Read Khiamniungan Naga 1 Ateng Chhi 13 Bible Online

1 Ateng Chhi 13 - Khiamniungan Naga bible

1 Ateng Chhi 13

¹Nokpao Davidüh khaiunia heng tsak khaiuko naiuso tsomtsak khaiuko asonghoi sauhai noiküla ngüso apem ko semseikü chite.

²Nungai apaüh Israel hai apemtü velutkü ngiom, “Asamüh mongchioji ta naito, naiuso nung sam Goa APAOU nou mongchiotsün tsak naito, samüh sam khaiuniahoi, kihtsün meson hoi, naiuso Levi hoi ngüso noksong nouso ai ngiongem kantsünso hungpeng küta khaiu- niahoi chikü nungko akamshi-i.

³Küta Saul nokpao thetsün taoko tsükankeishikü wanantsün Goa ün Athalou-e Ngiokhem Paidan nou khuküta louko.”

⁴Nung ayang- kiutsün tü khaiuniahoi nou mongling naiuso mongchiokü thalou.

⁵Nung Athalou-e Ngiokhem Paidan Kiriat-Jearim ainou Yirusalem ai kankü shiau thaiutha ko ajepekki nai saokü ainou Ijip hai elung ainou ajenapki nai Hamat Aoyan ajepekki nai.

⁶Athalou-e Ngiokhem Paidan lokamkü, noiküla sübao chiai akoi püle potsün thainian lemjeikü APAOU nian asong nou kankü noiküla, nung kankü shiau Yihuda goumchi nai, Baala hai noknio Kiriat Jearim ai David naiuso khaiuniahoi nou khukü noiküla.

⁷Abinadab tsam ainou ngüsoüh Athalou-e Ngiokhem Paidan khengai kankü shiküta tsamkei ayan tsak ko thio. Uzza naiuso Ahio neüh nung tsamkei nou niakei,

⁸nung taoko David naiuso khaiuniahoi nouso apemüh jihang jengtsaiu apem kankeikü lah kho-ekü, naiuso jangong naiuso poipoi matkü, sondan patkü, hamkü, apem Goa hau asuhat kiukü jih hang.

⁹Tilai ngüso Kidon nai shisaom, jangtsopong nouso khia-an, naiuso Uzzaüh apa pha tsatphokü ta Athalou-e Ngiokhem Paidan nou helou.

¹⁰Nungaih APAOU Uzza lun-mongmat naiuso nung Paidan tü thantsün thaiutha apa nungko loatkü wan.

¹¹Nungtiphe nung atao ainou lonyi saokü nung athang nouko tü Perez Uzza ta jonji. David thatü mongmat, tiautenai APAOU nou amongmat nai Uzza loat.

¹²Nungaih Davidüh Goa lun hatkü ngiom, “Ngo Athalou-e Ngio- khem Paidan nou titi thekü kankü ya-e?”

¹³Nungtiphe Davidüh nung Paidan Yirusalem ai kankü tsüya. Nungliko Gat noknio nai paopong tsak nian nou Obed Edom ta niankün tsamai le-an.

¹⁴Nung Paidan nou nungko alei süme taiuwan, naiuso APAOU nou Obed-Edom tsamkhaiu naiuso apaüh taiutsün alum oukkiu.