Read Khiamniungan Naga 2 Nokpao 7 Bible Online

2 Nokpao 7 - Khiamniungan Naga bible

2 Nokpao 7

¹Elishaüh thalakü ngiom, “APAOU nou ti ngioji nungtü a-anglu! Lühom nungtaoko nai ni Samaria nai Whet tso ameiting tsoi süme tsüdekünai barli tso tsoi luok nou tangkason tsak ko epkü tuh au shio-e.”

²Nokpao ko tengkhaiu hachu- etsün nou Elisha tü ngiom, “APAOU nou ah-ou jamaolu hong lüko-nung athawao au tsüshio-e!” “Ni nung thawaotsün eppe, lüko ni nung eheshiu titso tsühe-e,” ta Elishaüh thalakü ngiom.

³Khaiunia püle khun tsümekü jeekia sungtsünso nung Samariahai bekhan chiai noiküla, naiuso ngüso tsaküh tsak tü chitekü ngiom, “Sam mo-eankün lektso samüh tiauta nungko taiukü noi-e.?

⁴Noknio pemongai napau ti pokü tsünoi, tiautenai sam nungko naiusile nou eane; lüko sam nungko noi naiüh sam eane. Lüko nungtiphe sam Siriahai saothang nai khuko, ngüsoüh sam tü atsaoting chhiao shiotsün nungto ngüsoüh sam loatkü wane, lüko tsüngean, ngüsoüh sam aa poikiuao shiom.”

⁵Nungtiphe, asham anya- khemko hakü, ngüso Siriahai saothang ai khu, lüko tilai ngüsoüh shisaom, nungko khaiunia tsaktso tsünoiküla.

⁶APAOU nou Siriahai hau mokthso naiuso tsamkei hakü süpaihoi asongting shitsün sang-ili lula-i, naiuso nungai Siriahaiüh Israelhai nokpao nou Hit si Ijip hai nokpao nouso süpaihoi hakü ngüso komao tuh küta shiji ta yangkü noiküla.

⁷Nungtiphe nungso nai Siriahai ngüso nejenkhio nouso, mokthso nouso, naiuso gado nouso, ngüso asaothang nai wankü meshen aa asoloau khulükhunankü noiküla.

⁸Tilai khaiunia püle nousoüh Siriahai saothang athun nou shisaom, ngüso nejenkhio tsakai nap, nungko noitsün he naiuso shiukü naiuso, tangkason, chaiou lakkeng, ngüsoüh eptsün neshe, loküta ngüso khuwan naiuso tsangkü wan; nung- than ngüso laokü shiküta nejenkhio tsakko nap, nung lüko ngüsoüh aya naililu chhin.

⁹Lüko ngüsoüh tsaküh tsak tü ngiom, “Samüh nung chhisiya tsüchhiau noin! Samüh ngem amei taim küta samüh nung sam thaiuthalu tsüwanau noin. Samüh nung chiteau ahom tü thalutkü taiu naito, sam angja epau lu noin. Sam lolu khuküta nung nokpao khemko asonghoi nouso hau chiteko!”

¹⁰Nungtiphe ngüso Siriahai sao- thang nou wankü, Samaria ai laokü khu naiuso bekhan nai ehü nousotü jonkü ngiom: “Sam Siriahai saothang nai khuküla, lüko sau tsüepiu; mok- thso naiuso gado nouso tsüphankü wan, naiuso nejenkhio nousoüh Siria haiüh leankü khuwantsün khekkü noin.”

¹¹Nungai ehühoi nousoüh nung ngio ngem thipeng, naiuso nung nok- pao tsamai lüko chiten.

¹²Nungtao aso noiküla, lüko nokpao nou chu- küta apa khemko asonghoi nousotü ngiom, “Siriahaiüh ti thatji ngü asam hau chite-e! Nungko naiusile noin ta ngüsoüh ngeji, nungtiphe ngüso ün nejenkhio leankü khuküta liu ai pamkü noin. Samüh eheshiu epao thaiutha noknio lean-e ta ngüsoüh yangji, küta ngüsoüh sam aa thalo- küta noknio nou thalowanau yangji.”

¹³Apa khemko asonghoi tsaküh ngiom, “sauhai eaniu nungso khek- kü, noknio nai noitsün khaiuniahoi nouso lüko ayang tsünoikü eanaulu noin. Nungtiphe mokthso apoi nouso pungo nouko hakü samüh khaiunia ajantso hongko, nungaito samüh ti thawaokü noin nüng tsangshei-e.”

¹⁴Ngüsoüh khaiunia ajantso cho- sanküta nokpao nou ngüso tsamkei nimeko Siriahai süpaihoi tü ti thawaokü noin nung lütsangshei ta ayamhan kiukü hong.

¹⁵Nung khaiuniahoi Yordan saokü khu, naiuso ngüsoüh neshe naiuso jeng- tsaiu Siriahai khupengtsün taoko sapengtsün yamthathunkü epküla. Nungai ngüso laokü shikü nung ngio nokpao nou hau chiten.

¹⁶Samaria- hai liukü khukü ta Siriahai saothang nou yamhean. Nung APAOU nou whettso amei tsoi süme tsüdekünai barlitso ameiting tsoi luok nou tang- kason tsak he jane ta ngiotaiutsün thawaokü noiküla.

¹⁷Israelhai nokpao nou noknio bekhan noutü paotsangau apa teng- khaiu ahachutsün asong tsak phamongai kiuwan. Nung asong khaiunia nou khaiuniahoi nou ngamkeiküta ean, sübao nokpao nou Elisha pheteau khutsün taoko apaüh khapiam ngiotsün thawaokü noi- küla.

¹⁸Elishaüh nokpao noutü nung taoko nai whet tso ameiting tsoi süme naiuso barli tso ameiting tsoi luok nou Samaria nai tangkason tsak he jane ta ngiotsün tao

¹⁹nungtü nung asonghoi tsak nou thalakü, “APAOU apa pemüh lüko ah-ou jamaolu honglüko-nungto athawaoau tsüshio,” ta ngiotsün khaiunia nou noiküla. Naiuso Elishaüh thalakü ngiom, “Ni nung thawaokü eppe, lüko ni tilaitso nung chihsikhiam tsüheha-e.”

²⁰Naiuso nung tongtü thawaom naiuso apa khaiuniahoi nou thaatkü ngamatan.