Read Khiamniungan Naga 2 Nokpao 10 Bible Online

2 Nokpao 10 - Khiamniungan Naga bible

2 Nokpao 10

¹Nungai Nokpao Ahab thsaosithsoso Samaria noknio nai aochinyat kihkü noiküla. Jehuüh thsamsat tsak satküta nung noknio nai nokpao nouso hau, mele nai paopung petche nouso hau, naiuso Ahab thsaosithsoso paotsangtsünso dongai hongpengkü noiküla. Thsam- sat nouko nungti sat:

²“Asam nokpao ün thsaosithsoso tü paotsangtsünhoi noin. Naiuso asam oukong ai ehli tsamkei nouso, mokthso nouso ehli jengtsaiu nouso, naiuso pe nou lemkü pejeikü taiutsün noknio nousotü paotsangau noin. Nungtiphe, asamüh nung thsamsat epkü thunkü,

³nokpao ün thsaosithsoso ongko mai- kü noitsün ameiting tsak chosanau noin, küta apa nokpaoau lüshan, naiuso apa kiploau ehnou luli.”

⁴Samariahai nokpao nouso hatatkü ngiom, “Samüh Jehu tü khengshiau titi shio-e?” “Nokpao Joram si nokpao Ahazianeüh sauühtso tsüshiokü noiküla”

⁵Nungtiphe nokpao tsam jimtsün asong nou, naiuso noknio khako jimtsün asong nouso kamlokü paopung petchehoi si ajimtsünsoüh, nung ngiongem Jehu dongai hong: “Sam ni yathsüotsünso noin, naiuso ni tilüsong ngio-e nung chhisiyaau sam khemlokü noin. Lüko samüh khaiunia tsaktso nokpao tsüshane; ni ti ameiting ta yangji nung lüchhi.”

⁶Jehuüh ngüso dongai amao thsamsat satshin: “Asam ngüko noin tünaito, naiuso jü ngiokhemko hoilutau khemkü noin tünaito, lühom Jezreel nai nungtaoko nai Nokpao Ahab thsaosithsoso khaiu kankü ashi.” Nokpao Ahab thsaosithso aochinyat nouso nung Samariahai paopung aheihoi nouso apaotsang khemko taiuküla. Ngüsoüh ngüso niasankü tsadkü taiu.

⁷Tilai Jehu ün thsamsat nou epm, Samariahai aheihoi nou Ahab thsaosithsoso aochinyat nouso apem loatkü wan, ngüso khaiu kim nousoko thiokü Jezeel nai Jehu dongai hongan.

⁸Tilai Jehuüh Ahab thsaosithsoso khaiu kankü shikü taim ta lülan, apaüh ngüso khaiu noknio bekhan nai nime hau thekü ongannau naiuso nungthan ahom saokü nungko taiuau ngio kium.

⁹Ahom taoko, apa bekhan ai khukü khaiunia sauhai nungko noiküla ngüsotü ngiom, “Nokpao Joram thako khengshitsün tsak nou ngo noiküla naiuso apa loatkü wan: nungh thaiutha asam thsale titsünoi. Lüko sauüh nungso chikü loat?

¹⁰Nungüh Ahab thsaosi- thsoso thaiutha APAOU nou ti ngiom nung alum ko tongtü shithawaom ta hanji. APAOU nou e-po Elija tsangkü ti thalokü noin nung chhianiu.”

¹¹Nungthankü Jehuüh Ahab tsammongso amaohai Jezreel nai kihkü noitsünso apem loatkü wan, naiuso apaüh asonghoi nouso apem apa paiusihai ashimteng nouso, naiuso mesonhoi nouso tsaktso tsüpoi taiukü apem loatkü wan.

¹²Jehuüh Jezreel wankü Samaria nai khu. Yamai nai, “Onnemok jimtsün Asaothang” ta jontsün tsak ko

¹³apaüh a-ean nou Yihudahai Nokpao Ahazia tsammongso ajantsoko phete, naiuso ngüsotü “Asam sauhai noin?” ta sang. Ngüsoüh thalakü ngiom, “Sam Ahazia tsammongso noin.” “Sam Jezreel nai Menyiu Nokpao Jezebel thsoso naiuso apoitaiu nou nokpao tsammongso hau asuhat kiuau khuji.”

¹⁴Jehuüh apa khaiuniaso tü ngiom, “Ngüso aa lülou!” Ngüsoüh nungso thalouwan; naiuso apaüh ngüso gohkek tsak shimkü loatkü wan. Ngüso khaiunia aopülekü nime nouso tsaktso tsüpoikü loatkü wan.

¹⁵Jehu loüh tsaloshikü khunai, apa yamai apako Rekab thso Jonadad ko apa phete. Jehuüh apa hau salam kiukü ngiom, “Ni naiuso ngü yangtsün tsaklu noin. Ni ngo tü hachu-emo?” Jonadadüh thalan, “Ngo hachu-e.” “Nungaito apha ngühau akiu” ta Jehuüh thashin. Ngüne pha chenne, naiuso Jehuüh,

¹⁶“Ngoko ashi naiuso ngü APAOU tü titi thumkü kiutsün noin nung ni athaplu,” ta ngiokü apatü hachukü tsamkei nai sungan.

¹⁷Tilai ngüso nungai shisaom, Jehuüh Ahab tsammongso tsaktso tsüpoikü loatkü wan. Nung thawaoau APAOU nou Elija tü ngiotaiukü noiküla.

¹⁸Jehuüh Samariahai aikü jonkamküta ngiom, “Nokpao Ahabüh Baal goa intso yathsüo, lüko ngüto apatü tekkü phopkü yathsüo-e.

¹⁹Baal e-pohoi nouso apem ajonkam, apa amkhamtsünso apem, naiuso apa mesonhoi apem ajonkam. Sauhau awankiu tsünoi-e; ngü Baal hau aloat chaithio asong thioau noin, naiuso nungko sauhai tsüha-e nungsoto loatkü wane.” (Nung tsangkü apaüh Baal amkhamtsünso apem loatkü wanau athat nai Jehuüh nung akau- sai chhisiya tsak chhikü noiküla.)

²⁰Nungai Jehuüh ngiokhem kiukü ngiom, “Baal amkham nai asuhat- kiuau ajekhaiu tsak velutkü ataiu!” Nung angiotsünli chhikü noiküla.

²¹Naiuso Jehuüh Israel goumchi apem thapekkü ngio nou hongpeng. Baal amkhamtsünso apem ashikam; ngüso khaiunia tsaktso tsüphiokü shin. Ngüso apem Baal amkham tsamai nap, nungko athun tsak ainou athun tsak saokü meankü noiküla.

²²Nungai Jehuüh asio meson pha- khut tü paotsangau thetsün meson nou tü nung kankü shikü Baal amkhamtsünso ngüso apem hau lüsonkiu ta ngiokhem kium.

²³Nungphiai, Jehu apapem lüko Rekab thso Jonadad ko aikü amkham tsam mongai nap naiuso nungko noitsün khaiuniahoi nousotü ngiom, “APAOU tü amkhamtsünso sau tsü- naphakü, Baal tü amkhamtsünsolu nungko apem kamkü noin ta lüyang.”

²⁴Nungai apa naiuso Janadadne tsamai napkü aloat chaithio naiuso ajahtsün chaithio nouso Baal hau kium. Jehuüh kingchiai khaiunia aopüjei noi-i naiuso ngüsotü ayam hankü taiu: “Asamüh nung khaiunia nouso apem loatau noin, ajantsoüh ngüso ongko tsak lüko ja-an nai apaüh nung apa auo nou thamshi-e!”

²⁵Jehuüh chaithio kiukü thunkü, apaüh ehü nouso naiuso asonghoi nousotü ngiom, “Lünap küta ngüso apem lüloat, tsaktso laja-an!” Ngüso tsamai salaiu nouso tensanlokü napküta ngüso apem loatkü wan, naiuso mea nouso kengchiai tenshikü wan. Nung ainou ngüso amkham tsam nai akheiting asio puo saokü nap.

²⁶Nungai taiutsün asio khiam nou lokü shin naiuso nung in nai jahkü wan.

²⁷Nungtiphe ngüsoüh asio khiam naiuso amkham tsam nou khumaikhu tsamau phoklean-nung lonyi saokü noin.

²⁸Nungtiphe Jehuüh Israel nai Baal amkhamtsünso soimowankü noiküla.

²⁹Lüko apaüh Israelhai Bethel naiuso Dan nai apaüh chaiou lakkeng nou jangtsopong thso sotsom saitaiu nou amkhamau Nokpao Jero- boam angei chhisiya sakshi khekkü angei nai nialükhunan.

³⁰APAOU nou Jehu tü ngiom, “Ni Ahab thsaosi- thsoso tü ngo mongchiotsünli alum chhi-iu. Nungtiphe ngo nitü thalokü ngioji, Athsaosithsosoüh vetao püle noutü saothalutkü Israel nai nokpao-e.”

³¹Lüko Jehuüh Israelhai Goa, APAOU ngiokhem apa mongpem nou angio tsü-angkü noiküla, nung lüko Jeroboam sauüh Israelhai angei nai apa phiai nialükhunan.

³²Nungtaoko APAOU nou Israelhai goumchi atham atheng lohenau chhi yalo. Siriahai Nokpao Hazaelüh Israelhai goumchi apem shiolowan:

³³Yordan ajepek nai noitsün goumchi, Arnon Haiu sai nai noitsün ajepek ki Aroer noksong saokü-nung mongko Gad kau naiuso, Reuben kau nouso, naiuso ajepek nai noitsün Manase kau apaitso nouso kihtsün goumchi Gilead naiuso Bashan mongthiokü noiküla.

³⁴Jehuüh chhisiyatsün alum, apa mongnyankü chhitsün mongthiokü, Israelhai Nokpaohoi Ngiolat Thsam nai satkü taim.

³⁵Apa ean naiuso Samaria nai khanan, naiuso apa thso Jehoanazüh apa nokpao noikham lilo.

³⁶Jehuüh Samaria nai Israelhai nokpao thekü pon kheikü püjei nok-shing.