Read Khiamniungan Naga 2 Nokpao 16 Bible Online

2 Nokpao 16 - Khiamniungan Naga bible

2 Nokpao 16

¹Israelhai nokpao Remalia thso Peka nokshing pon chekü chinyat nouko nai, Jotham thso Ahaz Yihuda nai nokpao tsalo

²nungtaoko apa achetpon khei noiküla, naiuso apaüh Yirusalem nai pon chekü luok nok-shing. Apaüh apa paosipo Nokpao David athat amei noutü tsühoilut, nungliko, apaüh apa Goa APAOU nou tsümongchiotsün bao chhin

³naiuso Israelhai nokpaohoi athatlu nouso ta hoilut. Apaüh meshen thsoteng lüko sotsom nouso hau ajah chaithio kium, Israelhai yashitsün taoko APAOU nou komantsün khaiuniahoi ün achinyan chhisiya nousotü kheklo.

⁴King nouso ai naiuso paikhem pungkü nai, paisilung amkhamthang nouso ai, Ahazüh aloat chaithio naiuso angannyamkü jahtsün chaithio nouso kiu.

⁵Siriahai Nokpao Resin naiuso Israelhai Nokpao Peka neüh Yirusalem kom naiuso thalowan, lüko Ahaz tsüshiolokü noiküla.

⁶(Nung taokolu, Edomhai nokpao nou Elat noknio thumkü thalowanshin, naiuso nungko kihtsün Yihudahai koman, Edomhai nung Elat noknio nai kihlo, nung losaokü noin.)

⁷Ahazüh Asiriahai nokpao Tiglat Pileser dongai nung ngiongem kankü hongkü ngiom: “Ngo ni thumkü kiukü yathsüotsün noin. Ngo tü komtsün Israelhai naiuso Siriahai nokpao nouso ainou shiküta ngü akiplo.”

⁸Ahazüh tangkason naiuso chaiou lakkeng Amkham Tsam ainou naiuso nokpao tsamai kamtaiutsün nokpao nou hao paopei tsakli hong.

⁹Ahazüh kojatsün ta thashikü Tiglat Pileser apa süpaihoi hakü Damaska dongai khu, naiuso nung thalowan. Nokpao Resin loatkü wan, küta Kir khaiunia nouso sou au thalokü khuwan.

¹⁰Tilai Nokpao Ahaz Nokpao Tiglat Pileser ko pheteau Damaska ai khu, apaüh nungko amthang tsak ep, naiuso nung tongtü khekkü anelang- tso saokü thathaiukü meson Uria dongai laokü hong.

¹¹Nungtiphe Uriaüh nung pou nou tongtü khekkü lahsan, naiuso nung Ahaz molao- shikün khako chhikhemkü noiküla.

¹²Apa Damaska ainou laokü shitsün taoko, Ahazüh nung ampou nou lakhemankü ep,

¹³nungtiphe apaüh nung chiko thainian loatkü chaithio naiuso khülam chaithio nouso kium, naiuso nung chiai theng chaithio nouso naiuso aalo chaithio nouso kium.

¹⁴Taoson ampou APAOU hau losio kiutsün nung ayan ampou naiuso Amkham Tsam ne jetko noiküla, naiuso Ahazüh nung ayan ampou dongai ajepekki dongai soian.

¹⁵Küta apaüh meson Uria tü ngiom, “nung ngü nou ampou asong nou ahom jahtsün chaithio, asham khülam chaithio, nokpao ün ajahtsün naiuso khülam chaithio, naiuso khaiuniahoi nou theng chaithio kiuao kiu au thaiutha lükankei. Nung chiai aloat chaithio kiutsün thainian she nouso lühonglut. Lüko taoson ampou nouto jü thaiutha aküo tsangshei loau kankeiau thaiutha lütaiu.”

¹⁶Uriaüh nokpao nou thoiluttsünli chhin.

¹⁷Nokpao Ahazüh taoson nou shantsün tsamkei sübao Amkham Tsamai kankeikü noiküla, naiuso nungso chiai noitsün chiu nouso lowan; apaüh loüh taoson khiamtan sübao taoson jangtsopong chekü nime phiai noiküla küta nung athanya lung chiai lolutkü wan.

¹⁸Asiriahai nokpao mongling-iau thaiutha ko, Ahazüh Amkham Tsam ainou puo nou nokpao noikham thaiutha loküta nokpao ün Amkham Tsam ai naptsün tengkhaiu koukhan nou kiapan.

¹⁹Nokpao Ahazüh chhisiyatsün alum Yihudahai Nokpaohoi Ngiolat Thsam nai satkü taim.

²⁰Ahaz ean naiuso apa mea David Noknio nai, nokpaohoi etam nai khanan, naiuso apa thso Hezekiaüh apa nokpao noikham lilo.