Read Khiamniungan Naga 2 Nokpao 5 Bible Online

2 Nokpao 5 - Khiamniungan Naga bible

2 Nokpao 5

¹Siria hai süpai ahei Naman nung Siria hai nokpao nou wesankü noiküla, tiautenai APAOU nou Naman ahei tsangkü Siriahai süpaihoi hau ehoi thako ashiolotsün kium. Apa süpai asong tsak lüko apatü jeekia sunkü noiküla.

²Siriahaiüh Israelhai jam komhetsün taoko, Israelhai menyiuthso tsak thalokü khuwan, naiuso nung menyiuthso nou Naman tsammongnyiu yathsüokü noiküla.

³Nyitso apaüh meshen yathsüo- kiukü noitsün nyiuhai noutü ngiom, “Ngü jü APAOU Samaria nai noitsün e-po tsak dongai khu-i au mongchioji! Nung e-po nou apa jeekia lomeiau shiom.”

⁴Tilai Namanüh nung lulan, apa nokpao dongai khuküta menyiuthso nou ngiotsün apa hau chiten.

⁵Nokpao nou ngiom, “Israel- hai nokpao dongai lükhu naiuso apa hau nung thsamsat lükiu.” Nungtiphe Namanüh tangkason heng 30, 000 chaiou lakkeng heng 6, 000, naiuso neshe ali-etsün amei che kankü tsalokü khu.

⁶Nung thsamsat apaüh kankü khutsünko nungti satkü noiküla: “Nung thsamsat nou jü khemko asonghoi ongko tsak nou Naman tsangshei kiu-e. Apa akia nihau lomeikiu-iau ngo mongchioji.”

⁷Tilai Israelhai nokpao nou nung thsamsat velu, apaüh apa neshe chipekkü vekü ngiom, “Titi thekü nung khaiunia nou meilaau Siriahai nokpao nou ngütü ayang noi-e? Ngo aa naiuso Ee suntsün Goa ta apaüh yangji süne? Apa ngüko ehli tsaloau koweji ta nungüh kha khakü hanji!”

⁸Tilai e-po Elishaüh ti thawaokü noin nung thaiutha lulan, apaüh nokpao dongai ngiohong: “Ni tiauta nungti mongmatji? Nung khaiunia nou jüdongai ahongshi, naiuso ngo Israel nai e-po tsak nou apa hau han-e!”

⁹Nungtiphe Naman apa mokthso nouso naiuso tsamkei nouso lokü khu, naiuso apa Elisha tsamai nap- tsün koukhanko laowan.

¹⁰Elishaüh Yordan Haiu nai chinyatjam apa chija lüpengthio naiuso nungaito apa meshen akia ainou thumkü meila-e ta ngioau apa yathsüotsün tsak hong.

¹¹Lüko Naman mongmatkü ngiom, “Apa titilünou khengchiai shiküta, apa Goa, APAOU noutü akia nai pha laphukü misaokiu küta ngü lomei-e ta ngo yangkü noiküla!

¹²Nungkoto Israel nai amao haiu noutü simkü meikü, Damaska nai Abana si Pharpar haiuso tsünoi süne? Ngo nung haiu nousoko tsawankü hau shio-ela!”

¹³Apa yathsüotsünso apa dongai süngkü ta ngiom, “APAOU, ni chhiao chhi achek ajantso e-po nou ngiokü noinai, ni nung chhiau noin. Nungaito, lo apaüh ngiotsünli, achija tiauta tsütsaowan, naiuso meilakü tsünoi?”

¹⁴Nungtiphe Naman Yordan Haiu ai saom, nungko apa chija chinyatjam lim, nung Elishaüh ayamhantsünli chhin, naiuso nungai apa thumkü meila. Apa khun mongkü naiuso ameilihai khunli iula, nung khakoto methsohai khun khekkü sethupkü noiküla.

¹⁵Apa Elisha dongai apa khaiuniaso apem hakü laokü shiküta ngiom, “Lo Israelhai Goa chiai amao goa tsünoi ta ngü ngeji; nungtiphe atsüojin- yangkü, APAOU, ngo ainou paopei tsak alou.”

¹⁶Elishaüh thalakü ngiom, “Ngü yathsüotsün APAOU aa noitsün lektso, ngü paopei tsülou-e” ta ngiomongshingkü ngioji. Namanüh apatü nung paopei alou ta kojaji, lüko apaüh nung tsülou.

¹⁷Nungtiphe Namanüh ngiom, “Ni jü paopei tsüloukü naito, nungaito ngü pu nou mokthso nimeko tsamai kankü khuko, tiautenai lo yakü ngü APAOU tü simkü amao ti goa hau lüko aloat chaithio tsüdekünai ajahtsün chaithio nouso tsükiu-e.

¹⁸Nung- tiphe tilai ngo jü nokpaoko Siriahai goa amkham tsam Rimmon nai khukü amkham kiu-e APAOU nou ngo hau awankiu-e sao ta ngü yangji. APAOU nou ngo hau atsüoting wankiu-e!”

¹⁹Elishaüh apatü ngiom, “Aalu nai lükhu.” Naiuso Naman pungekü khu. Apa shikü mokhukünai,

²⁰Elisha yathsüotsün Gehaziüh tilai apa chija mongai yanghekü ngiom, “Jü APAOU üh Naman hau titso amai tsünian-ikü khuwan-i-iu! Siriahai nou apa hau kiutsün apaüh louau noiküla. Aa noitsün APAOU nianko, ngo apa phiai jingkü khuküta apa ainou tso tsak to lou-e.”

²¹Nungtiphe apa Naman phiai tsalokü komkü khu. Tilai Namanüh khaiunia tsak apa phiai jingkü shitsün epm, apa meshen mokthso tsamkei ainou apa pheteau thaiutha saom, naiuso sangkü ngiom, “Tso aphio noin süne?”

²²Gehaziüh thalakü ngiom, “Tsünoi” “Lüko jü APAOU nou loteng Efraim king goumchi ainou e-pohoi ainou khaiunia nime shisaokü noin, naiuso apaüh ngüne hau tangkason heng 3, 000 naiuso ahelotsün neshe amei nime ta nungne hau kiu au mongchioji ta nitü ngioau ngo hong.”

²³Namanüh thalakü ngiom, “Tsüojinyangkü tangkason heng 6, 000 alo.” Apaüh nungtü tsülaokü koja küta, tangkason nou nekong nime ko thiokü keshi, naiuso ahelotsün neshe amei nime nou kiukü apaüh Gehazi khako apa yathsüotsün khaiunia nime hongan.

²⁴Tilai ngüsoüh Elisha kihtsün king nou shisaom, Gihaziüh nekong nime nou loküta tsamai kankü nap. Nungai apaüh Naman yathsüotsünso laokü honganshi.

²⁵Apa tsamai laokü shinai, Elishaüh apatü sangkü ngiom, “Ni tiai khukü noiküla?” “Oh, tiai tsükhu, APAOU,” ta apaüh thalakü ngiom.

²⁶Lüko Elishaüh ngiom, “Tilai khaiunia tsak apa mokthso tsamkei ainou saokü niko phetekü noiküla nungko ngo onthso nai tsünoikü lüsüne? Tangka, neshe, olipshep naiuso sainaoshep, onnemok naiuso jangtso, tsüdekünai ayathsüotsünso louau nung atao tsüde.

²⁷Nungtiphe lo Naman ün jeekia nou nitü sung-e, naiuso nung ni naiuso athsaosithsoso da asaita noi-e!” Tilai Gihazi laokü khuwan, apatü nung jeekia nou sungh -nungko apa khun nyinli thaiukü iula.