Read Khiamniungan Naga 2 Nokpao 24 Bible Online

2 Nokpao 24 - Khiamniungan Naga bible

2 Nokpao 24

¹Jehoiakim nokshing noitaoko, Babilonhai Nokpao Nebukat- nezarüh Yihuda monglowan, naiuso pon süme Jehoiakim tü apa nokshing khemai shiau koja; nungphiai apaüh khengshiau tsalo.

²APAOU nou Babilonhai süpai Siriahai süpai, Moabhai süpai, naiuso Ammonhai süpai, Yihuda lotheau Jehoiakim thako khengshikü hongshin, nung APAOU nou apa yathsüotsün e-po nouso tsangkü apaüh chhi-e ta ngio- taiutsünli thawaokü noiküla.

³Nung Yihudahai APAOU nou apa nioko ainou lomowanau ngiotaiutsün thawao, tiautenai nung angei apem Nokpao Manaseüh chhin,

⁴naiuso mothikü apaüh angei tsülepkün khaiuniahoi loatkü wan. APAOU nou nung thaiutha Manase hau awankiuao tsüshiokü noiküla.

⁵Nokpao Jehoiakimüh chhisiyatsün alum Yihudahai Nokpaohoi Ngiolat Thsam nai satkü taim.

⁶Jehoiakim ean, naiuso apa thso Jehoiachinüh apa nokpao noikham lilo.

⁷Ijiphai Nokpao naiuso apa süpaihoiso loto Ijip ainou tilaitso tsüshishi, tiautenai Babilon Nokpao nou loto Ijip haoson goumchi apem, Eufrates Haiu ai yanou Ijiphai goumchi ajepekki elung saokü ngüso nokpao oukong khemai shiankü noiküla.

⁸Tilai Jehoiachin Yihudahai nokpao tsalo, apa achetpon chekü pejei noiküla; naiuso apaüh Yirusalem nai pon süme nok-shing. Apa nyiu Yirusalem ainou Elnathan menyiuthso Nehusta noiküla.

⁹Apa po khekkü Jehoiachinüh APAOU thako angei nou chhin.

¹⁰Apa nokshing taoko Babilonhai süpai, Nokpao Nebukatnezar khem- ko asonghoi nou niakü, Yirusalem thako tsalo naiuso nung lemlowan.

¹¹Yirusalem lemlotsün taoko Nokpao Nebukatnezar apa pem lüko Yirusa- lem ai shin,

¹²naiuso nungko Nokpao Jehoiachin, apa nyiu, apa thsoso, apa khemko noitsün asong- hoiso, naiuso nokpao tsamai asong- hoi nouso Ba- bilonhai phamongai napan. Nebukat- nezar nokshing pon püjei nouko apaüh Jehoiachin sua ao kankü khuwan

¹³naiuso Amkham Tsam si Nokpao Tsam ainou chaiou jengtsaiu nouso apem Babilon ai kankü khuwan. APAOU nou khapiam ngiotaiutsünli, Nebukatnezarüh Nokpao Solomonüh shantaiutsün Amkham Tsamai kankeiau chaiou lakkeng chiusilak apem lothean.

¹⁴Nebukatnezarüh Yirusalemhai, nokpao nouso tsam- mongso apem, ahei khaiunia nouso apem, apem kamkü nai heng 10, 000, sua au kankü khuwan. Loüh apaüh waimon khaiuniahoi, sonlanghoi Yihuda naito tsosilutso hailu potaiukü apem nialokü khuwan.

¹⁵Nebukatnezarüh Jehoiachin apa nyiu, apa tsammongniuso, apa khemko noitsün asonghoi nouso, naiuso Yihudahai aniakeihoi nouso Babilon nai sua ao kankü khuwan.

¹⁶Nebukatnezarüh Yihudahai ateng khaiunia nouso apem nai heng 7, 000, chhisiya nai montsün heng 1, 000, sonlanghoi hakü, naiuso süpai chhisiya nai hau waokü noitsün khaiuniahoi apem Babilon goumchi ai nialokü khuwan.

¹⁷Nebukatnezarüh Jehoiachin po ehen nou Matania Yihudahai nokpao au shankiu küta apa nian Zedekia ta liankiu.

¹⁸Tilai Zedekia Yihudahai nokpao tsalo, apa achetpon kheikü tsak noiküla, naiuso apaüh Yirusalem nai pon chekü tsak nok-shing Apa nyiu Libna noknio ainou Yerimia menyiuthso Hamutal noiküla.

¹⁹Nokpao Jehoiachinüh chhisiyakü shitsün lilu Nokpao Zedekiaüh APAOU thako angei nou chhin.

²⁰APAOU nou Yirusalemhai naiuso Yihudahai thako mongmat küta apaüh ngüso apa nioko ainou lomowan.