Read Khiamniungan Naga 2 Nokpao 17 Bible Online

2 Nokpao 17 - Khiamniungan Naga bible

2 Nokpao 17

¹Yihuda nai Nokpao Ahaz nokshing pon chekü nime nouko nai, Ela thso Hoshea Israel nai nokpao tsalo, naiuso apaüh Samaria nai pon lükao nok-shing.

²Apaüh APAOU thako angei chhin, lüko apa khako Israel nai sauhaiüh nok- shingkü noiküla nung nokpao nouso chhi lito tsüde.

³Asiriahai Nokpao Shalmaneserüh apa thako ehli tsalo, Hoshea Shalmaneser ko hoilutan naiuso apaüh pon pungkü Shalma- neser hau paopei kiu.

⁴Lüko pon tso Hosheaüh ponthon nai Asiriahai hau paopei kiutsün laowanküta Ijip hai nokpaoso dongai ahachu sangkü ngiongem kantsünso hong. Tilai Shalmaneserüh nung ngela, apaüh Hoshea keloküta aketsamai wan.

⁵Nungai Shalmaneserüh Israel komkü Samaria lemlowan. Nung thalokü ta pon süme nouko,

⁶Hoshea nokshing pon lükao noitsün taoko, Asiriahai nokpaoüh Samaria thalo- wan, naiuso Israelhai Asiria ai sua au kankü khuwan, ngüso ajantso Hala hai noknio nai noi, ajantso Gozan khiamkhan ko Habor Haiu shimkü noi, naiuso ajantso Mediahai noknio nouso nai noi.

⁷Samaria mowantsün tiautenai Israelhaiüh ngüso Ijip ainou niasan- tsün naiuso Ijiphai nokpao oukong ainou asan-itsün ngüso Goa APAOU nou thako angei chhin. Ngüsoüh melemaohai goa amkham,

⁸naiuso APAOU nou ngüso niasantsün taoko komantsün khaiuniahoi nouso paosiposo saisile tü hoilut, naiuso Israelhai nokpao nousoüh ayamhantaiutsün saisile nai hoilut.

⁹Israelhaiüh ngüso Goa APAOU nou tsümongchiotsün chhisiya nouso chhin. Ngüsoüh nok ehentsoting ainou noknio asongteng saokü, nok- song chikü nai paisilung amkhampou nouso shan.

¹⁰Kingtso apem nai naiuso paikhem pungkünai ngüsoüh lung kheam nouso naiuso Ashera sotsom nouso shantaiu

¹¹kü APAOU nou komantsün khaiuniahoi nouso chhisiya yam noutü hoilutkü paisilung ampou nouso apem ai angannyamtsün jahkü noiküla. Ngüso akausai chhisiya nou APAOU mongmat sung-i,

¹²naiuso sotsom nouso tsü-amkhamao APAOU ün athoilut ngüsoüh a-ngio tsü-ang.

¹³APAOU nou Israelhai naiuso Yihuda haitü lotsüoau apa ngiongem kantsün e-pohoi nouso hongkü ngiom: “Ngü asam hau ngü yathsüo- tsünso e-pohoi tsangkü Ngiokhem nou asam paosiposo hau lethiokiu- tsün jü athoilut nouso angio angkü asamüh tsümeikün yam nouso lüle-an.”

¹⁴Lüko ngüsoüh angio tsü-ang, ngüso Goa APAOU noutü mongtsülamkü ngüso paosiposo mongkongtsün khekkü ngüso mongkü noiküla.

¹⁵Ngüsoüh apa yamhantsün tü angio angkü theau nou nanan, naiuso apa athalou-e ngüso paosiposoko shantsün tsükan- kei, naiuso ngüsoüh apa alutsüo nouso tsüwesankü wan. Ngüsoüh atheao tsünoikün sotsom nousotü amkham naiuso ngüso chija atheao tsünoikühoi iula, naiuso ngüsoüh APAOU ün athoilut chenpahai saisile lasailo ta ngiotaiu nou tsü-angkü ngüso lemkü noitsün chenpa nouso saisile kheklo.

¹⁶Ngüsoüh ngiokhem apem ngüso Goa APAOU ün lothean naiuso jangtsopong nime son nou langküta nungtü amkham; ngüsoüh loüh Ashera sotsom lüko shan, kianthsüo nouso tü amkham, naiuso Baal yathsüokü noila.

¹⁷Ngüsoüh paisilung nouso hau ngüso melothso naiuso menyiuthso nouso jahkü chaithio kiu; ngüsoüh aküo ngetsün- so naiuso mea-on ko chitetsünsotü sang, naiuso APAOU khako ti tsüthakü noin nung chhisiya au ngüsoüh ngüso pem thumkü kiuwan, naiuso nungshioko apa mongmat sung-ikü noiküla.

¹⁸APAOU Israel haiko mongmat küta apa nioko nou apaüh ngüso Yihuda nokshing lu poitaiukü apem lomokü wan.

¹⁹Lüko Yihudahaiüh lüko ngüso Goa APAOU ngiokhem nouso angio tsü-ang; ngüsoüh lüko Israel haiüh sailotsün saisile khekloha.

²⁰APAOU nou Israelhai apem wanan, apa nioko ainou ngüso moyangshikün lektso ngüso atsaoting ehoi phamongai thumkü kiuwan kü ngüso hau alohat kium.

²¹APAOU nou Israelhai Yihudahai ainou pungekiu küta, Israelhaiüh Nebat thso Jeroboam ngüso nokpao au tsalo-i. Jeroboamüh ngüso hau APAOU nou lean-iküta ngüso angei nai nialükhunan.

²²Ngüsoüh Jero- boam tü hoilutkü angei nouso tsülaokü chhikü noi,

²³APAOU nou apa nioko ainou ngüso momowan- ikün lektso apaüh chhiao nou apa yathsüotsün e-pohoi nouso tsangkü Israel haiüh phiowantsün tü lotsüo- kiu. Nungtiphe Israelhai Asiria ai suo au kankü khuwan, naiuso ngüso nungai kih.

²⁴Asiriahai nokpao nou Babilon noknio ainou, Kut ainou, Ivva ainou, Hamat ainou, naiuso Sefarvaim nok- nio nouso ainou khaiuniahoi kankü khuküta ngüso Israelhai kankü khuwantsün thangko Samaria nai noknio nouso ko taiuwan. Ngüsoüh nung noknio nouso ün tengkam loküta nungko kih.

²⁵Tilai ngüso nungko chongting noilo, ngüsoüh APAOU tü tsü-amkham, nungtiphe apaüh chongkhao nouso hongkü nungüh ngüso khaiunia ajantso jeiatan.

²⁶Asiriahai nokpao nou khaiuniahoi apaüh Samaria noknio nouso ai noitsünsoüh nung goumchi goa ngiokhem nou tsünge, nungtiphe goa nou chongkhao nouso hongkü ngüso jeiatan ta lula.

²⁷Nungtiphe Asiriahai nokpao nou thoilutkü ngiom: “Samüh suohoi kankü shitsünso e-pohoi ong ainou tsak laokü lühongshi, apa khukü nung goumchi nai kihtsün khaiuniahoi hau goa ngiokhem nouso lütsande-i.”

²⁸Nung- tiphe Israelhai e-po tsak sau Samaria ainou kanlükhunkü Bethel ai kih- küla, apaüh APAOU tü titi amkhame ta khaiuniahoi hau tsandeen.

²⁹Lüko khaiunia sauhai Samaria nai kihlo ngüsoüh sotsom shantsün tsülaolo, naiuso ngüsoüh nungso Israelhaiüh lahtaiutsün amkham tsamtso nouso ai taiu. Hoi amomo pungkü nou ngüso kihtsün noknio nai sotsom nouso shan:

³⁰Babilon nai noitsün khaiuniahoi nou Sukkot Benot sotsom shan; Kut nai noitsün khaiuniahoi nou Nergal sotsom nouso shan; Hamat nai noitsün khaiuniahoi nou Ashima sotsom nouso shan;

³¹Ivva haiüh Nifaz naiuso Tartak sotsom nouso shan; naiuso Sefarvaim haiüh ngüso ün sotsom Adrammelek naiuso Anammelekso hau ajah chaithio au ngüso thsoso kium.

³²Nung khaiuniahoi nousoüh lüko APAOU amkhamkü noiküla naiuso paisilung amkhamtsün athang nouso ai yathsüoau ngüso khaiunia haove apem ong ainou khaiunia athatha choloum; naiuso ngüsoüh aloat chaithio nouso kium.

³³Nungti ngüsoüh APAOU amkham, lüko ngüso ti goumchi ainou shin nung goumchi saisile tsangkü ngüso tengkhaiu sotsom nouso amkhamkü noiküla.

³⁴Ngüso akeng saisile ngüsoüh lonyi saokü kankeiji. Ngüsoüh APAOU tsü-amkham loüh Yakob thsaosithsoso hau Israel ta nian niankiutsün ngio- khem naiuso athoilut nouso ngüsoüh a-ngio tsü-ang.

³⁵APAOU nou ngüsoko athalou-e tsak shanküta ngüso tüü ngiom: “Asamüh amao goa nouso la-amkham; ngüsotü lakauthio, ngüso layathsüo, tsüdekünai ngüso hau aloat chaithio lakiu.

³⁶Oukong naiuso akongteng nou asam sauüh Ijip ainou niasan, nung APAOU, asamüh jü ngio angau noin; asamüh ngütü akauthio naiuso aloat chaithio nouso ngühau athio.

³⁷Ngü asam thaiutha sattsün ngiokhem naiuso athoilut nouso asamüh asaita angio angau noin. Asamüh amao goa nouso ngio tsü-angau noin,

³⁸naiuso asamko ngü athalou-e shantsün asamüh tsüpean au noin.

³⁹Asamüh asam Goa, APAOU, jüngio angau noin; naiuso ngü asam ehso ainou asam kiplo-e.”

⁴⁰Lüko nung khaiunia nousoüh angio tsü-angkü ngüso akeng saisile nousotü tsülaokü hoilutkü noian.

⁴¹Nungti nung khaiunia nousoüh APAOU amkham, lüko ngüsoüh loüh ngüso ün sotsom nouso amkhamha; naiuso lonyi shisaokü ngüso thsao- sithsosoüh nung chhisiya tsülaokü kankeiji.