Read Khiamniungan Naga 1 Nokpao 8 Bible Online

1 Nokpao 8 - Khiamniungan Naga bible

1 Nokpao 8

¹Nungaih APAOU nouko Athalou-e taiutsün Ngiokhem Paidan David noknio Zion ainou lokü shiau thaiutha, Solomonüh Israelhai kau ongai aheihoi naiuso pothso nai aheihoi nouso apem Yirusalem nai jonkam.

²Ngüso apem Ethanim alei haove chinyat nouko, Asolotsün sü- mai taoko kamshikü noiküla.

³Tilai aheihoi nouso apem kamshin, mesonhoi nou Athalou-e Ngiokhem Paidan luklo

⁴küta nung Amkham Tsam nai kankü nap. Levihai naiuso mesonhoi nousoüh lüko APAOU Nejenkhio naiuso nung lahtsün jeng- tsaiu apem lokü Amkham Tsamai nap.

⁵Nungaih Nokpao Solomon naiuso Israelhai apem Athalou-e Ngiokhem Paidan khako kamshi naiuso ngüsoüh onnemok naiuso jangtso piakü loatkü chaithio kiu- nung thatü piaküphe aveau tsüshiokü noiküla.

⁶Nungaih meson- hoi nousoüh Athalou-e Ngiokhem Paidan nou Amkham Tsamai kankü napküta nung Thatü AsioThang nai akoi potsün thainian khemko taiu.

⁷Nung thainian akoi nousoüh Pai- dan naiuso apiki-au a-ang potsünso sojeikü noiküla.

⁸Apikeitsün pai nou Thatü AsioThang nai noinai sauüh lünou epau shiokü noiküla; lüko amao aito tiaitso epau tsüshio. (Nung apikeitsün pai nou lonyi saokü nungko noin)

⁹Israelhai Ijip ainou yashitsün tao, APAOU nou ngüsoko thalou-etsün ngiokhem sattsün lung- khio nime sübao Sinai King ainai Mosa hau kiu nung thiotaiutsün tü simkü nung Paidan nai titso thiokü tsünoiküla.

¹⁰Meson nouso Amkham Tsam ainou tsalokü khutsün taoko, alekta nung athang nou thengmiakhao nou meankü

¹¹APAOU hatsün nou nung awon naiuso oukü jetsün noiküla, naiuso ngüso laokü khuküta ngüso chhisiya nouso chhiau tsüshiokü noiküla.

¹²Nungaih Solomonüh misao loum: “APAOU, ni aje nou maou nai taiukiu, lüko ni thengmia naiuso anyakhem nouso ongai kih ao choloum.

¹³Lo ngü athaiutha hau amkham tsam tsak meikü lahsaniu, nung athang nou athaiutha athontsüyangkü kih au nou noin.”

¹⁴Khaiuniahoi nou nungko tsanoi taoko, Nokpao Solomon apa kha ngüso dongai sheilutkü phokle naiuso apaüh ngüso thaiutha Goa ouk sangkiu.

¹⁵Apaüh ngiom, “Israel Goa APAOU nian lülomsan! Apaüh jüpo David tü thaloutaiutsün kan- kei-iu, tilai apaüh ngiom,

¹⁶‘Ngo jü khaiuniaso Ijip goumchi ainou nia- santsün tao ainou, ngü tü amkhamau Amkham Tsam tsak Israel nai lah au amao noknio titso tsüchosan. Lüko jü khaiuniaso sangkih au David, Ngü ni chosan.’”

¹⁷Solomonüh tsülaokü ngiom, “Israel Goa, APAOU amkham au thaiutha amkham tsam tsak lah au jüpo David ayangtaiu tsak noiküla;

¹⁸lüko APAOU nou apa tü ngiom, ‘Jü thaiutha amkham tsam tsak lah kiuau mongchiotsün nai ni ayam thakü noiküla;

¹⁹lüko ni nung tilaitso tsülah-e. Nung athsoting nou, jü amkham tsam nou lah-au noin.’

²⁰“Naiuso APAOU nou athaloutaiu- tsünli apa ngio mongkü taiu. Ngü Israel nokpao theau jüpo lilokü noin, naiuso ngü Israel Goa APAOU amkham au thaiutha nung Amkham Tsam nou lahsan-iu.

²¹Naiuso ngü nungko Athalou-e Ngiokhem Paidan sübao lungkhio nouso tü athalou- etsün satlutkü taim, nung APAOU nou jüpaosiposo tü apaüh ngüso Ijip goumchi ainou niasantsün taoko thalokü noiküla, nung Athalou-e Ngiokhem Paidan thaiutha Amkham Tsam nai athang tsak shankü taim.”

²²Nungaih Solomon khaiuniahoi khako khukü apaüh apa pha loksankü amthang khako tsaküta misaoloum,

²³“APAOU Israel Goa, nungko aün khengai tsüdekünai goum kheiai ni khekkü ti goa tsünoi! Ni akhaiuniasoko ni nou athalou-e tsülaokü taiuji naiuso tilai ngüso niko mong athum kiukü angio angkü noiküla ni ngüso hau atsüojin han.

²⁴Ni jüpo David tü thaloutaiutsün taim, lonyi nung ngio nouso alum shithawaokü noin.

²⁵Naiuso lo, APAOU Israel Goa, ni jüpo tü tilai apa thsaosithsoso ongko tsaküh to asaita Israel nai nokshinge ta thaloukü taiutsün lüko ni nung athalo nouso taiu-e ta ngo misaoji, ngüsoühlu apaüh chhikü shitsünli ngio nouso thatü paotsangkü angkü thenaito.

²⁶Nungtiphe lo, O Israel Goa, ni yathsüotsün jüpo David tü ni thaloutaiutsün alum athawao-i.

²⁷“Lüko O Goa, ni atsüoting goumchi nai kih-au shio-e süne? Aün nouso apem nou ni noiau tsüchom- taiukü nai ngo lahtsün Amkham Tsam nou ni titi chomtaiu-e?

²⁸APAOU Jü Goa, ngo ni yathsüotsün noin. Jü misao tü anglu, naiuso ngo lonyi nitü kojatsün achhikiu.

²⁹Nung athang ni amkham-iau ni chosantsün tü anyi naiuso asoh tao nung Amkham Tsam khako jiokü anoi. Tilai ngo nung Amkham Tsam nouko misao-e jü misao alula.

³⁰Tilai akhaiuniaso naiuso ngü nung Amkham Tsamthang nai shiküta misao lou-e sam misao alula. Aün nai atsam ainou sam misao lulakü sam hau awan akiu.

³¹“Tilai khaiunia tsak amaohai tsak tü mi lolutkü nung Amkham Tsam ai ni nou amthang nai apa aphio tsülepta ngiomongshinge shanau kankü shi-e,

³²O APAOU, aün nai anglu naiuso ni yathsüotsünso mi akhemkiu. Aphio noitsün tsak nou apa chhi mai angja lükiu, naiuso aphio tsülepkün tsak nou apenkiu.

³³“Tilai Israelhai khaiuniaüh athako ngüsoüh angei sunlotsün shioko ngüso ehoisoüh shiolowane, nungaih tilai ngüso adongai phokle- kü awankiu thaiutha nitü nyaplokü misaokü nung Amkham Tsam nai shi-e,

³⁴aün ainou ngüso tü anglu. Akhaiuniaso angei awankiu, naiuso sübao ni ngüso paosiposo tü thaloukü taim ngüso nung goumchi nai laokü nialokü ashi.

³⁵“Akhaiuniasoüh athako angei sunlotsün shioko tilai ni ah-ou nou lolaukü wane, naiuso tilai ngüso nyaplokü shikü nitü misaokü nung Amkham Tsam nai mongphokle-e,

³⁶aün ainou ngüso tü anglu. Nokpao nou sunlotsün angei naiuso Israel haiüh sunlotsün angei nouso awan- kiu. Ti ayam thakü noin nung chhiau ngüso hau atsande. Nungaih APAOU, sübao ni akhaiuniaso hau asaita teng- kam theau thaiutha kiutaim nung ni nou agoumchi khako ah-uo nou ahong.

³⁷“Tilai nung goumchi nai naiusile, imkia, tsüdekünai ahsheih tsangkü chih nou lothean-e, tsüdekünai jongkuhoi nou he-ane, akhaiuniaso ngüso ehoi tsangkü kome, akiasiya tsak shi-e, tsüdekünai ngüso ongko pemkia noi-e,

³⁸ngüso misao tü anglu. Akhaiunia Israelhai ajantsoüh ngüso mongsaiukü nung Amkham Tsam nouko ngüso pha loksankü misao nai,

³⁹ngüso misao athala. Atsam aün ainou ngüsotü anglu, ngüso hau awankiu, naiuso ngüso tü ahachu. Ni lu khaiuniale mongpem ainou mongyang ngeji. Khaiunia pungkü tü apaüh maitsünli lükankei;

⁴⁰nungaito tisübao ni sam paosiposo hau kiutaim nung goumchi nai ngüso kihtsün atao chikü akhaiuniasoüh ni tü angio ang-e.

⁴¹“Tilai goumchi laiukü nai kihtsün gohmao khaiunia tsaküh aniansong nou lula-e, naiuso ni akhaiuniaso thaiutha chhisiya asong chhitsün lulaküta, shikü nung Amkham Tsam nai nitü misaokü amkham kiu-e,

⁴²

⁴³apa misao tü a-anglu. Ni kihtsün aün nai, apa tü thalakü apaüh ni tü ti chhi-iau sangji nung achhikiu, nungaito akhaiunia Israel haiüh chhitsünli goumchi khaiunia apem nou ni nge-e naiuso angio ang-e. Nungaih nung Amkham Tsam ngo lahkü taiutsün ni hau amkham kiu au nou athang noin ta ngüsoüh nge-e.

⁴⁴“Tilai ni akhaiuniaso tü ngüso ehoiso thako li-e au ehlithang nai lükhu ta thoilutkü, ngüsoüh nitü misao-e, ngüso tiai noilünou, ni chosantsün nung noknio naiuso ngo lahtsün Amkham Tsam tü sheilutkü mi saonaito,

⁴⁵ngüso misao athala. Aün ainou ngüso tü thalakü ta, ngüso hau ashiolotsün akiu.

⁴⁶“Tilai akhaiuniasoüh athako angei sunhe-e naiuso nungko angei tsüsunhekü sautso tsünoi, - naiuso ni amongmat sungkü ngüso ehoi hau ngüso shiolowaniküta ngüso amao goumchi tsakai sua au kankü khuwan, nungh goumchi to thatü laiukü khukü noilüko,

⁴⁷akhaiuniaso misao tü athala. Ngüso nungh goumchi ai noitao mong phoklekü nitü misao naito, ngüso titi akausai naiuso angei noiküla ta pheksankü ngio naito, Oh APAOU ngüso misao athala.

⁴⁸Ngüso nungh goumchi nai ngiotsüo nai naiuso akausai tsünoikü mongphokle naito, naiuso ngüsoüh ni sam paosiposo hau kiutaiutsün nung goumchi tü sheilutkü misao naito, ngo chosantsün nung noknio naiuso athaiutha ngo lahtsün amkham Tsam tü sheilutkü misao naito,

⁴⁹nungaih ngüso misao tü athala. Aün nokai atsamai ngüso tü anglu küta ngüso tü atsüojinyang anoi.

⁵⁰Ngüso angei naiuso ni thako khengshitsün apem awankiu, naiuso ngüso ehoisoüh ngüso tü atsüojin- yang han-e.

⁵¹Ngüso ni Ijip goumchi angja omhe ainou niasantsün atengkam khaiuniahoiso noin.

⁵²“Akhengting APAOU, ni akhaiunia Israelhai naiuso ngüso nokpao tü asaita atsüojinyang nai athap, naiuso tilai ngüsoüh nitü ahachu thaiutha we-e nungaih ngüso misao athala.

⁵³Tilai ni sam paosiposo Ijip goumchi ainou niasan ni ngüso apem atengkam khaiuniahoi theao ngüso chosan ta ni yathsüotsün Mosa tsangkü ngüso hau nge-in.”

⁵⁴Solomonüh APAOU tü singkau- ngam langthiokü misaotsün khem- küta pha loksankü amthang khako tsakü noiküla.

⁵⁵Amkamshihoi apem thaiutha Goa ouk sangkü sang asong nou kojakü, Apaüh ngiom,

⁵⁶“Apaüh thalouküshitsünli apa khaiuniaso hau aalu kiutsün thaiutha APAOU lülom. Apaüh amongchio athalou nouso apa yathsüotsün Mosa tsangkü apem chhikü noin.

⁵⁷Apa sam paosiposoko hakü shitsünli, APAOU sam Goa samko anoi; apaüh sam tilaitso tsüle-ane tsüdekünai tsüwane;

⁵⁸apaüh sam apa ko angio angkü anoi-i, nungaito sam apaüh yangtsün nai asaita kih-au shio-e, naiuso apaüh sam paosiposo hau kiutsün ngiokhem naiuso athoilut nouso apem kankei-au shio-e.

⁵⁹Ngü apatü sangtsünso misao naiuso akoja nouso sam Goa APAOU nou atao chikünai tsüpe-ankü ataiukiu. Israelhai naiuso ngüso nokpao tü ngüsoüh atao pungkü nai pohtsün likü asaita atsüojinyang anoi.

⁶⁰Nungaih goumchi mele apem nou APAOU noulu Goa ta nge-e.

⁶¹Asam apa khaiuniaso, lonyi asamüh chhikü shitsünli, apa ngiokhem naiuso athoilut nouso apem angio angkü asaita APAOU sam Goa tü mongkiukü lünoi.”

⁶²Nungaih Nokpao Solomon naiuso nungko noitsün khaiunia chikü nou APAOU hau aloat chaithio kiu.

⁶³Apaüh jangtso heng 22, 000 chaithio kiu, naiuso onnemok shen tsak heng khei 120, 000 nou aalo chaithio kiu. Nungti nokpao naiuso khaiuniahoi nou Amkham Tsam losiokü noiküla.

⁶⁴Nung ajekhaiu kolu apaüh mikhemke awem sübao amkham tsam khako noiküla nung lüko losio, naiuso nungthanko apaüh apem jahkü chaithio, eheshiu chai- thio, naiuso aalo chaithio thaiutha thainian atsah nouso kiu. Tiautenai nung chaithio nouso chikü thaiutha taoson amthang nou thatü hen nou shioko apaüh nung chhin.

⁶⁵Nungh Amkham Tsam nai, Solomon naiuso Israelhai chikü nou Asolotsün Sümai ajekhaiu chinyat- nyi saohekü noiküla. Nungko Hamat Aoyan ajenapki ainou Ijiphai elung ajepekki saokü ainou khaiuniahoi apiating kamshin.

⁶⁶Petjeinyi nouko Solomonüh khaiuniahoi nouso momo tsamai hongan. APAOU nou apa yathsüotsün David naiuso Israelhai chikü hau nung chikü oukkiu nou shioko ngüso apemüh apahau nianlom kiukü momo tsamai monglengkü laokü khuwan.