Read Khiamniungan Naga 2 Ateng Chhi 10 Bible Online

2 Ateng Chhi 10 - Khiamniungan Naga bible

2 Ateng Chhi 10

¹Rehoboam Shekemai khu, tiautenai ajenapki nai noitsün Israelhai apa nokpao shankiu au thaiutha nungko kamshikü noiküla.

²Tilai Nebat thso Jeroboam, sau Nokpao Solomon ainou kipsanau Ijip ai khukü noiküla, apaüh nung ngiongem lulanai, apa tsamai laokü shin.

³Ajenapki nai noitsün Israel mele nousoüh apa jonau hong, naiuso ngüso apem kamlokü Rehoboam dongai khuküta apatü ngiom.

⁴“Apoüh sam chiai thsale lethsangkü lolutko noiküla. Ni nung thsale nouso samhau lohekkü naiuso sam aakih siukü noiau shankiu naito, samüh ni yathsüokü noi-e.”

⁵Rehoboamüh thalakü ngiom, “Nung chhisiya thaiutha yangluau ngü hau ajekhaiu samnyi akiu, küta laokü ashi.” Nungtiphe khaiuniahoi nouso wonan.

⁶Nokpao Rehoboamüh apa po Solomon tü ayam hantsünso petche hoi nousotü sangkü noiküla. “Nung khaiuniahoi nouso hau athalatsün laokiu shiau asamüh ngühau ti ayam han-e?” ta apaüh ngüso tü sangkü ngiom.

⁷Ngüsoüh thalakü ngiom, “Ni nung khaiunia nousotü tsüojinkü kankei naito naiuso ngüso mong- tsami naito naiuso ngüsotü ngiomei nou chite naito, nungaito ngüso asai ni mongkiukü yathsüotsünso noi-e.”

⁸Lüko apaüh petchehoi nou ayam- han kiutsün tsüvesankü wanküta apako mewehoi sauhaiüh lo apatü ayamhankü noiküla ngüso ngiobao angkü khuwan.

⁹“Asamüh ngü hau ti chi-iau ayam hanji?” ta apaüh ngüsotü sangkü noiküla. “Khaiunia sauhaiüh ngüso thsale lohekkü ashankiu ta ngü tü sangji ngüso tü ngo ti ngio-e?”

¹⁰Ngüsoüh thalakü ngiom, “Ni ngüsotü ngioau nungti noi-e: ‘Jüphakha ehentso nou jüpo ün om tü teitham tsokü noin.’

¹¹‘Jüpoüh asam hau thsa lethsangkü kan-ikü noikü- la; ngo nungso loüh tekkü lethsangkü shanshi-e, ta ngüsotü lüngio. Apaüh asam tü aochan nou shiuh lüko ngüto mokthso nou tü shiuhtsün sonkhiang nou shiuh-e!’”

¹²Apaüh ayamhankü taiutsünli, ajekhaiu samnyi phiai Jeroboam naiuso khaiuniahoi nouso apem Nok- pao Rehoboam dongai laokü shin.

¹³Nokpao nou petchehoi nousoüh ayam hantsün tsüvesankü wanküta ehenhoi nou ayam hantsün tübao hoi- lutkü

¹⁴apaüh khaiuniahoi nousotü jekü chite. Apaüh ngiom, “Jüpoüh asam hau thsa lethsangkü kan-ikü noiküla; lüko ngü nungtü tekkü lethsangkü shanshi-e. Apaüh asamtü aochan nou shiuh. Lüko ngoto asam tü mokthso noutü shiuhtsün son- khiang nou shiuh-e!”

¹⁵Nebat thso Jeroboamtü Shilo ainou e-po Ahija tsangkü chitetsün ngio nou shitha- wao au APAOU Goa nou mongchiotsün noiküla. Nungshioko nokpao nou khaiuniahoi thaiutha mongkiutsün noiküla.

¹⁶Tilai khaiuniahoi nousoüh nokpao nou ngüsotü tsü-anglutsün epsan, ngüsoüh sang asong nou vekü ngiom, “David tü sam ti haoson noin! Ngüsoüh sam thaiutha tilai ti in chhikü shin? Israel khaiuniahoiso, sam tsamai laokü khuwanko! Rehoboam hau apa chija lüthe-i!” Nungtiphe Israel khaiuniahoi nousoüh

¹⁷Rehoboam nokpao hau Yihuda goh nai kihtsün khaiunia- hoilu poitaiukiukü apatü khengshi.

¹⁸Nungai Nokpao Rehoboamüh chhisiya nai ahei thetsün Adoniram Israel hai dongai hong, lüko ngüsoüh apa lung nou yakkatkü wan. Nungai Rehoboam apa ehli tsamkei nai liukü naploküta Yirusalem ai khulü- khunan.

¹⁹Nung atao nai yakü Israelhai sauhai ajenapki nokshing nai noikü shiküla nungsoüh David kau nokpaoling thako khengshikü shin.