Read Khiamniungan Naga 2 Ateng Chhi 16 Bible Online

2 Ateng Chhi 16 - Khiamniungan Naga bible

2 Ateng Chhi 16

¹Yihudahai Nokpao Asa nokshing pon aosamkü luok nouko nai, Israel hai Nokpao Baashaüh Yihuda komküta Yihuda nai naptsün si akhutsün yam kiapau apaüh Rama noknio pe mongkü shanshikü noiküla.

²Nungtiphe nokpao Asaüh Amkham Tsam chaitaiu tsam ainou naiuso nokpao tsam ainou chaiou lakkeng naiuso tangkason loküta Damaska nai Siriahai Nokpao Benhadad dongai nung ngiongem kankü hong:

³“Sam posoli sam lüko mei-ekü theko. Nung chaiou lakkeng si tangkason nou nihau paopei tsak noin. Nungtiphe lo Israelhai Nokpao Baasha ko ni mei-ekü noitsün alaolowan nungailu apaüh apa süpaiso jü goumchi ainou leklowan-e.”

⁴Nokpao Benhadad nokpao Asa mongyangko mongchioha küta apaüh apa ün asonghoi nouso naiuso ngüso süpaihoi Israelhai noknio nouso naiuso ngüso süpaihoi ngüsoüh Ijon, Dan, Abel Bet naiuso Maaka thalo- wan, naiuso jimsivei kamtaiutsün Napthalihai noknio nouso apem thalowan.

⁵Tilai Nokpao Baashaüh loti thawaoji nung lula, apaüh Rama noknio lomongtsün laowan naiuso chhisiya nou le-an.

⁶Nungai Nokpao Asaüh Yihuda goumchi apem ainou khaiunia lokam küta ngüso tü nokpao Baashaüh Rama nai kankeitsün lung si khio nouso kankü khuau ngiokhem kiu, naiuso nung ngüsoüh Geba si Mizpa noknio nouso lomongshiau kankeikü noiküla.

⁷Nungtaoko nai e-po Hanani Nokpao Asa dongai khukü ngiom, “Ni APAOU a-Goa, tü nioluttsün liko Siriahai nokpao tü niolutphe, Israelhai nokpao süpaihoi nouso ni ainou thakhuwaniu.

⁸Sudanhai naiuso Libiahai ehli tsamkei naiuso mokthso nai noitsün khaiunia naiuso süpaihoi asong tsütaiu süne? Lüko ni APAOU tü niolut nou shioko, apaüh kium.

⁹Sauhai apatü mongpem saitha noiji, ngüso hau oukong kiuau, APAOU nou goumchi athum khako shimkü jiokü thapkü noiji. Ni mong- yang tsünoikü a-iu haili chhisaniu, nungtiphe lo nai yaküto ni asaita ehli nai noi-e.”

¹⁰Nung ngiongem nou nokpao Asa e-po nouko thatü mongmatkü iula, küta apaüh e-po nou sonau nou kekü wanan. Naiuso nung taoko nai lu Asaüh khaiunia ajantso tü atsüojinyang tsülepkü chhisiya au tsalokü noiküla.

¹¹Asa nokshing aya ainou athon saokü ashithawaotsün chikü Israel- hai si Yihudahai Nokpaohoi Ngiolat Thsam nai satkü taim.

¹²Asa Nokpao nokshing pon aosamkü lükao nouko nai apa hokkia tsangkü chiukao noiküla, nungtaoko lüko apa ahachu au APAOU dongai laokü tsüshi lüko moushe ngepohai dongai khuwan.

¹³Pon nime noiküta apa ean,

¹⁴küta apaüh meshen chija langsattsün lung etam nai David Noknio ai khaiutsom khiam khemlo naiuso ngüsoüh apa eantsün mongsaiukü in thatü songkü jahkü noiküla.