Read Khiamniungan Naga 2 Ateng Chhi 13 Bible Online

2 Ateng Chhi 13 - Khiamniungan Naga bible

2 Ateng Chhi 13

¹Israel hai nokpao Jeroboam nokshing pon chikü petjei nouko, Yihuda nai Abija nokpao tsalo,

²naiuso apaüh Yirusalem nai pon süme nokshingkü noiküla. Apa nyiu Gibea noknio ainou, Uriel ün menyiuthso Mikaia noiküla. Abija si Jeroboam ne jetko ehli songkü noiküla.

³Abijaüh akong süpaihoi heng 400, 000 nialokü ehli nai khu, naiuso Jeroboamüh lüko akong süpaihoi heng 800, 000 nialokü apa khengshikü ehli nai tsalo.

⁴Süpaihoi nou Efraim king goh nai wao-ekü noiküla. Nungai Nokpao Abija Zemaraim King ai sungküta jonkü ngiom, Jeroboam naiuso Israel hai: “Ngü tü a-anglu?”

⁵“APAOU Israel Goa nou David naiuso apa thsaosithsoso Israel khako athon- tsüyangkü nokpao-e ta David ko tsülotheankün Athalou-e Ngiokhem tsak shankü taim ta asamüh tsünge süne?

⁶Nebat thso Jeroboamüh apa nokpao Solomon thako khengshi.

⁷Phikü apaüh atheautsünoikün akausai khaiuniahoi tsak kamloküta, Solomon thso Rehoboam sau ti mongekü thatü henkü noitaoko ngüsoüh ngüso mongchiotsün nou choilutkü noiküla.

⁸Lo asamüh APAOU nou David thsaosithsoso hau nokpao oukong kiukü taiutsün thako ehli au yangsanji. Ni süpaihoi asong tsak naiuso nungko hakü chaiou lakkeng jangtsopong nouso sübao Jeroboamüh asam goahoi au shan nungso taim.

⁹Asamüh APAOU ün mesonhoi, Aron thsaosithsoso, naiuso Levihoi nouso koman. Ngüso thangko asamüh amao melehaiüh chhitsün mesonhoi saisileli meson nouso thioshin. Khaiunia sauhai jangtsopong hoikü tsüdekünai onnemok chinyat kankü shi-e apato asam goa nouso ün meson tsakli losiokü theau noiküla.

¹⁰“Lüko samüh APAOU sam Goa losaokü yathsüo naiuso apa leankü tsünoi. Aron ainou chetsinyimtsün meson nousoüh ngüso chhisiya chhiji naiuso Levihoi nousoüh ngüso hachuji.

¹¹Ahom, asham tsütokü ngüsoüh apahau angannyamtsün naiuso thainian athum jahkü aloat chaithio nou kiuji. Ngüsoüh amkham nai sanglingkü puo nai taiutsün themtsai nouso chaithio kiuji, naiuso asham pungkü ngüsoüh sübao chaiou lakkeng nou shankü tson taiutsün noin nungko tson nouso sunkü taiu. Samüh APAOU nou ti thoilut nung chhiji, lüko asamüh apa leankü noin.

¹²Goa apa pem sam ahei noin naiuso asam thako ehli au samtü jangong matkü jonau khemlokü apa meson nouso nungko noin. Israel khaiu- niaso, asam paosiposo Goa, APAOU thako asam ehli latsalo! Asamüh tsüshio-e!”

¹³Nungtaoko, Jeroboamüh apa süpaihoiso ajantso Yihuda hai süpai hoiso ajantso phiai ehjio au hong, naiuso apoi nousoto kha ai wao-e au khukü noiküla.

¹⁴Yihuda haiüh apemai lemkü thapnai ngüso lemlowankü epsan. Nungai ngüsoüh APAOU noutü ahachu au vekü ngiom naiuso mesonhoi nousoüh jangong nou matkü noiküla.

¹⁵Yihuda haiüh sang asong nou vekü, Abijaüh niakü ngüsoüh ehoi nousotü kom; Goa nou Jeroboam naiuso Israel hai süpai shiolowan.

¹⁶Israel hai Yihuda hai ainou khulükhun, naiuso Goa nou Yihuda hai hau Israel khako shiolowan-i.

¹⁷Abija naiuso apa süpaihoi million apaitso loatkü wan.

¹⁸Nungti Yihuda khaiuniahoi nousoüh Israel hai khako ashio nou epm, tiautenai ngüsoüh ngüso paosiposo Goa APAOU nou da niolutkü noiküla.

¹⁹Abijaüh Jeroboam süpaihoi nouso tü komkü khu naiuso apa ün noknio ajantso thalowan: Nungso Bethel, Jeshana, naiuso Efron, naiuso nung noknio nouso shimkü noitsün nok nouso thalowan.

²⁰Abija nokshing taoko to Jeroboamüh apa oukong tilaitso tsüepshi. Athon nai APAOU nou apatü pha po, naiuso apa ean.

²¹Abija oukong songkü iula. Apa tsammongnyiu chekü püle noiküla, naiüso melothso kheikü nime naiuso menyiuthso chekü luok noiküla.

²²Abijaüh ti chhin, naiuso ti ngiom, nung ngiolat apoi nouso e-po Iddo ün Ngiolat Thsam nai satkü taium.