Read Khiamniungan Naga 2 Ateng Chhi 2 Bible Online

2 Ateng Chhi 2 - Khiamniungan Naga bible

2 Ateng Chhi 2

¹Nokpao Solomonüh APAOU amkhamau Amkham Tsam tsak naiuso loüh apa thaiutha nokpao tsam tsak laau yangsan.

²Apaüh khaiunia heng 70, 000 nou jengtsaiu kanjikanau taiu, naiuso khaiunia heng 80, 000 nou lunglangau ta chhisiya nai thiokü taiu. Nung chhisiya nousotü paotsangkü shingau khaiunia 3, 600, taiukiu.

³Solomonüh Tair Nokpao Hiram dongai ngiongem tsak nungti hong: “Ni jüpo Nokpao David hau apa ün nokpao tsam laau Cedar pai nouso jankiukü chailetsünli ngüko aikü achhihashi.

⁴Ngo Amkham Tsam tsak jü Goa APAOU lomsanau lahji. Nung asio thang tsak tiko jü khaiuniaso naiuso ngo angannyam- tsün laoshang jahkü apa amkham-e, naiuso tiko samüh asio themtsai chaithio nouso asaichi ta taiukiu-e, naiuso tiko samüh ahom si asham tsütokü ajahtsün chaithio nouso thio-e, Yihuda Anonyi lüko, Alei Yan Sümai nouso lüko, naiuso amao asio ajekhaiu nouso tiko samüh sam Goa APAOU lomsantsün lüko kiu-e nung chaiou noin. Apaüh nung asaita hau thaiutha Israel tü thoilutkü noin.

⁵Ngo laau nou amkham tsam nou asong noin, tiautenai sam Goa apemko asongting noin.

⁶Lüko sauühtso Goa thaiutha atsüoting amkham tsam lah au tsüshio, tiautenai aün apun nouso chikü nungko tsüchom. Nungaito titi ngo nungtü simkü nou Goa hau angannyamtsün jah au athang amkham tsam tsak nou lah au shio-e?

⁷Nungtiphe lo ngühau sotsom thanglutkü shanau, chaiou lakkeng shanau, tangkason shanau, taoson shanau, naiuso son shanau, naiuso asangnyaleng shanau, anyakhaoleng shanau, naiuso nepet asengleng shanau montsün, nungso chhisiya nai mothikü ngetsün khaiunia tsak ahong. Apaüh jüpo Davidüh waimonhoi Yihuda si Yirusalem nai chosantaiutsünso ko aikü chhisiya-e.

⁸Ni nou paitü metsün khaiuniahoi titi amounting noin ngo ngeji, nungtiphe ngühau Lebanon ainou Cedar pai Cipris pai, naiuso Jünifer pai nouso ahong.

⁹Alinpai nouso piakü khemsan taoko nitü hachuau jü khaiuniaso hongau khemkü noin, tiautenai ngo lah au noitsün amkham tsam nou asong naiuso athanga tsak noi-e.

¹⁰Naiuso athaplu, ni nou achhitsün khaiuniahoiüh heshiuau jinyak metrik ton 2, 00 barlitso metrik ton 2, 000, theng nou liter 400, 000, naiuso Olip khiam nou liter 400, 000, ngo kiu-e.”

¹¹Nokpao Hiramüh Solomon dongai athalatsün thsamsat tsak hong. Apaüh nungti satkü noiküla, “APAOU nou apa khaiuniaso tsüojin shioko, apaüh ni ngüso nokpao au shankium.

¹²APAOU Israel Goa, goum naiuso aün shantsün nian lülom! Apaüh Nokpao David hau, mongthat mongsai noitsün, amoun naiuso angelatsün nou meankü, sauüh lo APAOU thaiutha amkham tsam naiuso apa thaiutha nokpao tsam tsak lah au ayang noin nung melothso tsak kium.

¹³Ngo adongai waimon naiuso apem chiko pha chhinai amei mongthat mongsai khaiunia tsak nian nou Hiram hongji.

¹⁴Apa nyiu Dan kau ainou mepem tsak noiküla naiuso apa po to Tair paopung tsak noin. Apaüh chaiou lakkeng, tangkason, taoson, son, lung, naiuso pai nouso ainou tilünou shithoau mounji. Apaüh lung asangnya, anyakhao, aseng, naiuso ne amatchai noutü chhiau mounji. Apaüh athangluttsün tilünou naiuso ti alengyam chhiau apahau han-e nungso in pungkü chhisiya au mounji. Apa hau ni nou achhitsünsoko naiuso apo Nokpao David hau chhikiutsünso aikü lüchhiha-i.

¹⁵Nungtiphe samhau lo ni thalotaiutsün jinyak, Tsonyak, theng naiuso Olip-khiam nouso ahong.

¹⁶Lebanon king nouso ainou samüh ni pohtsün cedar pai nouso apem sahonge, küta nungso kamkü ke- shiküta Japa saokü khiam tsangkü honge. Nung ainou ni nung pai nouso Yirusalem ai kankü khuau shio-e.”

¹⁷Nokpao Solomonüh apa po Davidüh mepemve lotsün khekkü Israelhai goumchi nai gohmao khaiunia kihatsünso mepem 153, 600 noiküla.

¹⁸Apaüh ngüso ongko nou jengtsaiu kankü shiao 70, 000, naiuso king nouso ai lung nouso langsanau 80, 000, naiuso nung chhisiya nouso chhisan-iau ashingau khaiunia 3, 600, ta chhisiya haoson nai thoilutkü taiukiu.