Read Khiamniungan Naga 2 Ateng Chhi 19 Bible Online

2 Ateng Chhi 19 - Khiamniungan Naga bible

2 Ateng Chhi 19

¹Yihudahai nokpao Jehoshafat apa tsam Yirusalem nai meikü laokü yashin.

²E-po tsak, Hanani thso Jehu, nokpaoko pheteau khuküta apaüh nokpao tü ngiom, “Akausaihaitü hachuau naiuso APAOU tü chinyantsünso dongai haau ayam thakü noin ta ni yangji süne? Ni ti chhisiyakü noin nungüh akhako APAOU ün amongmat kankü shi-iu.

³Nungti lüko, ni da amei intso noin. Ni menyiu Ashera sotsom nouso sübao khaiuniahoi nousoüh amkham- kiukü noiküla nungso chikü lawaniu, naiuso ni Goa mongchio nai hoilut au kowekü noin.”

⁴Nokpao Jehoshafat Yirusalem nai kihlüko, ngüso paosiposo Goa, APAOU dongai khaiuniahoi nou phoklekü shi-iau thaiuthako, apa meshen khaiuniaso ongko ajepekki Beersheba ainou ajenapki Efraim hai king goumchi athon saokü atao pungkü tsakeikü noiküla.

⁵Apaüh Yihuda nai lomongkü taiutsün noknio nouso pungkü mikhem nouso taiukiu

⁶küta ngüso hau ayam nungti han: “Mikhem kiuau thatü tsüokü lüthe; asamüh nung chhisiya khaiunia oukong khako tsüde, lüko APAOU oukong nai chhisiyaji, naiuso tilai asamüh mikhem kiu-e apa asamko hakü noin.

⁷APAOU hau asu- hat lükiu naiuso tsüokü lüchhisiya, tiautenai APAOU sam Goaüh ngiotsüo tsüdekün, tsüdekünai phaphipha- mong, tsüdekünai nekhem paopei lotsün tsüjeitaiuji.”

⁸Yirusalem nai nokpao Jehosha- fatüh noknio nai kihtsünsoko ayam nai tsüjeiai-ekü tsüdekünai APAOU ün Ngiokhem phiowantsünko hakünai mikhem kiuau paopunghoi ahei ajantso naiuso Levihoi, si mesonhoi taiukium.

⁹Apaüh ngüso hau ayamhan nungso kiukü noiküla: “Asamüh asam chhisiya nouso APAOU hau asuhat kiukü chhisiya au noin, asam chhisiya alumko apatü mongkiukü, asuhatkü chhiau noin.

¹⁰Tilüsong taoko asam deisiniosoüh noknio tiailünou asam khako aloattsün mi tsüdekünai ngiokhem tsak tsüdekünai athoiluttsün tsak phiowankü kankü shi-e, asamüh ngüso hau mikhem khako saisile titi kankei-e nung thaiutha ayam amei lühan, nungaito ngüso APAOU thako aphio suntsün nai tsünoi-e. Asamüh tsüchhikün lektso, asam si asam deisiniosoüh APAOU ün amongmat oukong nou nge-e. Lüko asamüh asam chhisiya chhi naito, asam aphio tsüde-e.

¹¹Donthe yamai misingem apem Akhengting meson Amaria tü oukong athonting noi-e, naiuso kihkih yamko misingem apem Yihu- dahai nokshingpaou, Ismael thso Zebadia tü oukong athonteng noi-e. Nung mikhem tsamko khemlotsün chhisitsüchhi ta thapau Levihoi nouso thsale noi-e. Nung ayamhan nouso kankü khuau mongsongkü lüthe, naiuso ayam thakü nouso dongai APAOU lünoi!”