Read Khiamniungan Naga 2 Nokpao 4 Bible Online

2 Nokpao 4 - Khiamniungan Naga bible

2 Nokpao 4

¹E-pohoi ongko tsaküh taiulatsün jihinyiu tsak khukü Elisha tü ngiom, “Asonghai, jü tsammongpo eaniu! Ni ngeji, apa goalun hattsün khaiunia tsak noiküla; lüko lo apaüh tangka laiolo taiutsün khaiunia tsak nou shikü jüthso melothso nime nou jü tsammongpo chailaiu thaiutha sua ao kankü khuwanau noin.”

²Apaüh sangkü ngiom, “Ngü athaiutha ti chhikiu-e?” “Ni tsamai ti taim nung ngo hau achite?” Nyiuhai nou thalakü ngiom, “Olip khiam taiutsün meng ehentso noutü simkü titso tsütaiu.”

³Elishaüh nyiuhai noutü chitekü ngiom, “Aphaosiposo dongai khukü ta ni shiotsün lektso meng akeng piakü lulaiolo.”

⁴“Küta ni naiuso athsone tsamai lünap, kou nou lükiap, naiuso nung meng akeng nousoko khaiutsom lothioau lüyalo. Nung mean küta thunkü meng pungkü nou amomo ta ataiu.”

⁵Nungtiphe nyiuhai nou apa thsone hakü apa tsammongai napkü kou nou kiaplo, olip khiam meng ehentso nou lo, naiuso apa thsoneüh apahau kankü shikiutsün meng nousoko khaiutsom nou tsathio.

⁶Tilai ngüsoüh meng nouso apem thamean, nyiuhai nou loüh noishi süne tsünoishi ta sang. “Nung aphi- teng ta” apa thsone ongko tsaküh thalakü noiküla. Naiuso olip khiam nou tsangtsün laowan.

⁷Nyiuhai nou apatü sauüh nung chhiao ngiothilut, nung e-po Elisha, dongai laokü khu, nungai e-po nou nyiuhai noutü ngiom, “Nung olip khiam lüjan küta asam chailaiu nouso apem lüthaman, naiuso loüh ni naiuso athsone aakih au tangka saiukü poisankü noi-e.”

⁸Nyitso Elisha memei Menyiu kihtsün Shunem nai khu. Nung nyiuhai nou apa thaisam tsakko jonkü noiküla, naiuso nungai yanou apa Shunem nai khutsün pungkü nung nyiuhai nou tsamai heshiukü noiküla.

⁹Nung nyiuhai nou apa tsammongpo tü ngiom, “Nung khaiunia sau nungko asaita shiji apato asio khaiunia tsak ta ngo monglamji.

¹⁰Samüh tsamkhaiu nai tsampai tsak lataiukiuko, küta nungko then tsak, puo tsak, noikham tsak, tsoi tsak taiukiukü naiuso titaoko apaüh samtü sailu-e apa nungko noiau shio-e.”

¹¹Nyitso Elisha Shunem ai laokü shinai aalu ao apa tsampai ai sungh.

¹²Apaüh apa yathsüotsün Gehazi tü khukü nung menyiu noutü lüjon ta ngiom. Tilai nung nyiuhai nou shin,

¹³apaüh Gehazi tü ngiom, “Samüh pohtsün thaiutha apaüh angja thumkü lokü chhikiukü shitsün amai laoshikü kiuao ngü nung nyiuhai thaiutha ti chhikiuao shio-e ta nung nyiuhai noutü lüsang. Tsüngean, nung nyiuhai nou ngü apa thaiu- thako nokpao tsüdekünai süpaihoi ahei nouso dongai khu-iküta apa thaiuthako ngiomei ngiokiu-iau mengchiokü tha-e.” Nungai nung nyiuhai nou thalakü ngiom, “Ngo nungko jü khaiuniaso ongko ngü pohtsün alum taim.”

¹⁴Elishaüh Gehazi tü sangkü ngiom, “Nungaito ngü nung nyiuhai thaiutha ti chhikiuau shio-e?” Apaüh thalakü ngiom, “Nung nyiuhai melothso tsüha, naiuso apa tsammongpo sonthepao tsak noin.”

¹⁵Elishaüh ngiokhem kiukü ngiom, “Nung nyiuhai noutü nungai ashi ta lüngio.” Nung nyiuhai nou shin naiuso apa kou dongko tsakü noian,

¹⁶naiuso Elishaüh nyiuhai noutü ngiom, “nungthan pon nouko nungtaoko nai ni melothso tsak aphako thumkü noi-e.” “Oh!” ta nyiuhai nou lekkatkü wekü ngiom, “Tsüojinyangkü, APAOU, ngühau yaang lachite. Ni Goa khaiunia tsak noin!”

¹⁷Lüko, Elishaüh ngiokü taiutsün khekkü, nungthan ponko nungtao ting nouko nyiuhai nou melothso tsak chetkiu.

¹⁸Pon intso phiai, be-eiuyam taoko, nung melothso nou apa po sau be-eiuyamtsün nai chhisiyatsünso ko hakü eiuai noiküla apako chhiha au ahom khu.

¹⁹Alekta nung methso nou apa potü, “Jü khaiu tawai iu! Jü khaiu tawai iu!” ta sang asong nou vekü shikü noiküla. “Nung melothso nou apa nyiu dongai kankü lükhu,” ta apa poüh ayathsüotsün tsak tü ngiom.

²⁰Nung ayathsüotsün tsak nou melothso nou apa nyiu dongai laokü kankü khu, nungai apa nyiuüh apa anyiwem tao saokü apa shiokha nai thom naiuso apa ean.

²¹Nung nyiuhai nou apa thso Elisha tsampai ai kankü sung- küta then chiai taiukü apa phiai kou nou kiaplokü khuwan.

²²Nungai apaüh apa tsammongpo jonshi küta apatü ngiom, “Tsamki tsak nungai gado tsak kankü ahong. Ngo e-po Elisha dongai khuau pohkü noin. Ashiotsün lektso ngo piamkü laokü shi-e.”

²³Apa tsammongpoüh apatü sangkü ngiom, “Ni lonyi tiau khuau noin?” “Nung Sabbat ajekhaiu lüko tsüde, tsüdekünai Alei Yan Sümai lüko tsüde.” Nyiuhai nou thalakü ngiom, “Ti tsüyange.”

²⁴Nungai nung nyiuhai nou gado chiai moknoi, küta tsamki noutü ngiokhem kiukü ngiom, “Gado nou titi thatso khaolaoji nungti akhu-i, ngü tsüngiokün lektsoto nung layamlu-i.”

²⁵Nungtiphe nyiu- hai nou Elisha noitsün Karmel king ai khuau tsalokü khu. Elishaüh nung nyiuhai loüh laiukü jetekü naita apa dongai shitsün ep, naiuso apaüh apa yathsüotsün Gehazi tü ngiom, “Athaplu-nungai Shunem ainou menyiu nou shiji!

²⁶Apa dongai liukü lükhu naiuso apa si apa tsammongpo naiuso apa melothsoso meikü noin süne tsünoi shakta atsangsheisan.” Nung nyiuhai nou Gehazi hau alum meikü nointa chite,

²⁷lüko tilai nung nyiuhai nou Elisha dongai shin apaüh apa khako kauthio küta Elisha hok nai thalo. Gehaziüh nung nyiuhai nou thoianetünai, Elishaüh ngiom, “Nung nyiuhai nou nyankü ataiuwan. Nung nyiuhai nou thatü mongkiakü noin ta ni tsüep süne? Naiuso APAOU nou ngo tü nung thaiutha titso chitekü tsünoi.”

²⁸Nung menyiu nou apatü ngiom, “APAOU, ngü nitü melothso tsak thaiutha sangkü noilümo? Ngü nitü jü ayang lalochu ta tsüngio süne?”

²⁹Elishaüh apa yathsüotsün Gehazi dongai saluküta ngiom, “Liukü! Jü pailai loküta lükhu. Ni phetetsün sauhaiüh nitü salam kiu-e, nungtü thalaau atao lawan. Tsamtha saitha khuküta jü pailai melothso nou chiai lüketaiu.”

³⁰Nung menyiu nou Elisha tü ngiom, “Aa noitsün APAOU naiuso nitü jü mongkiutsün tsangkü ngü ni tsülean-e ta ngü ngiomongshingkü thaloji!” Nungtiphe ngüne nemtso aikü laokü khuau tsalo.

³¹Gehazi kha ai khuküta, Elisha pailai nung methso nou da lelut, lüko nungko ti tsüsingio tsüdekünai aa noin ta ii titso tsühan. Nungtiphe apa Elisha dongai laokü khukü ngiom, “Nung melothso nou tsüchunge.”

³²Tilai Elisha shisaom, apa pemsa tsampai nai nap naiuso nung melothso nou apaüh then ai eankü ep.

³³Apaüh kou nou kiapan küta APAOU tü misao sao.

³⁴Nungai apa melothso nou chiai apa son, niovei, naiuso pha nouso thakü sailut. Apa nung melothso nou chiai lulakü saitsün ko, nung melothso nou pem lamkü iulaao yachu.

³⁵Elisha asai ainou chu, tsampai nai tsak, naiuso loüh laokü khushikü nung melothso nou pem chiai sailutshi. Nung me- lothso nou chinyatjam hatshiongiokü noiküla, naiuso nung thanko apa niovei sopsat.

³⁶Elishaüh Gihazi tü jonküta methso nou nyiu ta lüjon ta ngiom. Tilai nyiuhai nou tü ngiom, “Athso nungko noin.”

³⁷Nung nyiuhai nou Elisha khako apa khakheng nou gohtü thankü kauthio; nungphiai nyiuhai nou apa thso nialokü khuwan.

³⁸Atao tsak ko nung goumchi nai naiusile noitaoko, Elisha Gilgal nai laokü shin. Tilai apaüh e-po ahoi tsak tü tsandekü noiküla, apaüh apa yathsüotsün tü lak asong tsak alelut naiuso ayamtheng ta.

³⁹Ngüso ongko tsak khengtaiu nai kiansünga yamao khu. Apaüh liu ai noitsün kian auo tsak ep, naiuso eiu nou shiotsün litso kamlo. Apaüh nungti ta tsüngekü kankü yakü thengsan.

⁴⁰Nung kian nou khaiuniahoi nou heshiuau khaiusan, lüko ngüsoüh nung seplukü thunkü Elisha tü jonkü ngiom, “Nung she noin!”- naiuso nung tsüheau noin.

⁴¹Elishaüh eheshiu intso saoküta nung lak nai thiokü ngiom, “Ngüso thaiutha loüh kian intso piakü akhaiusan.” Naiuso nung thankü to nungtü ti aphio tsühakü noiküla.

⁴²Atao müjam nouko, Baal Shalisha ainou khaiunia tsak shin, naiuso apaüh Elisha hau nungpon chongting barli tso be-eiuyamtsün ainou shankü themtsai eknime, naiuso chonglam kankü shikiu. Elishaüh apa yathsüotsün tü e-pohoi nouso nungüh tsadao ngiom,

⁴³lüko apaüh thalakü ngiom, “Khaiunia tsom tsak thaiutha ni nungüh saiu-e ta yangji süne?” Elishaüh thalakü ngiom, “Ngüso hau nung eheau lükiu, tiautenai ngüsoüh heküta loüh ajantso poishi-e ta APAOU nou ngioji.”

⁴⁴Nungtiphe ayathsüotsün nou eheshiu ngüso khako khemkü taiukiu, naiuso APAOU nou ngiotsünli, ngüso apemüh heshiu naiuso nungko loüh ajantso poishikü noiküla.