Read Khiamniungan Naga 1 Ateng Chhi 17 Bible Online

1 Ateng Chhi 17 - Khiamniungan Naga bible

1 Ateng Chhi 17

¹Loto Nokpao David apa tsamai kihkü noiküla. Nyitso apaüh e-po Nathan jonshikü ngiom, “Ngo nungai cedar pai nou lahtsün tsamai kihkü noin, lüko APAOU ün Athalou-e Paidan nou to nejenkhio nai taiuwan!”

²Nathanüh thalakü ngiom, “Ni tilüsung chhiao yangji nungso lüchhi, tiautenai Goa nou niko hakü noin.”

³Lüko nungsoh nai Goa nou Nathan tü ngiom,

⁴“Jü tsamki David tü khukü ngo ngioji ta lüchite, ‘Ngü kih au Amkham Tsamlah ao nou nito tsüde

⁵lo saokü ngo Israel hai Ijip ainou niasantsün atao ainou tilaitso amkham tsam ko tsükih; ngo asaita nejenkhio nai kihküta athang tsak ainou athang tsak ai ta soisoikü shiji.

⁶Israel haiko tsakeitsün chikü ngo chosantsün ahei hoi nousotü ngü noiau cedar pai nou lahtsün tsam tsak tiauta tsülahsan ta tilaitso sautü ngiokü tsünoi.’

⁷“Nungtiphe jü tsamki David tü, APAOU Akongteng nou nitü ngioji ta lüngio, ‘Ngo ni tsamei nai onnemok jimkü noitsün ainou nialo küta jü khaiunia Israel khaiuko nokpao shankium.

⁸Ni tilüsongai khu ngo niko noiküla, naiuso ni khutsünko ngo ehoiso apem shiolowan. Ngo ni goumchi nai ahei asongting nousoli niansong noikü shankiu-e.

⁹Ngo jü khaiuniaso thaiutha athang tsak chosankü, ngüso nungko kihlo-i-iu, nungko athangmang titso tsünoi- shikü kih-e. Ngüso nung goumchi nai naptsün taoko yakü ngüsotü atsao- ting khaiuniahoi pha puokü veilüko, loto nung tilaitso tsüthawaoshi-e. Ngo a-ehso apem shioloau naiuso thsaosithsoso piakü kiuao thalou.

¹¹Ni tilai ean-e, apaosiposoko khanane, ngo athsoso ongko tsak nokpao au shane naiuso apa nokshing kongkü taiu-e.

¹²Jü thaiutha Amkham Tsam tsak lahsanau nou apa noi-e, naiuso ngo apa ainou thsaosithsoso lingkü nokshing athontsüyangkü shing-e.

¹³Ngo apa po noi-e naiuso apa Jüthso noi-e. Ngo ni nokpao the-iau nou koko Saul ainou ahachu laolowantsünli athso tüto tsüchhi shi-e.

¹⁴Ngo apa jü khaiuniaso naiuso jü nokshing paotsangau asaita hau taiu-e. Apa nokshing tilaitso athon tsüyange.’”

¹⁵Nathanüh David hau apatü Goa nou tsangsheikü hantsün apem chiten.

¹⁶Nokpao David Nejenkhio nai napkü APAOU khako moknoikü, mi- sao loum, “APAOU Goa, ni jü thaiutha tilüsong chhin, nung thaiutha ngo naiuso jü tsamkhaiu ti maikü tsünoi.

¹⁷Lüko loüh ni nungtü phopkü chhiji; ashiau vataoko jü thsaosithso thaiutha ni athaloutsün shaniu, naiuso Ni APAOU, Goa, nou ngü asong khaiunia tsakli vesankü kankeiji.

¹⁸Ngo nitü loüh ti ngioshi-e! Ni ngü meikü ngeji, nungti lüko ngo atsamki, ao ni asuhat kiuji.

¹⁹Jü thaiutha nung chiai naiuso ashiao nou taoko ngo songtsün hanau nung ni athattaiu noiküla.

²⁰APAOU ni khekkü sautso tsünoi; nilu Goa noin ta samüh asaita ngeji.

²¹Sua akuo ainou akhaiunia theao ni niasantsünli goumchi nai Israel hai khekkü amao mele tsaktso tsünoi. Ngüso thaiutha asong naiuso athanga chhitsün tsangkü aniansong goumchi apemai pengkü khu-iu. Akhaiuniaso Ijip ainou niasan naiuso ngüso khaai khutsün taoko amao mele nouso ni komankiu.

²²Ni Israel hai asaita atengkam atengkhaiu khaiunia au shan, naiuso ni, APAOU nou ngüso Goa au iula.

²³“O APAOU, lo, jü thaiutha naiuso jü thsaosithsoso thaiutha atao chikü thaiutha ni thalotsün athawao-i, naiuso ni chhi-e ta ngiotsün lüchhi.

²⁴‘APAOU Akongteng nung Israel khaiuko Goa noin’, ta khaiuniahoi nou asaita thaiutha hau ngiokü, Anian losongkiu-e naiuso anokpao- ling athontsüyangkü taiu-kiu-e.

²⁵Jü Goa, ngü nung mongsongkü misao saoji, tiautenai ni atsamki ngütü jü thsaosithsoso ongko athontsüyangkü nokpao hoi shane ta hankü noiküla.

²⁶Ni, APAOU, Goa noin, naiuso ni mung athalou athanga ngüko shaniu.

²⁷Jü thsaosithsoso ni nou atsüojinyang tsülaokü noiau ngo nitü sangji. APAOU, ngüso ouk kiu, naiuso ni nou ouk ngüso khaiuko athontsüyangkü noi-e.”