Read Khiamniungan Naga 1 Ateng Chhi 28 Bible Online

1 Ateng Chhi 28 - Khiamniungan Naga bible

1 Ateng Chhi 28

¹Nokpao Davidüh Israel hai asonghoi apem Yirusalem nai kamshiau ngiokhem kiu. Nungtiphe mele nai asonghoi, nokshing yam chhisiya tü paotsangtsünso, kau nai ahei nouso, nokpao naiuso apa thsoso, thainian hoi naiuso jengtsaiu nouso tü thaisantsünso, nokpao tsamai noitsün asonghoi, süpaihoiko ateng nouso, naiuso atengting khaiunia chikü Yirusalem nai kamshin.

²David, ngüso khako tsaküta ngiom, “Jü goumchi khaiuniaso ngü tü anglu. Sam Goa APAOU hok ngamtaiuau, Athalou-e Ngiokhem Paidan thaiutha ngo asaichi ta hau tsam tsak laau mongchiokü noiküla. Ngo apa asuhat kiuao amkham tsam tsaklah ao khemtaiukü noin;

³lüko apaüh ngühau nung tsüchhi-e ta lolaokü noiküla, tiautenai ngo süpai tsak noin naiuso she thatü lopeng-in ta ngiom.

⁴APAOU, Israel Goa nou ngü naiuso jü thsaosithsoso Israel nai athontsüyangkü nokshingau chosan. Apaüh ahei sung-iau Yihuda mele chosan, naiuso Yihuda mele ongko jüpo tsamkhaiu chosan, Tsam- monghoi nungso apem ainou Israel hai chikü khaiuko ngü loküta nokpao shanau apa mongchiotsün noiküla.

⁵Apaüh ngü hau melothso piakü oukkium, naiuso ngüso chikü ainou apaüh APAOU nokshing, Israel khaiuko nokshingau Solomon chosan.

⁶“APAOU nou ngütü ngiom, ‘Jütsam laau nou to athso Solomon noi-e. Ngo apa jüthso au cholo-iu, naiuso ngo apa po noi-e.

⁷Apaüh lo chhisiyakü noitsünli jü ngiokhem naiuso athoilut nouso apem mong- kiukü angio angtsün nai tsülaokü noi-etünaito, ngo apa nokshing athontsüyangkü noi-i-e?

⁸“Nungtiphe lo, jü khaiuniaso, sam Goa naiuso APAOU ün khaiunia Israel hai apem kamshikü noitsün khako, asamüh nung gohmei goumchi nou tsülaokü tengkamao, naiuso asamüh nung asam lilotsün vetao hau athontsüyangkü lethioau shiokü hau, APAOU sam Goaüh samtü thoiluttsün alum mongkiukü angio angau thaiutha ngo asam tü kojaji.”

⁹Naiuso apaüh Solomon tü ngiom, “Jüthso, apo Goa vesankü mong athum nou mongchiokü apa yathsüoau ngo nitü kojaji. Apaüh sam mong naiuso ayang apem ngeji. Ni apa dongai khunaito, apaüh ni lou-e; lüko ni apa ainou phoklekü khuwan naito, apaüh ni asaita hau wanan-e.

¹⁰APAOU nou apa asio Amkham Tsam laau ni chosankü noin ta ni yangshi au noin. Lo nung mongsongkü lüchhi.”

¹¹Davidüh Solomon hau amkham tsam apem, jengtsaiu taiutsün tsampai nouso, naiuso amao tsampai nouso, naiuso angei nouso wankiutsün Asio Thang, thaiutha lahsanau thattaiutsün ayangtaiu nou kium!

¹²Apaüh kengpun naiuso nung lemkü noitsün tsampai nouso thaiutha, apa mongai yangtaiukü noitsün apem kiu, naiuso, amkham tsam jengtsaiu taiutsün tsampai naiuso APAOU hau losiokü taiutsün paopei nouso thaiutha.

¹³Amkham Tsam chhisiya, chiusilak apem paotsangau, yangtaiu chhiao meson hoi naiuso Levi hoi lokam.

¹⁴Chiu- silak langtsünko kankeiha-au chaiou lakkeng si tangkason titiso theha-e nung, thaiutha apaüh ayamhankü noiküla;

¹⁵tson pungkü naiuso tson taiutsün thaiutha,

¹⁶Goa hau chaithio kiutsün themtsai letaiuau tangkason naiuso chaiou lakkeng puo pungkü thaiutha. Chonsiang nouso shanau chaiou lakkeng asang- ting nou titso thehaau noin nung thaiutha, lüko apaüh ayamhan kiu, Chiuthso khiam meng, lak nouso saiau chaiou lakkeng naiuso tang- kason titso the-e.

¹⁷Apaüh loüh chiu nouso meng nouso shanau chaiou lakkeng asangteng titithatso the-e nung thaiutha ayamhan kiukü noiküla.

¹⁸Naiuso angannyamtsün jah-au amthang shanau asongting chaiou lakkeng titso the-e, naiuso ehli tsamkei shankü akoi potsün thainian nou akoi sapengkü ta APAOU Athalou-e Ngiokhem Paidan sajei au nungso thaiutha apaüh ayam hankü noiküla.

¹⁹Nokpao Davidüh ngiom, “Nungso apem ayamhan saitha kiutsün nai satkü noin, nung APAOU pemüh ngü tü chhisiyalükhunau thaiutha thoilutkü noin.”

²⁰Nokpao Davidüh apa thso Solomon tü ngiom, “Mongsongkü naiuso kongkü lüthe. Chhisiya nou lüyalo naiuso tiühtso nung chhisiya ainou ni lalolao-i. APAOU Goa, sübao ngo yathsüoji, apa niko noi-e. Apaüh ni tsüleane, apa Amkham Tsam chhisiya mokhemkün lektso niko noi-e.

²¹Mesonhoi naiuso Levi hoi Amkham Tsam nai chhisiya au chhi haoson sunlutkiu. Chhisiya alumko chhi chhikiutsün khaiuniahoi nou amoun angehoi nou nitü hachu au amongchio noin. Naiuso khaiunia apem, aheihoi nouso ngiokhem ko noin.”