Read Khiamniungan Naga 2 Nokpao 1 Bible Online

2 Nokpao 1 - Khiamniungan Naga bible

2 Nokpao 1

¹Israel Nokpao Ahab ean küta, Moab hai goumchiüh Israelhai tü khengshikü tsalo.

²Israelhai Nokpao Ahazia Samaria nai apa nokpao tsamkhaiu ainou salikü thatü thsüokü tawaikü noi- küla. Nungtiphe apaüh atawai ainou mei-e süne tsümeishi-e ta ngeau Fi- listiahai Ekron noknio goa Baalzebub tü sangluau ngiongem kantsünso ajantso hong.

³Lüko APAOU ün hong tsaküh Tisbe ainou e-po Elija, tü Nokpao Ahaziaüh hongtsün ngio- ngem kantsünso ko khukü lüphete naiuso ngüso tü ngio sangau thoi- lutkü ngiom, “Asam Ekronhai goa Baalzebub tü sangluau tiauta khuji? Nung Israel nai goa tsünoi ta yang nou shioko süne?

⁴Nokpao hau APAOU nou ngioji ta lüchite, ‘Atawaitsün ainou ni tsümeila-e; ni ean-e!’” Elijaüh APAOU nou thoiluttsünli chhin,

⁵naiuso ngiongem kantsünso nokpao dongai laokü shin. “Asam tiauta laokü shishiji?” ta apaüh sang.

⁶Ngüsoüh thalakü ngiom, “Sam khaiunia tsakko phetekü apaüh samtü laokü khuküta APAOU nou nitü ngiotsün nihau lüchite ta ngiom. ‘Ekron hai goa, Baalzebub tü sangluau ni tiauta ngiongem kantsünso hongji? Nung Israel nai Goa tsünoi ta ni yangtsün shioko süne? Atawaitsün ainou ni tsümeila-e; ni ean-e!’”

⁷“Nung khaiunia nou athapau ti khekkü noiküla?” ta nokpao nou sangshin.

⁸Ngüsoüh thalan, “Apaüh thai- nian khun nou shantsün phalaiu phakhut nou nyikhun omkhi nou shingjeikü thokü noiküla.” “Nung Elija noin!” ta nokpao nou lekkatkü ngiom.

⁹Nungai nokpao nou apa khemko nouso asonghoi tsak Elija nialoau apako khaiunia aopungo hakü hong. Nung asonghai nou Elija king tsak ai moknoikü eploküta apatü ngiom, “Goa khaiunia, Nokpao nou nitü asao ta ngioji.”

¹⁰Elijaüh thalakü ngiom, “Ngo Goa khaiunia tsak naito,” “aün ainou in saokü ni naiuso akhaiuniaso chetthe-e!” Alekta aün ainou in saom naiuso nung asonghai nou naiuso apako hakü noitsün khaiunia jekkatan.

¹¹Nokpao nou loüh asonghai tsak apako aopungo hakü hongshin, ngüso king nai sunghkü Elija tü ngiom, “Goa khaiunia, nokpao nou ni jam asao ta ngioji!”

¹²Elijaüh thalakü ngiom, “Ngü Goa khaiunia tsak naito” “aün ainou in saokü ni naiuso akhaiuniaso jekkate!” Alekta Goa ainou in saom naiuso asonghoi nou naiuso apa khaiuniaso jekkat.

¹³Loüh jam nokpao nou asonghai tsak apako khaiunia aopungo hakü hongshin. Asonghai nou king nai sungkü Elija khako singkau lang- thiokü kauthio, naiuso kojakü sangkü ngiom, “Goa khaiunia, ngo naiuso jü khaiuniaso tü atsüojinyang anoi. Sam aa nou apoikiu!

¹⁴Asong- hai nime naiuso ngüneko hakü khaiuniahoi nouso aün ainou in tsangkü jekkatan; lüko tsüojinyangkü ngo tü atsüojinyang anoi!”

¹⁵APAOU hong nou Elija tü ngiom, “Apako hakü lüsaoha, niuso hatkü lanoi.” Nungtiphe Elija nung asonghai nouko hakü nokpao dongai khukü

¹⁶apatü ngiom, “APAOU nou nungti ngioji; ‘Tiautenai ni Israel nai asang- luao goa tsünoili-Ekronhai goa Baalzebub tü sangluao ngiongem kantsünso hongphe, ni tsümeishi-e, ni eane!’”

¹⁷APAOU nou Elija tsangkü ngiotsünli, Ahazia ean. Ahazia ün melothso tsünoiküla, nungtiphe apa dei Joramüh apa nokpao noikham lilo, nung Yihudahai nokpao, Jehoshafat thso Jehoram nokshing pon nime nouko noiküla.

¹⁸Nokpao Ahaziaüh chhisiyatsün alum Israelhai Nokpaohoi Thsam nai satkü taim.