Read Khiamniungan Naga 1 Ateng Chhi 16 Bible Online

1 Ateng Chhi 16 - Khiamniungan Naga bible

1 Ateng Chhi 16

¹Ngüsoüh Athalou-e Ngiokhem Paidan nou loküta nung Davidüh khemtaiutsün nejenkhio nai kankü khukü taiu. Nungai ngüsoüh Goa hau ajah chaithio naiuso aalo chaithio nouso kiu.

²Davidüh ajah chaithio nouso khem küta, APAOU nianko khaiuniahoi nouso oukkiu,

³küta ngüso apem hau eheshiu sonkiu. Apaüh Israel khaiunia melo menyiu pungkü hau themtsailop tsak tsak, atsaotsaokü nyih tsak tsak, naiuso sainaoshep ajantso ta sunkiu.

⁴Davidüh Athalou-e Ngiokhem Paidan khako kiutsün nai Israel Goa APAOU amkham taoko jihang naiuso nianlom Levihai ajantso chosankü taiu.

⁵Nungko ahei au Asaf chosan, naiuso apa tü hachuau Zekaria chosankü kokiang khongau nouso: Jeiel, Shemiramot, Jehiel, Mattithia, Eliab, Benaia, Obed-Edom, naiuso Jeiel so noiküla. Jih hang taoko, lah khoau Asaf noiküla,

⁶naiuso meson nime, Benaia si Jahaziel, ne Athalou-e Ngiokhem Paidan khako asaita jangong matau noiküla.

⁷Nungti Davidüh Asaf naiuso apa paiusihaiso Levihoi au APAOU khako nianlom jihangau thaiutha thsale thoilut.

⁸APAOU hau nianlom lükiu, apa songtsün lüpungpeng; mele nouso hau Apaüh ti chhin nung lüchite.

⁹APAOU tü nianlom jih lühang; apa athanga chhisiya nouso lüchite.

¹⁰Sam apa ün ta; lümongling apa amkhamtsünso chikü lükoi!

¹¹Ahachu thaiutha APAOU dongai lükhu, naiuso tsülaokü apa lü amkham.

¹²Asam Goa yathsüotsün Yokob thsaosithso, Goa nou chosantsün Israel thsaosithsoso, Goa nou chhisantsün nou ii athanga lüyangsan, naiuso apaüh mikhem kiutsünso.

¹⁴APAOU nou sam Goa noin; apa athoilut nouso goumchi chikü thaiutha noin.

¹⁵Goa ün athalou-e tilaitso lapean, sübao apaüh athontsüyangkü thaiutha shan,

¹⁶Abraham ko apaüh athalou-e shantsün, apaüh Isak tü thaloutsün.

¹⁷APAOU nou Yakob ko asaichi athalou-e thaiutha tsak shan tsün

¹⁸“Ngo ni hau Kanan goumchi kiu-e,” ta apaüh ngiom. “Nung tengkam athaiu ao noi-e.”

¹⁹Goa ün khaiuniahoi Kanan goumchi nai haove nai thsaokü mesanhoi noiküla.

²⁰Ngüsoüh shingkhan tsak ainou shingkhan tsak tsakai, nokshing tsak ainou nokshing tsakai tsakei.

²¹Lüko Goa nou ngüso sauhautso tsüthangmangi; ngüso kiplokü apaüh nokpao nouso lohat:

²²“Jü achosan ayathsüohoi tü latawai; jü e-pohoi tü lathantan.”

²³Goumchi apem, nou APAOU tü lühang! Apaüh sam kipsantsün ngem amei ajekhaiu pungkü lüpungpeng.

²⁴Mele nouso tü apa ajinka naiuso, khaiunia chikü tü apa oukong chhisiya nouso lüpunglut.

²⁵APAOU asong noin naiuso Apa nian atsokting nai lomsanao noin; goa nouso chikü chiai tekkü apa hau asuhat kiuau noin.

²⁶Amao shingkhan goa nouso to sotsom lu noin, lüko APAOU nou aün nouso shan.

²⁷Ajinka naiuso Asuhat nou apa lemjeikü noin, oukong naiuso amongling nou apa Amkham Tsam meankü noin.

²⁸Goumchi nai khaiunia chikü nou, APAOU lülom, apa ajinka naiuso okong lülom.

²⁹APAOU ün ajinka nian lülom; chaithio kankü apa Amkham Tsamai ashi. Tilai APAOU nou Asio nai e-po apa khako kaukü lü-am;

³⁰Goumchi chikü, apa khako lüngaongao! Goumchi nou athang nai mongkü shananiu, naiuso nung soisoiau tsüshio.

³¹Goum, aün! Lümongling! APAOU nou nokpao noin ta mele nouso hau lüchite.

³²Khiamnok, naiuso nungko noitsün thainian apem nou lü ngao; khengtaiu nouso, naiuso nungko noitsün apem lümonglinge!

³³Tilai APAOU nou goumchi nai nokshingau shi-e, liutsa nai pai nouso amongling nou we-e.

³⁴APAOU hau thaimei lükiu, tiautenai apa amei noin; apa atsüojin athon tsüyange.

³⁵Apa tü lüngio, “O sam kipsantsün Goa, sam akipsan; mele nouso ainou sam akipsan, sam aniakam, nungaito anian asio nou lomsankü sam thaiumeikü noi-e.”

³⁶Israel Goa APAOU lülom! Lo naiuso athontsüyang apa lülom! Nungai khaiunia chikü nou ngiom, “Amen,” APAOU lülom.

³⁷Nokpao Davidüh Asaf naiuso apa paiusihaiso Levihoi nou hao Athalou-e Ngiokhem Paidan taiu- tsün athang nai amkhamtsün ko asaita yachuao thsale kiuwan. Ngüsoüh ngüso chhi haoson ajekhaiu tsütokü chhiau noiküla.

³⁸Jeduthun thso Obed-Edom naiuso apa kau ai- nou khaiunia aoluokkü petjei nou- soüh ngüso tü hachu. Hosa naiuso Obed-Edom ne bekhan nouso jimau thsale noiküla.

³⁹Meson Zadok naiuso apa meson nouso paiusihai Gibeon amkham- thang nai APAOU amkhamtsün ko thsale.

⁴⁰Ahom si asham tsütokü APAOU nou Israel hai hau kiutaiu- tsün ngiokhem thsam nai sat taiu- tsünli ngüsoüh amthang nai athum jakü noi.

⁴¹Nungai ngüsoko APAOU athontsüyangkün atsüojin thaiutha nianlom kiu jihangau mothikü chosan taiutsün Heman, Jeduthun, naiuso amao nouso noiküla.

⁴²Heman naiuso Jeduthan neüh tilai nianlomkiu jih nouso hangji nung- taoko jangongmattsün, lakho-etsün, naiuso kokiang khongtsün ko thsale noiküla.

⁴³Nungphiai khaiunia apem momo tsamai shi-au naiuso David lüko apa tsammongso ko atao intso noiau apa tsamai shi-an.