Read Khiamniungan Naga 2 Nokpao 3 Bible Online

2 Nokpao 3 - Khiamniungan Naga bible

2 Nokpao 3

¹Yihudahai Nokpao Jehoshafat nokshing pon chekü petjei nouko nai, Ahab thso Joram Israel nai nokpao tsalo, naiuso apaüh Samaria nai pon chekü nime nok-shingkü noiküla.

²Apaüh APAOU thako angei sunlo. Lüko apato apa po tsüdekünai apa nyiu Jezebel lito tsütsaothe; apaüh apa poüh amkham au Baal sotsom shantaiutsün lothean.

³Lüko, apa khako Nebat thso Nokpao Jeroboamüh chhisiyatsün khekkü apaüh Israelhai angei nai nialükhun, naiuso nung chhisiya ainou tsülaolo.

⁴Moab Nokpao Mesha nung onne- mok nyimtsün tsak noiküla, naiuso apaüh pon pungkü Israelhai nokpao hau onnemok thso 100, 000, naiuso onnemok 100, 000 ainou apon nou asuhat nianlom paopei kiukü noi- küla.

⁵Lüko tilai Israelhai Nokpao Ahab ean, Meshaüh Israel thako khengshin.

⁶Nokpao Joram Samaria wankü khuküta apa süpaihoi apem jamaolu lokam.

⁷Apaüh Yihudahai Nokpao Jehoshafat dongai ngio hong; “Moabhai Nokpao nou ngü tü khengshikü noin; apa thako ehli au ni ngüko ha-emo?” “Ngo ha-e,” ta Nokpao Jehosha- fatüh thala. “Ngo angio mongko noin, nungli jü khaiuniaso naiuso jü mokthso nou- soüh noin.

⁸Sam akomao thaiutha yam tisübao tsangkü khu-e?” Joramüh thalakü ngiom, “Edomhai liutsa thsatkü nai, yam alaiu nai sam khu-e.”

⁹Nungtiphe Nokpao Joram naiuso Yihudahai Nokpao nouso naiuso Edomhai nokpao nouso tsalokü khu. Chinyatnyi tsakeikü phiai, ngüso khiam kheman, naiuso khaiuniahoi si thsakantsün thainian nouso thaiutha titso tsüpoishi.

¹⁰“Inyate!” ta Nok- pao Joramüh wekü ngiom. “APAOU nou sam nokpao süme nouso Moab hai nokpao phamongai kiuwaniu!”

¹¹Nokpao Jehoshafatüh sangkü ngiom, “Samüh APAOU tü semseiau lümeikü nungko e-po tsak noimo?” Nokpao Joram khemko noitsün asonghoi tsaküh thalakü ngiom, “Shafat thso nou Elisha nungko noin. Apa Elija ko hachu-etsün tsak noiküla.”

¹²“Apa e-po atsüo nou tsak noin,” ta Nokpao Jehoshafatüh ngiom. Nungtiphe nokpao süme nouso Elisha dongai khu.

¹³Elishaüh Israelhai nokpaotü ngiom, “Ngü nitü tiao hachu-e?” “Khukü apo si anyiusoüh semseitsün e-po nousotü lüsemseilo.” Nokpao Joramüh thalakü ngiom, “Tsüde! Sam nokpao süme nouso Moab hai nokpao atsüojinyang nai kiuwantsün nung APAOU nou noin.”

¹⁴Elishaüh thalakü ngiom, “Ngü ni jipetaiutsün Yihudahai Nokpao Jehoshafat asuhat tsünoitünto, ngo asam hau chhikiuau ti tsünoi-ela ta ngü yathsüotsün aa noitsün APAOU nianko ngiomong shingkü ngioji.

¹⁵Lo jü dongai jihangtsün khaiunia tsak nialokü ashikiu.” Jihang khaiunia nou apa poipoi matnai Elisha khako APAOU oukong nou shin;

¹⁶naiuso apaüh ngiom, “APAOU nou nungti ngioji: ‘Wailakü noitsün haiutsongan tsamei apem nai khan lüthaiu.

¹⁷Asamüh ou tsüdekünai asheih tsüep lüko, nung haiutsongan noitsün tsamei nou khiam nou mean-e, naiuso asam si asam thainianso, naiuso thsa meankü kantsün thainian nousoüh khiam ashiu au saiukü eppe.’”

¹⁸Elishaüh tsülaokü ngiom, “Loüh nung chhisiya au APAOU thaiutha achek tsüde; apaüh asam hau Moabhai khako ashiolotsün kiu-e.

¹⁹Asamüh ngüso aleng amei noknio nouso shiolo-e; asamüh ngüso shep- pai nouso apem sahhongan-e, ngüso khiamngan nouso phangankiu-e, naiuso lung nou tsappoktsün tsangkü ngüso ün tsamei gohtsa goh nouso lotheane.”

²⁰Nungthan nyap, ngüsoüh ahom tsütokü aloat chaithio kiutsün taoko nai, khiam nou Edomhai dongai nou tsangkü saom; naiuso goh nou thapokkü noiküla.

²¹Tilai Moab haiüh nokpao süme nouso ngüso komau shikü noin ta lula, ngüso ashe ainou ehen saokü dun kankeiau montsün apem jonkam küta elung nai noikü taiu.

²²Nungthan nyap tilai ngüso choun, aje nou khiam chiai jelut, nou athapau sheli sengkü noikü ep.

²³“Nungto she noin!” ta ngüsoüh lekkatkü wekü ngiom. “E süpaihoi süme nouso ngüso si ngüso ongko chija li-ekü tsaküh tsak loat-ekü iula! Sam khukü naiuso ngüso saothang nou yanheanko!”

²⁴Lüko tilai ngüsoüh asaothang nou shisaom, Israelhaiüh ngüsotü poh naiuso ngüso laplokü komshi-an. Israelhaiüh akomtsün tsülaolokü Moabhai chaoat

²⁵naiuso ngüso nok- nio nouso lothean. Ngüso khengtaiu amei tsak yankü shinai, Israelhai pungkü nou nung tsamei motha- pokkün lektso lung yakthio; ngüsoüh khiamngan nouso kiapankiu naiuso sheppai nouso chaothiowan. Athun nai noknio Kir Heres lu poiküla, naiuso lung koptsünsoüh lemloküta koman.

²⁶Tilai Moabhai nokpao nou apahoi nou ehli tsüshioji ta ngesan, apaüh sah loktsün khaiunia tsom 700 apako nialokü ehoi noitsün chatkü khukü ta Siriahai nokpaoko akiplo yamao kowe, lüko apaüh ashio tsüep.

²⁷Nungtiphe apaüh apa nokpao noikham liloau noitsün thsoyam- chong nou nialoküta Moabhai goa hau aloat chaittaio tsak noknio lungpe nou chiai kiu. Israelhai hatatan naiuso ngüso noknio ainou soian küta ngüso goumchi ai laolokü khu.