Read Khiamniungan Naga 2 Nokpao 11 Bible Online

2 Nokpao 11 - Khiamniungan Naga bible

2 Nokpao 11

¹Nokpao Ahazia nyiu Athaliaüh apa thso loataniu ta tilai lulan, apaüh nokpao tsammongso mepem apem loatkü wanau thaiutha ngiokhem kium.

²Nungko Ahazia thso Joas lu thakhuau shiokü noiküla. Apa lüko amao haiko aikü loatkü wanau noiküla, lüko apa nyai Jehosheba, sau Nokpao Jehoram ün menyiuthso naiuso Ahazia nuo noiküla apaüh kiplokü aa lu. Nung nyiuhai nou apa Amkham Tsam asai tsampai mongai nialuthiokü Athalia khako nou tsangkü wan, nungti apa tsüloat hakü kipsan.

³Athalia menyiu nokshing taoko apaüh nung melothso Amkham Tsam nai paotsangkü noiküla.

⁴Lüko pon chinyat nouko nai meson Jehoiadaüh nokpao ün tengkhaiu ehühoi paotsangtsün asong nouso naiuso nokpao tsam ehü nouso dongai ngüso apem Amkham Tsamai shiao ngiom, nungko apaüh ti chhisiyaau athat- taiu noin, nung athattaiu nouko mongchioha-iau ngüsohau apaüh ngiomong shingei. Apaüh ngüso khako Nokpao Ahazia thso Joas niakü shikü han

⁵naiuso ngüsohau nung ngiokhem nouso kiukü ngiom: “Tilai asam Yihuda Anonyi nouko chhisiya au shi-e, haoson süme nouko haoson tsak nou nokpao tsamtü ehü-e;

⁶amao haoson tsak nou Sur Bekhan nai tsakü ehü-e, naiuso amao haoson tsak nou bekhan nai hükü noitsünso phiko tsakü hü-e.

⁷Hoi nime sauhai Yihuda Anonyi taoko ehü lao-e ngüsoüh nokpao kiplokü ehü-e.

⁸Asamüh Nokpao Joas tü salaiu nou khemkü semkü apako noikü, apa khutsün nai khuhakü apatü ehü-e. Khaiunia ajantso asam shimkü shinai loatkü wanau noin.”

⁹Asonghoi nousoüh Jehoiada ün ayamhan nouso angkü ngüso khaiuniaso apa dongai nialokü shin- ngüso ongko ajantso Yihuda Anonyi chhisiya ainou alaolo naiuso ajantso chhisiya nai atsalo ta noiküla.

¹⁰Apaüh asonghoi nouso hau Amkham Tsam naitaiukü noitsün Nokpao David ün shisilai nouso kium;

¹¹naiuso apaüh nokpao kip- loau Amkham Tsamkha nai apemai lemkü salaiu nouso khemlokü khaiuniahoi nou meikü athang shankü noi-i.

¹²Nungai Jehoiadaüh Joas khengai nialokü shin, küta apa khaiuai kandio nou keikiu, naiuso apa hau nokpaoling nou nokshingkü shitsün ngiokhem thsam tsak kium. Nungai Joas tsomkiuküta nokpao ta velut. Khaiuniahoi nou ngüso pah patte naiuso sang songkü vekü ngiom, “Nokpao aakih laiukü lünoi!”

¹³Menyiu nokpao Athaliaüh ehü- hoi naiuso khaiuniahoi nou vetsün sang lulaküta apa khaiuniahoi apiating kamshikü noitsün Amkham Tsamai liukü khukü noiküla.

¹⁴Nungko apaüh saisileli, Amkham Tsamai naptsün bekhan nai kheampao tsak dongko ayan nokpao nou tsakü ep. Apa asonghoi naiuso jangong mattsünsoüh lemjikü noiküla, naiuso khaiuniahoi nou amongling nou vekü jangongmat. Athaliaüh apa nepat chipekkü mongkia naiuso vekü ngiom, “Asapthiotsün! Asapthiotsün!”

¹⁵Jehoiadaüh Athalia Amkham Tsam kemongko loatau tsüaiu, nungtiphe apaüh süpai asonghoi nouso hau ngiokhem kiukü ngiom: “Nung nyiuhai ehühoi nouso ingkü tsataiu nou jetkü kengchiai nialokü lükhuwan, naiuso sauhaiüh apa kiploau kowe-e saulünou loatkü lüwan.”

¹⁶Ngüsoüh apa thaloküta nokpao tsamai nialokü khu, naiuso nungai Mokthso Bekhan ko ngüsoüh nung nyiuhai nou loatkü wan.

¹⁷Meson Jehoiadaüh Joas nung Nokpao au shan naiuso khaiuniahoi nou APAOU nouko athalou-etsün tsak nung ngüso APAOU ün khaiuniahoi the-e ta Athalou-e tsak shan; apaüh loüh nokpao si khaiuniahoi jetko athalou-e tsak shan.

¹⁸Nungai khaiuniahoi nou Baal Amkham Tsamai khuküta nung lopengkü wan; Ngüsoüh amthang nou thiopek naiuso sotsom nouso thiopekkü wan, naiuso Baal ün meson Mattan nung amthang khako loatkü wan. Jehoiadaüh Amkham Tsam nai ehühoi taiukiu,

¹⁹küta, apa naiuso asonghoi nouso, nokpao ün tengkhaiu ehühoi nouso lamthiokü nokpao nou Amkham Tsam ainou nokpao tsamtü thalutkü, nungphiai khaiuniahoi apem hoilutkü yanthio. Joas, Ehühoi Bekhan tsatkü napküta apa nokpao noikham nai moknoi.

²⁰Khaiunia apem amongling nou mean, naiuso noknio nou thatü tsamkü iula, loto Athalia nokpao tsam kheng nouko loatkü wan.

²¹Joas achetpon chinyat nouko nai Yihudahai nokpaoau tsalo.