Read Khiamniungan Naga 1 Ateng Chhi 26 Bible Online

1 Ateng Chhi 26 - Khiamniungan Naga bible

1 Ateng Chhi 26

¹Levihai amkham tsam ehü thetsünso thaiutha chhi haoson nungso noin! Kora kau Asaf tsamkhaiu ainou Kore thso.

²Meshelemia thso melothso chinyat ngüso petche methso lingkü nai-Zekaria, Jediael, Zebadia, Jatniel.

³Elam, Jehohanan, naiuso Eliehoenai noiküla.

⁴Loüh Obed-Edom, sau hau Goa nou melothso petjei oukkiu ngüso: petche methso lingkü nai- Shemaia, Jehozabad, Joa, Sakar, Nethanel,

⁵Ammiel, Isakar, naiuso Peulethai noiküla.

⁶Obed-Edom thsoyamchong Shemaia thso melothso luok ngüso: Otni, Refael, Obed, Elzabad, Elihu, naiuso Semakia noiküla. Ngüso kauko ngüso amoun shioko ngüso ateng khaiuniahoi noiküla; aphi khaiunia nime ne mothikü amoun noiküla.

⁸Ngüso chhisiya thaiutha Obed- Edom tsamkhaiu ainou nung chhi thaiutha monkü ngekü mepem aoluokkü nime noiküla.

⁹Meshelemia tsamkhaiu ainou a-nge amon nouso khaiunia chekü petjei noiküla.

¹⁰Merari kau ainou Hosa, noiküla, apa thso melothso püle ngüso: Shimri (apa thsoyamchong tsüde lüko apa poüh apa ahei the-i.)

¹¹Hilkia, Tebalia, naiuso Zekaria. Amkham Tsam ehü nai Hosa tsamkhaiu ainou mepem chekü süme noiküla.

¹²Amkham Tsam ehü nouso pothso lingkü hoihoi ta janthat, naiuso ngüso hau amao Levi hoi nousoli Amkham Tsam nai chhisiya sunkiu.

¹³Tsamkhaiu pungkü, ehen asong ti amothi tsünoikü ngüso hau ti sübao bekhan nai jimao latha-e ta phongdekü noiküla.

¹⁴Shelamia hau ajepek bekhan nou latha, naiuso apa thso Zekaria, sauüh asaita ayamhan amei kiutsün noiküla, apaüh ajenap bekhan nou latha.

¹⁵Obed-Edom hau ajepekki bekhan nou sunkiu, naiuso apa thsoso jengtsaiu taiutsün tsampai jimau sonkiu.

¹⁶Shuppim naiuso Hosa ne hau ajenap bekhan naiuso asungthun yam ainou Shaleket sonkiu. Ehü nou tsak jam tsak jam ta atao janthat kü taiukiu.

¹⁷Ajepek bekhan nai ajekhaiu pungkü ehü mepem luok, ajenapki bekhan nai mepem püle, naiuso ajepekki bekhan nai püle, ta sunlut. Ehü püle, jengtsaiu taiutsün tsampai nime nouko khaiunia nime me asaitan taiukiu.

¹⁸Ajenap nai aalo puo lataiutsün tsam yam dongko ehü püle naiuso nung tsamtengko nime taiukiu.

¹⁹Kore naiuso Merari kauso hau ehü haoson sonthattsün nungti noiküla.

²⁰Amao nouso Levi paiusihai amkham chai, naiuso Goa hau thumkü kiutsün paopei jengtsaiu nouso taiutsün tsampai paotsangau taiukiu.

²¹Gershon thsoso ongko Ladan nung apa thso Jehiel tsamkhaiu hakü pothso hoi piakü paopo noiküla.

²²Ladan thso melothso nime, Zetham, naiuso Yoel noiküla ngüne lüko amkham chaithio tsam naiuso jengtsaiu taiutsün tsampai nouso paotsangau noiküla.

²³Amram, Izhar, Hebron, naiuso Uzziel thsaosithsoso hau lüko chhisiya haoson nou sunlutkiu.

²⁴Amkham chaitaiutsam thaiutha Mosa thso Gershom kau ainou Shebuel thso apaotsang nai ateng noiküla.

²⁵Gershom dei Eliezer tsangkü apa Shelomit ko tsammong noiküla. Eliezer Rehabia po, Rehabia nung Jeshia po, Jeshia-Joram po Joram nung Zikri po, Zikri-Shalomit po noiküla.

²⁶Nokpao David, Pothso aheihoi, kau aheihoi, kau nouso naiuso Sirpai asonghoi nou goa hau losiokü kiutsün Paopei apem tü paotsangao Shelomit naiuso apa pothso hoi thsale noiküla.

²⁷Ngü- soüh ehli taoko thalotsün jengtsaiu ajantso loküta nung Amkham Tsam nai kankeiau losiokü taiu.

²⁸Amkham Tsam nai kankeiau losiokü taiutsün jengtsaiu apem naiuso e-po Samuel, Nokpao Saul, Ner thso Abner, naiuso Zeruia thso Joab üh kanjikantsün paopei nouso chiai apaotsangao Shelomit naiuso apa pothso thsale noiküla.

²⁹Izhar thsaosithsoso ongko, Kenania si apa thsoso hau nokshing chhisiya sonkiu: nung chhisiya nou asattaiutsün meikü kamtaiuau, naiuso Israel khaiuniahoi thaiutha misingem shingtha kiuao noiküla.

³⁰Hebron thsaosithsoso ongko, Hashabia naiuso apa tsammongso 1, 700, apem avesan khaiunia jije ngüso Yordan Haiu etsai noitsün ajenap Israel mele nouso thaiutha donyam si kiki yam ko apaotsangau taiukiu.

³¹Hebron thsaosithsoso ongko Jeria nung ahei noiküla. Nokpao David nokshing pon aopüle nouko nai, Hebron thsaosithsoso tsamkhaiuling yamsanau shanküta nungai nung pothso ko nou süpai amountinghoi Gilead hai goumchi nai Jazer ko kihkü epsan.

³²Nokpao Davidüh Jeria tsammongso ainou a-nge nai avesan aheihoi 2, 700, shingsan küta ngüso Reuben, Gad, naiuso Ajepek Manase hai goumchi Israel goh Yordan Haiu ajepek etsai donyam si kiki yam apem paotsangau taiukiukü noiküla.