Read Khiamniungan Naga 2 Nokpao 18 Bible Online

2 Nokpao 18 - Khiamniungan Naga bible

2 Nokpao 18

¹Israelhai nokpao Ela thso Hoshea nokshing pon süme nouko nai, Ahaz thso Hezekia Yihuda nai nokpao tsalo

²nungtaoko apa achetpon kheikü pungo noiküla, naiuso apaüh Yirusalem nai pon kheikü lükao nok-shing. Apa nyiu Zekaria menyiuthso Abija noiküla.

³Apa paosipo Nokpao David khekkü apaüh APAOU nou mongchiotsün chhin.

⁴Apaüh paisilung amkham- thang nouso lomowan, lungkheam nouso lothean, naiuso Ashera sotsom hethekü wan. Apaüh loüh Mosaüh shantaiu nou taoson pao sübao tü Nehustan ta jonkü noiküla nung nelangkü thiopekkü wan. Nungtao saokü nouko Israelhaiüh nung pao sotsom hau asuhat kiukü angannyam- tsün jahkü noiküla.

⁵Hezekiaüh Israelhai Goa, APAOU nou da monglam, Yihudahai apa khekkü apa khako tsüdekünai phiai lüko amaohai nokpao tsünoiküla.

⁶Apaüh APAOU da monglam naiuso apa ngio tsü-angkü laitso tsünoi, naiuso APAOU nou Mosa hau kiutsün athoi- lut nouso apem thatü mongkiukü kankei.

⁷Nungtiphe APAOU apako noiküla, naiuso apa chhisiya alum ko ashio ep. Apaüh Asiriahai nokpao thako khengshikü tsalo naiuso apatü hoilutau tsümongchio.

⁸Apaüh Filistiahai shiolo, naiuso Gaza si nung lemkü noitsün chenpa goumchi nouso monglokü nok ehenting ainou noknio asongting saokü ngüso kihtsün yampekkü yamhe-an.

⁹Hezekia nokshing pon püle nouko-nung Nokpao Hoshea nok- shing Israel khako pon chinyat nouko nai Asiriahai Nokpao Shalmaneser- üh Israel koman küta Samaria lemlowan.

¹⁰Lemloküta sampon nouko Samaria mowan; nungtaoko Hezekia ün nokshing pon luok, naiuso Hoshea ün nokshing pon lükao nouko noiküla.

¹¹Asiriahai nokpao nou Israelhai suo au Asiria ai kankü khuwan naiuso ngüso ajantso Halahai noknio nai, ajantso Gozan khiamkhan ko Habor Haiu shimkü, naiuso ajantso Midiahai noknio nouso ai kih.

¹²Samaria mowantsün tiautenai Israelhaiüh APAOU, ngüso Goatü angio tsü-ang, APAOU yathsüotsün Mosa tsangkü ngiokhem kiukü taiutsün apem angio tsü-ang, ngü- soko apaüh athalou-e shantaiutsün lothean nou shioko noiküla. Ngüsoüh tsü-anglu naiuso ngüsoüh angei suntsün tsüchhi.

¹³Nokpao Hezekia nokshing pon chekü püle nouko nai, Asiriahai nokpao Senakeribüh Yihudahai noknio meikü shantaiutsünso koman naiuso nungso shiolowan.

¹⁴Nokpao Hezekiaüh Senakerib sau Lakis nai noiküla apa dongai ngiongem tsak hongkü ngiom: “Ngü phiokü chhianiu, tsüojinyangkü ni komtsün alaolokiu, naiuso ni tilüsong sao-e nung ngo kiu-e.” Asiriahai nokpao nou ngiom, Hezekiaüh tangkason heng 10, 000, naiuso chaiou lakkeng heng 1, 000, hongau noin.

¹⁵Heze- kiaüh Senakerib dongai Amkham Tsamai naiuso nokpao tsamai taiutsün tangkason apem;

¹⁶amkham tsam koukhan tü leplut taiutsün, naiuso apa pemüh kouchon kheam nou mongai lojei taiutsün chaiou lakkeng nouso konsankü hongan.

¹⁷Asiriahai nokpaoüh Hezekia komao Yirusalem ai Lakis ainou süpaihoi asong tsak hong; nungso apa ün süpai ahei sümeüh niakü noiküla. Tilai ngüso Yirusalemai shisaom, ngüsoüh nepat shantsün chhisiya yam han temkhau ainou kanjikantsün haiukhut ko yangkü thalowan.

¹⁸Nungai ngüso Nokpao Hezekia dongai hong, naiuso apa asonghoi süme nouso ngüso pheteau khu: ngüso nokpao tsam paotsang- tsün Hilkia thso Eliakim, mikhem nai sattsün Shebna; naiuso ateng chhi nouso sattaiutsün ashe nou Asap thso Joa noiküla.

¹⁹Asiriahai asonghoi ongko khaiunia tsaküh ngiom, Nokpao Hezekia thatü mong- songkü monglamtsün nung tiüh ta Asiriahai nokpao nou ngeau mongchioji.

²⁰Apaüh saokü ngiom, “Süpai amon naiuso akong nou thangko ni ngiokeng nou shiolo-e ta yangji süne? Asiriahai thako khengshi nai nitü sauüh hachu-e ta ni yangji?

²¹Ni hachuau ni Ijip haitü yangji, lüko nung kiangkiangpai tsak pailai au kankeitsün khekkü noi-e-nungüh ngekküta apha nai lape. Nungti Ijip hai nokpao tilai ajantsoüh apatü niolute, nung khekkü noi-e.”

²²Asiriahai asonghoi nousoüh tsülaokü ngiom, “Tsüdekünai ni APAOU a Goa da monglamji ta ngo tü chiteau shio-emo? Tilai apaüh Yihu- dahai naiuso Yirusalem haitü Yiru- salem amthang nailu amkhamau ngiom, nung APAOU ün etam naiuso amthang Hezekiaüh lotheantsün noikula.

²³Ngü niko nokpao nianko haiu-e-e. Ngü nihau mokthso heng 2, 000, kiu-e, nilu nungso chiai moknoiau khaiunia saiukü epsan naito.

²⁴Ni Asiriahai ongko asao- thunting asonghoiko lüko tsüthayap, naiuso loüh ni Ijip haitü tsamkei naiuso mokthso khaiuniahoi adongai hongau yangji!

²⁵APAOU ün ahachu tsühakü ngo a goumchi komhe naiuso lothean ta ni yangji süne? APAOU pemüh ngotü lükom naiuso lülothe ta ngiom.”

²⁶Nungai Eliakim, si Joa naiuso Shebnasoüh asonghoi nou hau chiten, “Sam tü Aramik ngioko angio, APAOU, samüh nung ngelaji. Ibri ngio langio; tiautenai kengchiai noitsün khaiunia chikü nou nung angluji.”

²⁷Apaüh thalakü ngiom, “Nung chikü ngioau thaiutha nokpao nou ngü hongtsün asamüh nokpao naiuso asamlu ta yangji süne? Tsüde, kengchiai sauhai mokkü noin nung khaiunia nousoko lüko ngo chiteji, ngüsoüh lüko asamühli ngüsoüh wantsün heau naiuso ngüso jeh shiu au noin.”

²⁸Nung asonghoi nouso tsakü chuküta Ibri ngioai vekü ngiom, “Asiriahai nokpaoüh ngiotsün tü anglu!

²⁹Apaüh asamtü Hezekia hau tsükausaiat-iau lotsüoji. Hezekiaüh asam kipsanau tsüshio-e.

³⁰Naiuso asam APAOU da monglamau apahau asam lashiohean-i. Sam Asiriahai süpai asam noknio thalotsün ainou apaüh lolaokü ta APAOU nou asam kipsane ta layang.

³¹Hezekia tü la-anglu. Asiriahai nokpao nou asam noknio ainou pechiai shiküta samko ahoilut au ta ngiokhem kiuji. Asam apem hau momo sainaoshep eiu ainou shep he-iau ayam sopkiu-e-naiuso asam phioshep asam hau he-i-e, naiuso asam temkhao ainou asam hau khiam shiu-i-e.

³²Nokpao nou asam hau asam tengkhaiu goumchi tsakli mokiukün lektso, tiai theng shansanau sainaoshep eiu naiuso themtsai shansanao chonglam eiu; nung olipshep goumchi noin, olip khiam naiuso liukhiam eptsün goumchi noin. Asamüh ti apaüh thoilutji nung chhi naito, asam tsü-eikü aa noi-e. APAOU nou asam kiplo-e ta yangtsün tsangkü asam Hezekia au lalo aiu-i.

³³Asiriahai nokpao ainou ngüso goumchi amao goa tsaküh kipsan süne?

³⁴Hamat naiuso Arpad goa nouso lo tiai noin? Sefarvaim, Hena, naiuso Ivva goa nouso tiai noin? Ajantsoüh Samaria kipsankü shin süne?

³⁵Sam nokpao ainou ngüso goumchi nouso nungso goa nousoüh tilai kipsankü noila? Nungaito APAOU nou Yirusalem kipsanau shio-e ta ti nou asam hau yangsan-iji.”

³⁶Nokpao Hezekiaüh ngüsotü ngiotsünli, khaiuniahoi nou ti tsüngemkü noian; ngüsoüh ngio tsaktso tsüsingio.

³⁷Nungai Eliakim, Shebna, naiuso Joasoüh amongmat nou ngüso ne chipek naiuso khukü Asiriahai asonghoi nou ngiotsün nung nokpao nou hau chiten.