Read Khiamniungan Naga 2 Nokpao 25 Bible Online

2 Nokpao 25 - Khiamniungan Naga bible

2 Nokpao 25

¹Nokpao Zedekiaüh Babilonhai Nokpao Nebukatnezar tü khengshikü tsalo, nungtiphe Nebu- katnezar apa süpaihoiso apem hakü Zedekia ün nokshing pon lükao nouko alei che ajekhaiu chenyih nouko shikü Yirusalem komhe-an. Ngüsoüh noknio pechi nai asaothang shan, naiuso nung noknio lemkü ngüsoüh ehüpuo shan,

²naiuso ngüsoüh Zedekia nokshing pon chekü tsak shingtsün saokü lemlokü taiuwan.

³Nung pon mongkolu, alei püle ajekhaiu lükao nyih nouko, tilai naiusile nou thatü thsüokü iulakü khaiuniahoi nou heshiuau titso tsüpoishikü iulawan ngüsoüh,

⁴noknio pe nou losattan. Nung noknio Babilon haiüh lemjeikü noian lüko, süpaihoi apem aso taoko khulükhunan, ngüso nokpao aimong yam tsangkü pe nime jipetsün Yordan Tsamei dongai khulükhunan.

⁵Lüko Babilonhai süpaihoi nou Nokpao Zedekia tü komkü khukü apa Yeriko shimkü tsamei nai thaloum, naiuso apa süpaihoisoüh apa le-ankü khuwan.

⁶Zedekia Nokpao Nebukat- nezar dongai kankü khu, nung taoko apa Ribla noknio nai noiküla, naiuso nungko Nebukatnezarüh apa loatkü wanau ngiokhem kiu.

⁷Zedekiaüh thapkü noikü, apa thsoso loatkü wan; nungthankü Nebukatnezarüh Zede- kia ün niovei koppankiukü son au nou kekü wan naiuso apa Babilon ai kankü khuwan.

⁸Babilonhai Nokpao Nebukatne- zar nokshing pon chikü lükao alei pungo ajekhaiu chinyat nouko nai Nebuzaradan, sau nokpao hau ayam- hantsün naiuso apa süpaihoi ahei thetsün Yirusalem ai nap.

⁹Apaüh Amkham Tsam, nokpao tsam, naiuso Yirusalem nai khaiunia ateng nouso apem tsam in nou jekthiowan,

¹⁰naiuso apa süpai hoisoüh noknio pe nouso lothean.

¹¹Nungai Nebu- zaradanüh noknio nai poitaiutsün chhisiya nai montsün khaiuniahoi nouso, noknio nai poitaiutsünso, naiuso sauhai nokpao dongai khulut nungso apem Babilonai kankü khuwan.

¹²Lüko apaüh tsosilaoting khaiuniahoi ajantso sauhaiüh jengtsaiu tsütaiu nungso Yihuda nai ngüso sainaoshep eiu naiuso eiu nouso ai chhisiya au wankü khuwan.

¹³Babilonhaiüh taoson kheam nouso athoikeitsün tsamkei nouso naiuso taoson temkhao asong Amkham Tsamnai taiutsün ko hakü lothekü wan, naiuso ngüsoüh taoson jengtsaiu nouso apem Babilon ai kankü khuwan.

¹⁴Ngüsoüh chap, in mut, sübao amthang shetyanau kankeitsün, tson sontsün taoko kankeitsün jengtsaiu, aloat chaithio thiotsün taoko she khailotsün, angan- nyam jah taoko kankeitsün chiu, naiuso amkham chhisiya nai kankei- tsün amao taoson jengtsaiu nouso apem kankü khuwan.

¹⁵Ngüsoüh chaiou lakkeng tsüdekünai tangka- son nou shantsün inkaio jek nai kan- keitsün chiu nouso lüko monglokü alum jengtsaiu kankü khuwan.

¹⁶Nokpao Solomonüh Amkham Tsam thaiutha shantsün taoson jengtsaiu nouso-kheam nime, athoi- keitsam tsamkei, naiuso temkhao asong nungso tsoithat nai thatü lethsangkü noiküla.

¹⁷Kheam nime nou alengyam amomo nungti noiküla: Kheam pungkü atheng nai meter 8, naiuso nung chiai alengyam- lutkü lung sotsom taiu, naiuso nung kheam atsok nai 1:3 meter noiküla. Nung taoson kheam chiai lung aleng yamlutkü sotsom taiutsün sasashep hakü taoson nou shan.

¹⁸Nungko hakü, Nebuzaradan, sau süpai ahei noiküla, apaüh akhengting meson Seraia, apa khemko nou meson Zefania, naiuso amao khaiunia amkham tsam nai ateng süme hakü Babilon ai sua au kankü khuwan.

¹⁹Noknio ainou apaüh süpaihoi khako ahei tsak, noknio nai noitsün nokpao ün tengkhaiu ayamhantsünso khaiunia pungo, süpai ahei yathsüotsün sau süpaihoi khako asong noiküla, naiuso amao ateng khaiunia aoluok kankü khuwan.

²⁰Nebuzaradanüh nungso Babilonhai nokpao sau Mamat goumchi ai, Ribla noknio nai noiküla apa dongai kankü khuwan.

²¹Nungko nokpao nou ngüso tü shiuh naiuso loatkü wan. Nungti Yihudahai ngüso goumchi ainou me goumchiai kankü khuwan.

²²Babilonhai Nokpao Nebukat- nezarüh Shafan thsao Ahikam thso Gedalia Yihudahai nokshingpaou au shankiu, naiuso apa Babilonhai goh ai kankü tsükhukünso apem khako apaotsangau taiukium.

²³Tilai Yihuda hai asonghoi naiuso süpai asonghoi sauhai Babilon nokpao phamongai tsünaphakü noiküla ngüsoüh nung thaiutha ngio lula, ngüso Mizpa nai Gedalia ko hoilutküla. Nungso asonghoi nouso: Nethania thso Ishmael, Karea thso Johanan, Tanhu- met thso Seraiapa Netofa noksong ainou noiküla, naiuso Maaka ainou Jezania noiküla.

²⁴Gedaliaüh ngüsotü ngiom, “Babilonhai asonghoi lun hatau asam ti pokü tsünoi. Nung goumchi ko anoilo, Babilonhai nokpao ayathsüo, naiuso asamko alum meikü khu-e.”

²⁵Lüko nungpon nouko alei chinyat nouko nai, Elishama thsao Nethania thso Ishmael, sau nokpao tsammongso nongko mepem tsak noiküla, apa khaiunia che nialokü Mizpa ai khukü Gedalia tü pha po naiuso apa loatkü wan. Apaüh Israelhai naiuso Babilonhai sauhai apako hakü noiküla ngüso lüko loatküwan.

²⁶Nungai Israelhai apem, memei naiuso tsosilu aikü süpai asonghoiko kamlutkü tsalokü Ijip ai khu, tiautenai ngüso Babilon hailun hatkü noiküla.

²⁷Evilmerodak, Babilonhai nokpao au tsalotsün ponko nai, apaüh Yihudahai Nokpao Jehoiachin apa aketsam ainou sokshitsün tsangkü atsüojinyang hankü noiküla. Jehoia- chin sua ao kankü khuwan phiai pon aosamkü chinyat, alei chekü nime, ajekhaiu kheikü chinyat nouko nai nung thawaokü noiküla.

²⁸Evilmerodak apa hau atsüojinyang hankü taiu, apaüh Babilon nai apako aikü kankü khuwantsünso amao nokpao nouso khako nai apa hau asuhat asong naiuso noikham atsok- tso kiukü noiküla.

²⁹Nungti Jehoia- chin apa akeshitho ainou liankü apa aakihlaiu thathunkü thaiutha nokpao thaisam puo nai heau ayam sopkiukü noiküla.

³⁰Apa aakihlaiu thathunkü, ajekhaiu pungkü apaüh pohtsün thaiutha apa hau amai kiukü noiküla.