Read Khiamniungan Naga 2 Nokpao 13 Bible Online

2 Nokpao 13 - Khiamniungan Naga bible

2 Nokpao 13

¹Yihudahai Nokpao Ahazia thso Joasüh pon kheikü süme nokshing taoko Jehu thso Jehoahaz Israel nai nokpao tsalo, naiuso apaüh Samaria nai pon chekü chinyat nokshingkü noiküla.

²Apa khako Nokpao Jeroboam khekkü apaüh APAOU ta khengshikü angei chhin naiuso Israelhai angei nai nialükhun; apaüh apa angei chhisiya tilaitso tsüleankü noiküla.

³Nungtiphe APAOU nou Israelhai tü mongmat, naiuso apaüh Siriahai Nokpao Hazael naiuso apa thso Benhadad nehau Israelhai atao pungkü nai koman-ikü noiküla.

⁴Nungai Jehoa- hazüh APAOU tü mih sao, naiuso APAOU nou Siriahai nokpaoüh Israelhai thatü thsüokü thangmang- tsün epkü, apa misao thalan,

⁵APAOU nou Israelhai dongai ahei tsak hong, apaüh Siriahai ainou ngüso soktham kium, küta Israelhai nung khakoli aalo nai kihkü noiküla.

⁶Loüh ngüso nokpao Jeroboamüh angei nai nialü- khuntsün chhisiya ainou tsülaolokü chhi; naiuso Ashera sotsom Samaria nai noiküla.

⁷Jehoahaz oukong nai loto mokthso chiai noitsün khaiunia ao- püngo, tsamkei che, naiuso hokjeko keitsünso süpai heng 10, 000, tü simkü amao tsüpoishi, tiautenai Siriahai nokpao nou ngüso pukhaokü ngamthiokü apoi nouso lomowan.

⁸Jehoahazüh chhisiyatsün alum, naiuso apa mongnyan chhisiya nouso apem Israelhai Nokpaohoi Ngiolat Thsam nai satkü taim.

⁹Jehoahaz eanküta Samaria nai khanan, naiuso apa thso Jehoasüh apa nokpao noikham lilo.

¹⁰Yihudahai Nokpao Joas nok- shing pon aosamkü chinyat nouko nai, Jehoahaz thso Jehoas Israel nai nokpao tsalo, naiuso apaüh Samaria nai pon chekü luok nok-shing.

¹¹Apaüh lüko APAOU thako angei sunhe naiuso Israelhai angei nai nialükhuntsün Nokpao Jeroboam tü sailokü angei noutü hoilut.

¹²Jehoasüh chhisiyatsün alum, apa Yihudahai Nokpao Amazia thako mongnyankü ehlitsün lüko hakü Israelhai Nokpaohoi Ngiolat Thsam nai satkü taim.

¹³Jehoas ean naiuso Samaria nai nokpao etam nai khanan, naiuso apa thso Jeroboam (11) nou apa nokpao noikham lilo.

¹⁴E-po Elisha tü akiathe tsaküh kiakü noiküla, naiuso apa eanau saikü noitsün taoko Israelhai Nokpao Jehoas apa dongai shikü sailu, “Jüpo, jüpo!” ta apa shaptsünko aikü apaüh vekü ngiom. “Ni Israelhai kiplotsün akongting tsak noiküla!”

¹⁵“Uokoppai tsak naiuso chon ajantso alo,” ta Elishaüh apatü hong- kü ngiom. Jehoasüh nungso lokü shin,

¹⁶naiuso Elishaüh apatü nung kop au lükhemlota ngiom. Nokpao nou angiotsün chhikü noiküla, naiuso Elishaüh apa pha nokpao nou pha chiai letaiu.

¹⁷Nungai e-po nou ayamhantsün tsangkü nai, nokpao nou Siriahai dongai sheikü noitsün koukhantso tsak soppan. “Chon nou lükop!” ta Elishaüh thoikü ngiom. Nung nokpao nou kopkü thunkü, e-po nou vekü ngiom, “Ni APAOU ün chon noin, nung tsangkü ni Siriahai khako ashiolotsün noi-e. Ni Siriahaiko Aphek nai ni ngüso moshiolokün lektso ehli-e.”

¹⁸Nungai Elishaüh nokpao noutü chon amao nouso alo naiuso nung- soüh goh noutü lüshiuh ta thoilut. Nokpao nou goh noutü samjam shiuh küta laowan.

¹⁹Nungüh Elisha mongmat-i, naiuso apaüh nokpao noutü ngiom, “Ni pungojam si luokjam shiuh au noiküla, nungphiai ni Siriahai khako thumkü shiolotsün noi-ela; lüko lo ni ngüso samjam lu shiolo-e.”

²⁰Elisha ean naiuso khanan, Pon pungkü Moabhai ahoi ahoi nou Israelhai goumchi komhekü noiküla.

²¹Ataojam, khaiunia tsak mea kam- taiu taoko, nungsohoi nou shikomkü noiküla, nungai khaiuniahoi nou mea Elisha etam ai yakthiowan, küta ngüso jingkü khuwan. Nung mea nou Elisha uo nouso tü thantsünko nung khaiunia nou ahhkü shin naiuso tsakü noiküla.

²²Siriahai Nokpao Hazaelüh Jehoahaz nokshingtao chikü Israelhai hau ajeiat kiukü noiküla,

²³lüko APAOU nou ngüso khako atsüojinyang noiküla. Apaüh ngüso lomokü tsü- wan-i, lüko ngüso hachu, tiautenai Apaüh Abraham si Isak, naiuso Yakob ko athalou-etsün noiküla. Apaüh apa khaiuniaso tilaitso tsüpean.

²⁴Siriahai Nokpao Hazael ean taoko apa thso Benhadad nokpao tsalo.

²⁵Nungai Israelhai Nokpao Jehoasüh Benhadad samjam shiolom naiuso Jehoas po Jehoahazüh nokshing taoko Benhadadüh thalo- wantsün noksong nouso loüh thaloshin.