Read Khiamniungan Naga 2 Nokpao 9 Bible Online

2 Nokpao 9 - Khiamniungan Naga bible

2 Nokpao 9

¹Nungai e-po Elishaüh e-po ehenhoi ong ainou khaiunia tsak jonkü apatü ngiom, “Lükhemlo, küta Gilead nai Ramot ai lükhu. Nung Olip khiam meng ni lüsemlo,

²naiuso tilai ni nungai thasao-e Nimshi thsao nou Jehoshafat thso Jehu tü lüyam. Apa haiso ainou apa tengkhaiu tsampai nai nialokü lünap,

³küta nung Olip khiam nou apa khaiu ai lüthsalut, naiuso lüngio, ‘APAOU nou ni Israelhai nokpaoau tsomkiuji ta velutji.’ Nungai nung athang ainou ni shiotsün lektso shakta lüsoian.”

⁴Nungtiphe nung ehen e-po tsak nou Ramot ai khu,

⁵nungko apaüh sü- paihoi ahei nouso akam tsakko noikü epiu. Apaüh ngiom, “APAOU, ngo nihau ngiongem tsak kankü noin.” Jehuüh sangkü ngiom, “Sam sau tü ni chiteji?”

⁶Apaüh thalakü ngeom, “Ni ko chi- teji, APAOU.” Nungai ngüne nemtso tsammongai nap, nungko ehen e-po nou Jehu khaiu ai Olip khiam thsalut küta apatü ngiom, “APAOU Israelhai Goa nou, velutkü ngioji; ‘Ngo ni jü khaiunia Israelhai nokpaoau tsomkiuji.

⁷Ni Ahab thso nou asam nokpao loatkü wanau noin, nungtiphe ngü jü e-po nouso naiuso amaohai ngü yathsüotsünso chaoattsün thaiutha ngü Jezebel hau angja kiu-e.

⁸Ahab ün tsamkhaiu naiuso apa thsao- sithsoso apem loatau noin; ngü apa tsamkhaiu ainou melo apem ashe si ehen wekü lowane.

⁹Ngo apa tsam- khaiutü Israelhai Nokpao Jeroboam si Nokpao Basha ne tsamkhaiutü chhitsün khekkü kankei-e.

¹⁰Jezebel mea goh ai tsükhane; apa mea Jezreelhai goumchi nai jii nousoüh heane.’” Nung ngiophiai, nung ehen e-po nou tsampai wankü khuwan.

¹¹Jehu apa haiso asonghoi dongai laokü khunai tsaküh apatü sang kü ngiom, “Alum meikü noin süne? Nung waiwai khaiunia nou ni ainou ti aiuji?” Jehuüh thalakü ngiom, “Apaüh ti aiukü noiküla nung ni ngeji.”

¹²Ngüsoüh thalakü ngiom, “Tsüde, samüh tsünge!” “Apaüh ti ngiom nung sam hau achite!” ‘Ngo ni Israelhai nokpao theau tsomkiuji’ ta APAOU nou velutji, nung apaüh ngü hau chiten.”

¹³Shaktalu Jehu ün asonghoi paiusihaisoüh ngüso meson phakhut Jehu tsa ao thaiutha hokthengpho asungthun ai yakü sapengkiu, ngüsoüh jangong matkü, “Jehu nokpao noin!” ta sang asong nou vekü noiküla.

¹⁴Nungai Jehuüh Nokpao Joram thako khengshikü tsalo, nung taoko apa Siriahai Nokpao Hazael thako Ramot nai ehli taoko atawaihe eptsün ainou lomeiloau Jezreel nai khukü noiküla. Nungtiphe Jehuüh apa paiusihaiso asonghoi noutü ngiom, “Asam ngüko noinaito, Jezreel nai noitsün khaiuniahoi nouso lotsüoau Ramot ainou sau tsüchailükhun ta tsüokü yangkü anoi.”

¹⁶Nungai apa mokthso tsamkei nai noikü khuau tsalo. Joram losaokü atawaitsün ainou akia momeilakü noiküla, naiuso Yihudahai Nokpao Ahazia apa sailukü nungko noiküla.

¹⁷Jezreel nai ehü koilop puo nai ehü tsaküh Jehu naiuso apa khaiuaiaso shisaotsün ep. Apaüh vekü ngiom, “Ngo khaiunia ajantso tsamkei nai noikü shitsün epji!” Joramüh thalakü ngiom, “Mokthso kankeitsünso khaiunia tsak hongkü nungso paiusihaihoi süne ehoi ta tsangshei-anau lühong.”

¹⁸Ngiongem kantsün Jehu dongai shikü apatü ngiom, “Nokpao nou ni paiusihaili shiji süne tsüde ta ngeau mongchioji.” Jehuüh thalakü ngiom, “Nung achhisiya tsüde!” “Ni jüphiai ahoiluttan.” Ehü koilop nai noitsün ehü nou ngiongem kantsün nou ehoi nou thasao-iu lüko apa tsülaoshi,

¹⁹Amao ngiongem kantsün tsak hongshin, apaüh nung ngiolu Jehu tü sangkü ngiom. Loüh Jehuüh thalakü ngiom, “Nung achhisiya tsüde! Ni jüphiai ahoiluttan.”

²⁰Loühjam ehü nou ngiongem kantsün nou ahoi nou ngoi-iu lüko tsülaoshi ta ngio kiu- shin. Naiuso apaüh nung ngioshin, “Nunghoi ahei nou Jehu khekkü waiwai khaiunia tsak khekkü apa tsamkei apaüh niakü noin!”

²¹Nokpao Joramüh ngiokhem kiu- kü ngiom, “Jü ehli tsamkei akhem- san.” Naiuso angiotsünli khemsan, naiuso apa si Nokpao Ahazia ne Jehu ko pheteau momo ehli tsamkei ko moknoikü khu. Ngüneüh apa Nabot kotha gohthang tsak ko phete.

²²Joramüh apatü sangkü ngiom, “Ni nokmei nai shiji süne?” “Samüh losaokü anyiu Jezebelüh yathsüotaiukiutsün alonga shantsün naiuso goa sotsom nouso taim, nungko titi nokmei noiau shio-e,” ta Jehuüh thalakü ngiom.

²³“Nungto asapthiotsün chhi noin. Ahazia!” ta Joramüh sang songkü wekü ngioküta apa tsamkei kha phoklelokü khuwan.

²⁴Jehuüh apa oukoppai loküta apa oukong apem nou Joram tü koplut, naiuso nung chon nou Joram ngamtha nai mongpem thsatkü pep. Joram apa tsamkei ainou salikü ean,

²⁵Nungai Jehuüh apa süpai ahei Bidkar tü ngiom, “Apa mea loküta Nabot kotha noitsün goh nai nung lüyakthiowan. Tilai ni naiuso ngo Nokpao Joram po Ahab phiai kamkü tsamkei ko tsakeikü noiküla, APAOU nou nung ngio nouso Ahab thako chitekü noiküla:

²⁶‘Ngü münyi Nabot naiuso apa thso chaoattsün epkü noiküla. Naiuso ngü nihau nung athangkolu angja kiushi-e ta thaloji.’ Nungtiphe Joram mea alo,” naiuso “nung APAOU ün athalo thawao-iau thaiutha nung Nobot kotha nou gohthang nai lüyakthiowan” ta Jehuüh apa süpai ahei noutü thoilut

²⁷Nokpao Ahaziaüh athawaotsün ep, naiuso Jehuüh apa tü komkü meshen tsamkei nai noikü Bet Hakan noksong dongai khulükhun. Jehuüh apa khaiuniaso hau “apa lüko lüloattan!” ta ngiokhem kium naiuso ngüsoüh apa Gur yamai tsamkei nai keitsün taoko tawaikiu. Lüko apa noknio Megiddo thalutkü kowekü khu naiuso apa nungai ean.

²⁸Apa khemko asonghoi nousoüh apa mea tsamkei nai loküta Yirusalemai kankü khukü David noknio nai nokpaohoi etam nai khanan.

²⁹Ahab thso Joram Israel nai nokpao thekü pon chekü tsak nouko Ahazia Yihudahai nokpao tsalo.

³⁰Jehuüh Jezreel shisaom. Jezebel- üh athawaotsün nung lulakü, nioko nai tsomjeikü, naiuso apa khaiu ou aleng li-eshikü shanshi küta nokpao tsam koukhantso tsak ainou yamai thapikü tsakü noiküla.

³¹Jehu bekhan nai nap taoko, nyiuhai nou, “Ni Zimri! Ni nou APAOU loattsün! Ni nungko tiauta noin?” ta vekü ngiom.

³²Jehuüh thapsanküta vekü ngiom, “Jüdongai sauhai noin.” Koukhantso ainou apatü asonghoi nime süme thatso nou thapikü noiküla.

³³Nungai Jehuüh ngüsotü ngiom, “Nung nyiuhai nou nungai ayaki!” Ngüsoüh nung nyiuhai nou yakki, naiuso apa she dioai naiuso mokthso nousotü tsatlut. Jehuüh apa mokthso nouso naiuso tsamkei nouso nung nyiuhai nou chiai ngamlutkü khu.

³⁴Küta nokpao tsamai napkü thaisam tsak noiküla. Nungailu apaüh nung ngiom, “nung athesan naptsün menyiu lülo naiuso apa lükhanan; tiautenai apa nokpao tsak menyiuthso tsak noiküla.”

³⁵Lüko khaiunia sauhai apa khananau khukü noiküla ngüsoüh apa khaiu Ou, naiuso phasihok Ou tü simkü amao Ou titso tsüep.

³⁶Tilai ngüsoüh nung Jehu hau chiten, apaüh ngiom, ‘Jii nousoüh Jezebel mea Jezreel goumchi nai heane, ta apaüh apa yathsüotsün Elija tsangkü chitetsün APAOU nou ti ngiom nung thawaokü noin.

³⁷Jezebel nung atheau tsünoi- kü wanantsünli pengkü khuwane, “küta loto sauühtso nung apa ta tsangsheisan shiao tsüshio-e.’”