Read Khiamniungan Naga 2 Ateng Chhi 17 Bible Online

2 Ateng Chhi 17 - Khiamniungan Naga bible

2 Ateng Chhi 17

¹Jehoshafatüh apa po Asa nokpao noikham lilo küta Israel thako apa noithang lokongshi.

²Apaüh apa süpaihoi lomongkü taiutsün Yihudahai noknio nouso, Yihuda goumchi athun nouso ai, naiuso Asaüh Efraimhai goumchi nai thalotsün noknio nousoko taiukü noiküla.

³APAOU nou Jehoshafat oukkiu tiautenai apaüh apa po aya aaki taoko nou khekkü Baal tü tsü-amkhamkü noiküla.

⁴Apaüh apa po Goa yathsüo, Goa ün athoilut- tsünso angio angkü kankei, naiuso Israelhai Nokpaohoi nou chhisiya- tsün saisileli apaüh tsüchihakü noiküla.

⁵APAOU nou Jehoshafat hau Yihuda nokshing mongkü shanau kium, naiuso khaiunia chikü nou apa hau paopei nouso kankü shikiu, nungshioko apa memei naiuso apemüh lomsankü noiküla.

⁶APAOU yathsüotsün nai apa mongsongkü iulaküta Yihuda nai menyiu Ashera sotsom amkhamtsün athang nouso chikü lothean.

⁷Apa nokshing pon süme nouko nai apaüh Yihudahai noknio nouso ai tsandeau aniakeihoi nungso hongpeng- kü noiküla, ngüso Benhail, Obadia, Zekaria, Nathanel, Mikaia.

⁸Ngüsoko aikü Levihai khaiunia lükao naiuso mesonhoi nime noiküla. Levihoi nouso nungso noiküla. Shemaia, Nathania, Zebadia, Asahel, Shenivarmot, Jehonathan, Adonija, Tobia, naiuso Tobadonija; naiuso meson khaiunia nime nüne: Elishama naiuso Jehoram noiküla.

⁹Ngüsoüh APAOU Ngiokhem Thsam loküta, noksong chikü thapekkü khukü noiküla.

¹⁰APAOU nou Nokpao Jehoshafat nokshing lemkü noitsün chenpa nouso apako ehli tsaloau hatkü iula-in.

¹¹Nokpao Jehoshafat dongai Filistiahai ajantsoüh tangkason naiuso amao paopei nouso piakü kankü shin, naiuso Arabhai ajantsoüh apa hau onnemok heng 7, 700, naiuso won heng 7, 700, ta kankü shin.

¹²Nung- tiphe Jehoshafat oukong tsülaokü loüh tekkü shingkü iula. Jimsivei piakü kamsan taiuau apaüh

¹³Yihuda goumchi apem nai noknio nouso lomongshikü shan. Yirusalem nai apaüh kau lingkü

¹⁴amaohai khengai ange amoun noitsün ahei nouso taiu. Yihudahai kau ainou süpaihoi ahei Adna noiküla naiuso apako süpaihoi heng 300, 000, noiküla.

¹⁵Nime nouko Jehohanan, apako süpaihoi heng 280, 000 noiküla,

¹⁶naiuso süme nouko Zikri thso Amasia, apako süpaihoi heng 200, 000 noiküla. (Amasiaüh APAOU yathsüoau meshen chija thumkü kium.)

¹⁷Benjamin kau ainou süpaihoi ahei Eliada noiküla, apa amaohai khengthiokü ange amoun tsak, loüh apa khemko dun saiukü suntsün, shiikhao naiuso uokop loktsün khaiunia heng 200, 000 noiküla.

¹⁸Apa thanko nime nou Jehozabad apako ehli au thatü mounkü noitsün khaiunia heng 180, 000, noiküla.

¹⁹Nung khaiunia nousoüh Yirusalem nai nokpao yathsüokü noiküla, naiuso loüh nungko hakü apaüh Yihuda nai noknio nouso lomongkü taiutsün nai amao süpaihoi lüko taiukium.