Read Khiamniungan Naga 2 Nokpao 6 Bible Online

2 Nokpao 6 - Khiamniungan Naga bible

2 Nokpao 6

¹Nyitso e-pohoi nou ahei Elisha tü ngüso tsüpothatsün ngiom, “Sam kihtsün athang thatü henkü noin!

²Sam Yordan ai khukü pai ajantso sahküta, sam kih au samüh tsamlah loau sam hau ayam asopkiu.” Elishaüh thalakü ngiom, “Asam lükhu.”

³Ngüso ongko khaiunia tsaküh apatü ngüsoko khuhaau koja; apa mongchiokü,

⁴ngüsoko aikü tsalokü khu. Tilai ngüso Yordan nai shisaom, ngüso chhisiya au tsalo.

⁵Ngüso ongko khaiunia tsaküh pai tsak sahhongnai, alekta apa Ou khiam nai sathiowan. “Ngü ti chhi-e, APAOU?”. Ta apaüh lekkat kü wekü Elisha tü ngiom. “Nung meko lailotsün ou noiküla!”

⁶“Nung tiko sathiowan?” ta Elishaüh sangkü ngiom. Nung khaiunia nou asathiowan- tsün athang nou apahau han, naiuso Elishaüh paikia tsak hesanküta nung khiam nai yakthio, naiuso nungüh Ou nou tsopkü sung-i.

⁷“Nung alosan,” ta apaüh ngiom, naiuso nung khaiunia nou kaukü napküta Ou nou junsan.

⁸Siraihai nokpao Israel haiko ehlikü noiküla. Apaüh apa khemko noitsün asonghoi nousotü semsei küta ngüso saothang au athang tsak shan.

⁹Lüko Elishaüh Israelhai nokpaotü nung athang nou shimkü lakhu ta lohat, tiautenai Siriahaiüh nungko ehjiokü noin ta ngiom.

¹⁰Nungtiphe Israelhai nokpaoüh nungh athang nai kihtsünso khaiuniahoi noutü lotsüokiu, naiuso ngüso tsolokü noiküla. Nung titi atao piaküjam thawaokü noiküla.

¹¹Siriahai nokpao nung thako thatü mongmat; apaüh apa khemko noitsün asonghoitü jon naiuso ngüsotü sangkü ngiom, “Asam ongko sauüh Israelhai nokpao ta jonji?”

¹²Ngüso ongko khaiunia tsaküh thalakü ngiom, “Asuhatkü noitsün Nokpao, sam sau tsünoi. Nung e-po Elishaüh ni atsampai ai ngiotsün lüko Israelhai nokpao hau chiteji.”

¹³“Ngo apa thaloau apa tiai noin nung ayamsan,” ta nokpao nou ngio kiukü ngiom. Tilai apa hau Elisha Dothan nai noin ta chiten,

¹⁴apaüh süpaihoi mokthso naiuso tsamkei nouso hakü hoi asong tsak hong. Ngüsoüh nok- song nou aso shisaom naiuso nung lemlo.

¹⁵Ahom beta Elisha yathsüo- tsün chuküta tsam ainou kengchiai khu, nungai apaüh Siriahai süpaihoi mokthso naiuso tsamkei nouso hakü noksong nou lemlowankü ep. Apa Elisha dongai laokü shikü ta lek- katkü wekü ngiom, “Sam mowanji, APAOU! Samüh ti chhi-e?”

¹⁶Elishaüh thalakü ngiom, “Hatkü lanoi.” “Ngüsoko naito sam dong ainou sam ün piakü noin.”

¹⁷Nungai apaüh misao sao, “O APAOU, apa niovei asopsat küta apa hau a-ep-i!” APAOU nou apa misao thala, naiuso Elisha yathsüotsün nou apa niovei ngüsankü thapnai apaüh king dongai in mokthso naiuso tsamkei nousoüh thapukkü apem ai Elisha lemjeikü ep.

¹⁸Tilai Siriahaiüh ngüso kom, Elishaüh saokü ngiom, “O APAOU, nung khaiunia nousotü niopek nou lüshiuh!” APAOU nou apa misao thalakü ngüsotü niopek nou shiuh.

¹⁹Nungai Elisha ngüso dongai khu- kü ngiom, “Asam yam tsüthakünai noin; asamüh yamtsün noksong nou nung tsüde. Jüphiai ahoilut, naiuso ngü asamüh yamtsün khaiuniatü nialut-e.” Naiuso apaüh ngüso Samaria nai nialokü khu.

²⁰Ngüso nung noknio mongai napkü thunkü, Elishaüh misao saokü ngiom, “Ngüso niovei asopsat APAOU, naiuso ngüso hau lüep-i.” APAOU nou apa misao thala; apaüh ngüso niovei sopsat, naiuso nungai ngüso Samaria noknio pekom mongai noikü epsan.

²¹Tilai Israelhai nokpao nou Siriahai ep, apaüh Elisha tü sangkü ngiom, “Ngü ngüso aloat tümo, APAOU? Ngo ngüso aloat tümo?”

²²“Laloat,” ta apaüh thalakü ngiom. “Ehli taoko thalotsün lüko ni loat au tsünoi. Ngüso hau eheau naiuso ashiuau tsotsak lükiu, naiuso ngüso nokpao dongai ngüso laokü lüya-ishi.”

²³Nungtiphe Israelhai nokpao nou ngüso hau sümai asong tsak shankü kium; naiuso ngüsoüh heshiukütün phiai, apaüh ngüso Siriahai nokpao dongai laokü hongan. Nungko yakü Siriahaiüh Israelhai goumchi yamheantsün ainou laolo.

²⁴Atao intso shiamkütün phiai Siriahai Nokpao Benhadadüh süpaihoi athum nialokü Israel thako tsalo naiuso Samaria noknio lemlowan.

²⁵Noknio lemlowan shioko, noknio mongai eheshiu nou tsüsaiu tsüom- tsün thatü thsüokü noiküla. Gado khaiu tsakko tangkason aopüjei, naiuso chongmükham shiih tsoi haoson tsom nime nouko tangkason pungo ta amai chekkü iulakü noiküla.

²⁶Israelhai nokpao nou noknio pe shimkü tsakeitsün taoko menyiu tsaküh “Ngü ahachu, Ni asuhatkü noitsün Nokpao!” ta sang asong nou vekü ngiom.

²⁷Apaüh thalakü ngiom, “APAOU nou nitü tsühachukü naito, ngü ti ahachu kiuau shio-e? Ngo tsonyak tsüdekünai theng taium süne?

²⁸Ni ti nou angjaji?” Nyiuhai nou thalakü ngiom, “Nung thaiunai nung nyiuhai nou lonyi athso heko naiuso nungthan nai jüthso heko ta ngiom.

²⁹Nungtiphe samüh jüthso thengküta apa he-an. Nungthan nyih nai ngü apatü samüh athso heko ta ngiom, lüko nung nyiuhai nou apa thso tsangkü wanan!”

³⁰Nung ngio lutsünko, nokpao amongmat nou apa ne chipek, naiuso khaiunia sauhai nung pe mongko shimkü noiküla ngüsoüh nokpao nou meshen neshe shitho kheiai nyikong tholokü noitsün ep.

³¹Apaüh vekü ngiom, “Nung ajekhaiu moyankün khako ngü Elisha khaiu tsütapsankü naito Goa nou ngütü e nou ashiuh!”

³²Naiuso apaüh Elisha nialokü shiao ngiongem kantsün tsak hong. Nung taoko, Elisha apatü sailuau shitsünso ashehoi nouso hakü apa tsamai noiküla. Nokpao hong nou- soüh moshisaokün khako Elishaüh ashehoi nousotü ngiom, “Nung aloatantsün khaiunia nou ngü loatau khaiunia ajantso hongshiji! Lo, tilai apa nungko shi-e, kou nou kiapkü awan, naiuso apa tsammongai lanap-i. Nokpao apa pem lüko nung khaiunia phiai hakü noi-e.”

³³Apaüh nung ngio chite khemkü thunkü, nokpao nou shisaoküta ngiom, “Nung angja sam khako kankü shitsün APAOU nou noin! Ngo apahau tsotsak chhi-iau tiauta taiushi-e?”