankeitsün tsamkei nou shan; nungso apem athapau atheng atham tsaklilu, wekü noiküla.

³⁸Huramüh tsamkei che pungkü thaiutha chiu che shankü noiküla. Nung chiu tsak pungkü diameter 1:8, nung liter tsom 800 thsomlokü hau shiokü noiküla.

³⁹Apaüh Amkham Tsam ajepekki nai tsamkei pungo naiuso ajenapki nai tsamkei pungo ta taiu; naiuso khiam dan nou ajepekki aniokun nai taiu.

⁴⁰Huramüh pulak, chap, naiuso chiuthso nouso lüko shan. Apaüh APAOU Amkham Tsam thaiutha ko Nokpao Solomon hau apa chhisiya apem khemkü chhikiu. Apaüh shantsün nungti noin: Kheam nime kheam nime nou khaiu ai chiutso khekkü asongthon alengyam kheam khaiu nai songau kheam alengyam kheam khaiu nai sasashep khektsün tsom püle, sübao tsom tsak tsak hau thekü athunge nime hau shan Tsamkei che nouso Chiu che nouso khiam temkhao nou khiam temkhao nou ta thengkü jangtsopong sotsom chekü nime lak, chap naiuso chiutso nouso. Huramüh Nokpao Solomon hau Amkham tsam thaiutha shankiutsün jengtsaiu apem tü taoson leng nou chukü noiküla.

⁴¹

⁴²

⁴³

⁴⁴

⁴⁵

⁴⁶Yordan Tsamei nai nokpao nou nungso Sukot si Zarethan ne jetko son chiotsün nai chiokü shan.

⁴⁷Solomonüh taoson nou shantsün jengtsaiu nouso tsoi tsüthat, tiautenai jengtsaiu nouso thatü piaphe, nungso tsüthatkü wan.

⁴⁸Solomonüh Amkham Tsam nou lüko chaiou lakkeng son nou aleng lomei: Amthang nou, Goa hau chaithio kiutsün themtsai thaiutha pou nou,

⁴⁹Thatü Asio Thang khako noitaiu au tson taiutsün che nouso, ajepekki nai pungo, naiuso ajenapki nai pungo ta noitaiu; taopun nouso tson nouso, intip kai nou;

⁵⁰theng- kam nouso, tson lonyiat au nouso, chiuthso nouso, angannyamtsün jah au chiu nouso, inkaiu jekthioau thetsün chiupun nouso; naiuso Thatü AsioThang kou nouso thaiutha naiuso kengchi Amkhamg Tsam kou- khan thaiutha koupia nouso shan. Apaüh nungso aleng lomei au nouso apem chaiou lakkeng nou shan.

⁵¹Tilai Nokpao Solomonüh Am- kham Tsam chhisiya apem khemkü shin, apaüh apa po Davidüh APAOU hau losiokü taiutsün tangkason, chaiou lakkeng, naiuso amao jengtsaiu nouso apem amkham tsamai akamtaiutsün tsampai nai taiuwan.