Read Khiamniungan Naga 1 Nokpao 9 Bible Online

1 Nokpao 9 - Khiamniungan Naga bible

1 Nokpao 9

¹Nokpao Solomonüh Amkham Tsam, nokpao tsam, naiuso amao tsam apaüh lahtsün chhisiya apem khemküta,

²APAOU apa dongai Gibeon nai atsangshei sungtsünli loüh jam atsangshei sungshin.

³APAOU nou apa tü ngiom, “Ngo amisao lula-iu. Ngü hau asaita athontsüyangkü amkham kiuau ni lahsantsün Amkham Tsam naiuso nung athang nou ngo losiokiuji. Atao chikü ngo nung khüthako jiokü noi-e naiuso sojeikü taiu-e.

⁴Apo David tsakeitsünli ni jükhako asio nai ngiotsüo mongpem nou tsakeikü, ngo nitü thoiluttsünli chhisiyakü, jü ngiokhem nouso naiuso jü athoilut nouso kankeinaito,

⁵ngo apo David tü athsaosithsoso tsangkü Israel nai asaita nokshing shinge ta chitekü athalou-e shantaiutsün taiu-e.

⁶Lüko ni naiuso athsaosithsosoüh ngütü hoiluttsün laowankü nihau kiutsün ngiokhem naiuso athoilut nouso angio tsüangkü, amao goa nouso amkham naito,

⁷ngo ngüso hau kiutaiutsün goumchi ainou jü khaiunia Israelhai wanane. Ngü hau amkham kiuau tisübao athang ngo losiokü taim, nung Amkham Tsam lüko le-ane. Khaiunia chikü nou Israel lochi-e naiuso tsüvesankü kankei-e.

⁸Nung Amkham Tsam beisikin au iula-e, naiuso nung yan- lükhuntsün khaiunia apem lekkatkü ngawane. ‘Nung goumchi naiuso nung Amkham Tsam tü APAOU nou tiauta nungti chhin?’ ta ngüsoüh sange.

⁹Nungaih khaiuniahoi nousoüh, ‘Ngüsoüh APAOU ngüso Goa, sauüh ngüso paosiposo Ijip ainou niasan nung leantsün shioko noin ta thala-e. Ngüsoüh amao goa nouso da mongkiuwankü nungso tü amkham. Nungshioko APAOU nou nung asapat ngüso khako kankü shikiu.’”

¹⁰Solomonüh Amkham Tsam naiuso nokpao tsam lah-au pon khei thekü noiküla.

¹¹Tairhai Nokpao Hiramüh nung Amkham Tsam chhi- siya thaiutha apaüh mongchiotsün chaiou lakkeng, naiuso Cedar si tson- pai nouso apem kiu. Nung chhisiya khemkü phiai, Nokpao Solomonüh Galil khiamkhan ai noitsün noksong khei Hiram hau kiu.

¹²Hiram nung- tü thapau khu, lüko apaüh nungso tsümongchio.

¹³Nungtiphe apaüh Solomon tü ngiom, “Jü deisinio, nung noksong nouso ni ngü hau kiu- wanjiso!” Nungshioko nung athang nou tü losaokü Kabul ta jonji.

¹⁴Naiuso Hiramüh Solomon hau chaiou lakkeng tsoi heng 4, 000 khengai kiukü noiküla.

¹⁵Nokpao Solomonüh Amkham Tsam, Nokpao tsam, naiuso noknio tü ajepek nai goh lomean-au, naiuso noknio lemkü pe pe-au mephaiu kongkü lolutkü kankei. Loüh apaüh Hazor noknio, Megido noknio, naiuso Gezer noknio nouso shanshi-au lüko mephaiu kongkü lolutkü kankei.

¹⁶(Ijip nokpao nou nung Gezer noknio kom küta thalowan, naiuso apaüh nung noknio nai kihtsün khaiunia apem loat küta noknio tü in jeklut. Nungaih apa menyiuthso So- lomon ko tsamsigoh yangtsün taoko nung noknio tsamsigoh shantsün nianko paopei kiuwan,

¹⁷naiuso nung noknio Solomonüh müjam shanshin.) Apaüh loüh mephaiu kongkü lolutkü Asaothun Bet Horon nou shanshin,

¹⁸Baalat, Tamar, Yihuda goumchi liutsa nai noitsün,

¹⁹apa eheshiu kamtaiutsün noknio nouso, apa mokthso si tsamei nouso thaiutha eheshiu kamtaiutsün noknio nouso, naiuso Yirusalem nai, Lebanon nai, naiuso apa nokshing mongko tilüsong ailünou apaüh mongchiotsün alum apaüh shanshin.

²⁰Solomonüh apa chhisiya au mephaiu kongkü kankeitsün Israelhaiüh ngüso goumchi thaloutsün taoko tsüloatkü taiutsün nungso Kanan thsaosithsoso noiküla. Nungko monglohakü noitsünso: Amorhai, Hithai, Perizhai, Hivhai, naiuso Jebushai sauhai lonyi saokü sua aküo nai noin.

²²Solomonüh Israelhaito sua au tsüshan; lüko ngüsoüh apa khemko ayathsüotsün ayam amomo nai yathsüo: ngüso ajantso apa süpai au, asonghoi au, süpai ahei au, tsamkei yamai ahei au, naiuso mokthso niakei-au ta noiküla.

²³Nungko Solomon ün chhisiya amomo nai chhitsün akonghoi nouso khako paotsangau asonghoi haove 550 taiuküla.

²⁴Solomonüh noknio tü ajepek nai noitsün goh nou lomeankü phiai apa tsammongnyiu, Ijip Nokpao Farao menyiuthso nou David noknio ainou Solomonüh apa thaiutha lah- kiutsün Nokpao tsam nai shikü kih.

²⁵Solomonüh APAOU thaiutha lah- santsün amthang nai APAOU nou hau pon tsak mongko ajahtsün chaithio naiuso aalo chaithio nouso atao samjam kiukü noiküla. Apaüh loüh APAOU hau angan nyamtsün lüko jahkü noiküla. Nungti apaüh Amkham Tsam lahtsün chhisiya khemlokü shin.

²⁶Edom goumchi, Agaba Aoyan haiusai nai, nung sübao Elat shimkü noin nungko Nokpao Solomonüh Eziongeber nai atsopkeitsün kheng nouso lüko shankü noiküla.

²⁷Nok- pao Hiramüh apa hoi ainou sauhaiüh khiam ai kei-au ngekü monkü noiküla nungso ajantso Solomon hoi ongko yathsüo au hong.

²⁸Ngüso Ofir goumchi ai sheilokü shin, naiuso Solomon hau chaiou lakkeng tsoi heng 14, 000 khengai kankü shikiu.