Read Khiamniungan Naga 2 Nokpao 14 Bible Online

2 Nokpao 14 - Khiamniungan Naga bible

2 Nokpao 14

¹Israel nokpao Jehoahaz thso Jehoas nokshing nepon nouko nai, Joas thso Amazia Yihuda nai nokpao tsalo,

²nung taoko apa achetpon kheikü pungo noiküla, naiuso apaüh Yirusalem nai pon kheikü lükao nok-shing.

³Apaüh APAOU mongchiotsün chhin, lüko apa paosipo Nokpao David khekkü tsüde; nungliko apaüh apa po Joasüh chhisiyakü shitsün chhin.

⁴Apaüh paisilung amkhamthang nouso tsülothe, naiuso khaiuniahoi nou nungko tsülaoko aloat chaithio naiuso angannyam jahtsün chaithio kiukü noiküla.

⁵Amaziaüh nokshing mongkü tsaloküta, apaüh apa po, nokpao nou loattsün asonghoi nouso loatkü wan.

⁶Lüko apaüh loatkü wantsün thsosoto tsüloat hakü APAOU nou Mosa ngiokhem nai ti thoilut nung tsakkü chhisiyakü noiküla: “Thso- haiüh sunjikantsün tsümeikün chhi thaiutha ko posinyiuhai tsüloate, naiuso posinyiuhaiüh sunjikantsün tsümeikün chhi thaiuthako thsohai tsüloate; Khaiunia tsaküh apa pemüh tsümeikü chhinai nung thaiutha kolu apa pem loatau noin.”

⁷Amaziaüh Jem Tsamei nai Edomhai süpai heng 10, 000 loatkü wan; apaüh ehli taoko Sela noknio shiolom, küta nungtü Jokthel ta jon, nung nok nian lonyi saokü noin.

⁸Nungthanko, Amaziaüh Israel- hai Nokpao Jehoas dongai apatü ehli au taikü ngiongem kantsünso hong.

⁹Lüko Nokpao Jehoasüh nungti thalakü hongshi shin: “Ataojam Lebanon king nouso ai noitsün tsaopai tsaküh Cedar pai tsak dongai ngiongem hongkü ngiom: ‘Athso menyiuthso nou jüthso melothsoko tsamsigoh yang-iau akiu’ Liu ai noitsün thainian tsaküh yanlükhun taoko nung tsaopai ngamthiwan.

¹⁰Lo Amazia, ni Edomhai shiolo-iu, naiuso ni abülom nou meankü noin. Aniansong nou mongtsamkü lünoi naiuso tsamai lünoi. Tiauta angja lochu-e, nungühto akhako naiuso akhaiuniaso khako asapthiowantsün lu kankü shi-e?”

¹¹Lüko Amaziaüh nungtü tsü-anglu, nungtiphe Nokpao Jehoas apa khaiuniaso hakü Yihuda ai Betshemes nai apa thako ehli au khu.

¹²Amazia süpaihoi shiohean, naiuso apa süpaihoiso apem ngüso tsamai khulükhunan.

¹³Jehoasüh Amazia sou au thalowan, küta Yirusalem ai khukü, noknio pe Efraim Bekhan ainou Aniokün Bekhan saokü meter tsom nime thatso thiothiowan.

¹⁴Apaüh e-eptsün tangkason naiuso chaiou lakkeng apem lowan, amkham tsam chaiou nouso Samaria ai kankü khuwan. Apaüh ajantso apako nialokü khuwan.

¹⁵Jehoasüh chhisiyatsün alum, apa mongnyankü Yihudahai Nokpao Amazia ko ehlitsün lüko hakü Israelhai Nokpaohoi Ngiolat Thsam nai satkü taim.

¹⁶Jehoas ean naiuso apa Samaria nai nokpaohoi etam ai khanan; naiuso apa thso Jeroboam (11) nou apa nokpao noikham lilo.

¹⁷Israelhai Nokpao Jehoas ean phiai Yihudahai Nokpao Amazia pon chekü pungo kihshi.

¹⁸Amaziaüh chhisiyatsün alum Yihudahai Nokpaohoi Ngiolat Thsam nai satkü taim.

¹⁹Yirusalem nai Amazia loatkü wanau apa ta amongkhem tsak noiküla, nungtiphe apa Lakis noknio ai khuthio, lüko apa ehoisoüh thaiukü khukü nungai apa loatkü wan.

²⁰Apa mea Yirusalem nai mokthso tsak chiai kankü shikü ta David noknio nai nokpaohoi etam nai khankü wan.

²¹Nungphiai Yihuda- haiüh apa thso achetpon chekü luok nou Uzzia hau nokpao kandio keikiukü nokpao tsalo-i.

²²Apa po ean phiai Uzziaüh Elat shiolo küta shanshikü noiküla.

²³Yihudahai Nokpao Amazia thso Joas nokshing pon chekü pungo nouko nai, Jehoas thso Jeroboam Israel nai nokpao tsalo, naiuso apaüh Samaria nai pon aopülekü tsak simkü nok-shing.

²⁴Israelhai angei nai nialükhuntsün Nebat thso Nokpao Jeroboam apa thako angei nou chhin.

²⁵Apaüh Israelhai goh ajenapki nai Hamat Aoyan ainou ajenekki Ee Khiamnok tü yangkü apem shioloshin. Nung Israelhai Goa, APAOU nou Gat Hefer ainou Amittai thso e-po Yona apa yathsüotsün tsangkü thalokü noiküla.

²⁶APAOU nou Israelhai thsüokü omhetsün ep; nungko ngüsotü hachuau khaiunia tsaktso tsünoiküla.

²⁷Lüko Israelhai thumkü naiuso asaita hau lomowanauto APAOU ün ayang tsüde, nungtiphe apaüh ngüso Nokpao Jeroboam (11) tsangkü asankiu.

²⁸Jeroboam (11) üh chhisiyatsün alum, apa mongnyankü ehlitsün, naiuso apaüh titi Damaska si Hamat noknio ne Israel hau thakiushi, nung apem Israelhai Nokpaohoi Ngiolat Thsam nai satkü taim.

²⁹Jeroboam ean küta apa mea nokpao etam nai khanan, naiuso apa thso Zekariaüh apa nokpao noikham lilo.