Read Khiamniungan Naga 2 Ateng Chhi 18 Bible Online

2 Ateng Chhi 18 - Khiamniungan Naga bible

2 Ateng Chhi 18

¹Tilai Yihudahai Nokpao Jeho- shafat memei naiuso niansong iula, apaüh apa tsammongso si Israelhai Nokpao Ahab tsammongso jetko khaiunia tsak tsamsigoh yangau khemsankü noiküla.

²Pon intso phiai Jehoshafat Ahab sailuau Samaria noknio nai khukü noiküla. Jehoshafat naiuso apako hatsünso asuhatkiukü, Ahabüh onnemokhoi naiuso jangtsohoi piakü loatkü sümai tsak shan. Apaüh Gilead goumchi nai Ramot noknio komau thaiutha apako ha-iau Jehoshafat shioloau kowekü noiküla.

³Apaüh sangkü ngiom, “Ra- mot komheau ni ngüko khuha-emo?” Jehoshafatüh thalakü ngiom, “Ni tilai khu-e, ngo khemlokü noin naiuso nungli jü süpaiso khemlokü noin, Sam niko halutte.”

⁴Nungai apaüh ngioshin, “Lüko chongting nai ngo APAOU tü sangluko.”

⁵Nungtiphe Ahabüh e-po nouso tsom 400 thatso, küta ngüsotü sangkü ngiom, “Ngo Ramot komau khu-e süne tsükhu-e?” “Nung lükom,” ta ngüsoüh thalakü ngiom, “Goa nou ni hau ashilotsün kiu-e.”

⁶Lüko Jehoshafatüh sangshikü ngiom, “Samüh APAOU tü sangluau loüh nungko amao e-po tsünoi süne?”

⁷Ahabüh thalakü ngiom, “Loüh nungko tsak noishin, apa Imla thso e-po Mikaia-noin. Lüko ngo apa chinyanji tiautenai apaüh tilaitso ngü hau khapiam ngio amei tsükiuji; nung asaita tsümeikülu noiji.” “Ni nungto langio!” ta Jehosha- fatüh thalakü ngiom.

⁸Nungtiphe Nokpao Ahabüh mikhem noikham nai asonghoi nouso tü liukü khuküta Mikaia nialokü ashi ta ngiom.

⁹Nokpao nime nemtsoüh ngüne nokpao neshe shitholokü tsonyak nyatsün athang ai ngüne nokpao noikham ai Samaria moknoikü bekhan chiai e-po nouso chikü nou ngüne khako khapiam ngio chiten.

¹⁰Ngüso ongko tsak, Kenana thso Zedekiaüh son jangong shanküta Ahab tü ngiom, “APAOU nou nung ti ngioji, ‘Nungsoüh ni Siriahaiko li-e naiuso ngüso moisemkü shiohean-e!”

¹¹Amao e-po nousoüh ngioyak vekülu ngiom. “Ramot thako lükhu naiuso ni ashio nou eppe,” APAOU nou nihau ashio nou kiu-e.

¹²Nungtaoko, asonghoi tsak sau e-po Mikaia nialoau khukü noiküla apaüh ngiom, “E-po chikü nou nok- pao thaiutha ashiolotsün khapiam ngiokiu-iu lüko ni meitso chhikiu-e.”

¹³Lüko Mikaiaüh thalakü ngiom, “APAOU aa-noitsün lektso, ngo jü Goaüh ngütü ti ngioji nung ngio-e!”

¹⁴Tilai apa Nokpao Ahab khako shin, nokpao nou apatü sangkü ngiom, “Mikaia, Nokpao Jehoshafat naiuso ngo khuküta Ramot kome süne tsükom-e?” “Lükom!” ta Mikaiaüh thalakü ngiom, “Ashio to ni shio-e. APAOU nou nihau ashio nou kiu-e.”

¹⁵Lüko Ahabüh thalakü ngiom, “Tilai ni APAOU nianko ngüko chiteji, ngiotsüo nou achite! Ngo nung nihau titsojam chite-e?”

¹⁶Mikaiaüh thalakü ngiom, “ngo Israelhai süpaihoi onnemok ajimtsün tsak tsühakü king nouso ai peng- punkü noitsün khekkü epji. Naiuso APAOU nou ngiom, “Nung khaiunia- hoi nouso ahei tsünoi; ngüso aaluko tsamai lükhuwan-i.’”

¹⁷Ahabüh Jehoshafat tü ngiom, “Apaüh tilaitso jü thaiutha khapiam ngiomei tsüchiteji ta ngo nitü ngio-iu, nungko asaita tsotsak tsümeikü noiji!”

¹⁸Mikaiaüh tsülaokü ngioji: “Lo APAOU no ti ngioji anglu! Ngo APAOU nou apa hong apa phiko tsakü noikü apa nokpao noikham aün ai moknoikü epm.

¹⁹APAOU nou sangkü ngiom, “Apa khuküta Ramot nai loatkü wanau sauüh Ahab sapthio-e?’ Onthso tsak khaai, APAOU dongai shimkü shiküta, ngo apa sapthio-e ta mongiokün lektso

²⁰honghoi ajantsoüh in tsak ngiokü noiküla. ‘Titi’ ta APAOU nou sangkü ngiom.

²¹Onthso nou thalakü ngiom, ‘Ngo khuküta Ahab ün e-pohoi chikü hau yaang ngio chite-i-e.’ APAOU nou ngiom, ‘Lükhu küta apa lüsapthio. Ni ashio nou eppe.’”

²²Naiuso Mikaiaüh philokü ngiom: “Nung thawaokü haolu noin. APAOU nou ni nou e-po nouso hau nihau yaang chite-i-iu. Lüko apaüh meshen chija ni asapat nou phete-e ta ngiowaniu!”

²³Nungai e-po Zedekia e-po Mikaia dongai sungküta apa khaai pat, naiuso sangkü ngiom, “APAOU Onthso tilai ngü ainou punge küta niko chitekü noiküla?”

²⁴Mikaiaüh thalakü ngiom, “Ni tilai phiai laokü khuküta tsampai nai pame nungai ni epsane.”

²⁵Nungai Nokpao Ahabüh apa asonghoi tsaktü ngiokhem kiukü ngiom, “Mikaia lükelo küta noknio ün nokshingpaou Amon dongai apa kankü lükhu, naiuso Nokpao Joas dongai kankü lükhu.

²⁶Ngo moya- saoshikün lektso apa akhotsamai lütaiu naiuso apa hau themtsai si khiamsanglu lükiu ta ngüsotü lüngio.”

²⁷Mikaiaüh vekü ngiom, “Ni aa laokü yashi naito,” “APAOU nou ngü tsangkü tsüchite!” Naiuso apaüh ngioshin, “Khaiunia pungkü nou, ngo ti ngioji nungtü anglu!”

²⁸Nungai Israelhai Nokpao Ahab naiuso Yihudahai Nokpao Jehoshafat ne Gilead goumchi ai Ramot noknio komheau khu.

²⁹Ahabüh Jehoshafat tü ngiom, “Sam ehlithang nai khunai, ngo jüchija kausai-e, lüko nito ni nou nokpao neshe nou thokü athe.” Nungtiphe Israelhai Nokpao Ahab ehlithang nai amaohai tsakli kausaikü khukü noiküla.

³⁰Siriahai nokpao nou ehli tsamkei nouso tü Israelhai nokpao tü shimkü amao tsaktso tsüloat au ngiokhem kiukü noiküla.

³¹Nungtiphe tilai ngüsoüh Nokpao Jehoshafat ep, ngüso chikü nou apa to Israelhai nokpao noin ta yang, naiuso ngüso apatü li-eau phoklekü shin. Lüko Jehoshafatüh sang asong nou vekü ngiom, naiuso APAOU nou apa kipsankiu naiuso apa ainou ehli nou phoklekü khuwan.

³²Ehli tsam ahei nousoüh apa Israelhai nokpao tsüde ta epsan, nungtiphe ngüsoüh apatü komtsün laowan.

³³Tsüngeankü, Siriahai süpai tsaküh Uokop chon tsak kopnai Nokpao Ahab tü chek nai pepkü noiküla. “Ngo tawaianiu!” Ta apaüh apa ehli tsamkei niatsün tü vekü ngiom. “Aphokle küta ehlithang ainou ngü akanlükhunan!”

³⁴Ehli thatü thsüokü iulaphe, Nokpao Ahabüh apa ehli tsam chiai Siriahai noutü kha sheilutkü ngüchukü noi. Ajenap taoko apa ean.