Read Khiamniungan Naga 2 Nokpao 2 Bible Online

2 Nokpao 2 - Khiamniungan Naga bible

2 Nokpao 2

¹APAOU nou Elija ahsheih tsak mongko tsanlokü aün ai kankü khuwanau atao shisaom. Nungai Elija si Elisha ne Gilgal ainou tsalo,

²kü khunai yamko Elijaüh Elisha tü ngiom, “Loto ni nungko anoi; APAOU nou ngütü Bethel ai khuau ngiokhem kiukü noin.” Lüko Elishaüh thalakü ngiom, “Ngü aa noitsün APAOU naiuso nitü mongkiutsün tsangkü ngiomong- shingkü ngioji, ngo ni tsülean-e.” Nungtiphe ngüne Bethel ai tsülaokü khu.

³E-pohoi tsak sauhai nungko kihkü noiküla ngüso Elisha dongai khuküta apatü sangkü ngiom, “APAOU nou ni nou APAOU ni ainou lonyi kankü khuwane ta ni ngejimo?” Elishaüh ngüsotü thalakü ngiom, “Ah, ngo ngeji.” “Lüko samüh nung thaiutha lachiteko.”

⁴Nungai Elijaüh Elisha tü ngiom, “Loto ni nungko anoi, APAOU nou ngo tü Yeriko ai khuau ngiokhem kiuwaniu.” Lüko Elishaüh thalakü ngiom, “Ngü aa noitsün APAOU naiuso nitü jümongkiutsün tsangkü ngiomong- shingkü ngioji, ngü ni tsülean-e.” Nungtiphe ngüne Yeriko ai tsülaokü khu.

⁵E-pohoi tsak sauhai nungko kihkü noiküla ngüso Elisha dongai khu küta apatü sangkü ngiom, “APAOU nou ni nou APAOU ni ainou lonyi kankü khuwane ta ni ngejimo?” Elishaüh thalakü ngiom, “ah, ngo ngeji,” “Lüko samüh nung thaiutha lachiteko.”

⁶Nungai Elijaüh Elisha tü ngiom, “Loto ni nungko anoi; APAOU nou ngü tü Yordan Haiu ai khuau ngiokhem kiuwaniu.” Lüko Elishaüh thalakü ngiom, “Ngo aa noitsün APAOU naiuso nitü jümongkiutsün tsangkü ngiomong- shingkü ngioji, ngo ni tsülean-e.” Nungtiphe ngüne tsülaokü khu,

⁷naiuso ngüso ko Yordan Haiu ai e-po aopungo hoilutkü khu. Elija si Elisha ne Yordan Haiu sai khunai; e-po aopungo nouso intso shitsaikü tsakü noi.

⁸Nungai Elijaüh apa phakhut ngiosanküta nung laishi, naiuso nungüh khiam noutü shiuh; nungai khiam nou nime hau janthat, naiuso apa si Elisha neüh haiu etsai gohwai chiai keikü yankü khuwan.

⁹Nungai Elijaüh Elisha tü ngiom, “Ngo mokanlükhunankün khako ngü ni hau ti chhi-iau aiuji ngütü angio.” Elishaüh thalakü ngiom, “ngü nitü lilotsün noin ta nge-au ni nou oukong haoson ngo hau alou-i.”

¹⁰Elijaüh thalakü ngiom, “Nung akiu au achek tsak noutü kojaji.” “Lüko ni ngo, ni ainou kankü khu- tsün taoko epnaito ni nung oukong eppe; naiuso ni ngü tsüepnaito, ni kojatsün oukong tsüeppe.”

¹¹Ngüne yamko chitekü tsakeitsün taoko, alekta mokthso nou tenkü in tsamkei tsak ngüne jetko shin, naiuso Elija maou nai Goa ahsheih tsak tsangkü kankü khuwan.

¹²Elishaüh nung ep, naiuso Elija tü vekü ngiom, “Jüpo, jüpo! Israelhai kiplotsün akongting! Ni khuwanniu!” Naiuso apaüh Elija tilaitso tsüepshi. Amongsaiu nou, Elishaüh apa phakhut nime hau chipek.

¹³Nungai apaüh Elija ainou salitsün phakhut lou, küta khukü Yordan haiukuk nai tsa.

¹⁴Apaüh Elija ün phakhut nou khiam tü shiuhkü ngiom, “Elija ün Goa APAOU nou tiai noin?” Loüh apaüh khiam noutü shiuhshin, naiuso nung nime hau janthat, naiuso apa haiu-etsai gohwai nai tsakeikü shikhu.

¹⁵Yeriko ainou e-po aopungo nousoüh apa epkü ngiom, “Elija oukong nou Elisha da noin!” Ngüso Elisha ko pheteau khuküta, apa khako kauthio

¹⁶kü ngiom, “Sam nungko aopungo ngoikü noin, apem oukong khaiunia jije. Sam khuküta ni nou APAOU tü thapko. Tsüngean, APAOU onthso nou apa kankü khuküta king naiuso tsamei ajantso ai letaiuwankü noi-e.” Elishaüh thalakü ngiom, “Nya, asam tsükhuau noin.”

¹⁷Lüko ngüso khu-iau apaüh mongiokün lektso ngüsoüh tsülaokü sangkü noiküla. Nung aopungo nousoüh ajekhaiu samnyi ngoikü king atsok si anyap apem ai khukü Elija tü yam, lüko apa tsüepsan.

¹⁸Nungai ngüso Elisha Yeriko ai taiuwenoitsün dongai laokü shin, nungai apaüh ngüsotü ngiom, “Ngo asam tü lakhu ta tsüngio süne?”

¹⁹Yeriko ainou khaiunia ajantso Elisha dongai khukü ngiom, “APAOU, nung noknio aleng amei tsak noin ta ni ngeji, lüko khiam nou tsümei naiuso nungüh methsohai achettao mosaokü nai khuwanji.”

²⁰“Chiu ayan tsak ko jem intso thiokü ta nung jüdongai kankü ashi,” ta apaüh thoilut. Ngüsoüh nung apa dongai kankü shin,

²¹naiuso apa haiu nai khukü, nung jem khiam ai yakthio, naiuso ngiom, “Nungti APAOU nou ngioji: ‘ngü nung khiam sangkü iula-i iu, naiuso loto nungüh esimo tsüdekünai methsohai achettao mosaokü nai khuwantsün tsünoishi-e.’”

²²Naiuso nung khiam Elishaüh ngiotsün tao ainou angiotsünli sanglingkü noin.

²³Elishaüh Yeriko wankü Bethel ai khu, naiuso apa yamai khu taoko nung noksong ainou melothso ajantso shikü apatü nyailutkiukü “Ni khaiunam, nung ainou lükhuwan!” ta ngüsoüh wekü ngiom.

²⁴Elishaüh phiai lapshikü thap, naiuso ngüso tü langlutkü, APAOU nou nianko ngüso athesan kiu. Nungai liutsa ainou shap anyiu nime shikü nung melothso aopülekü nime nouso nelangkü chipekküwan.

²⁵Elisha Karmel King ai khu, naiuso intso noiküta Samaria ai laokü shin.