Read Khiamniungan Naga 2 Ateng Chhi 20 Bible Online

2 Ateng Chhi 20 - Khiamniungan Naga bible

2 Ateng Chhi 20

¹Atao intso noiküta Moabhai naiuso Ammonhai süpaihoi ngüso chanetsün Meun haiko hakü Yihudahai komhean.

²Ngiongem kantsünso ajantso shiküta Nokpao Jehoshafat tü velutkü ngiom: “Edom ainou süpaihoi asong tsak Ee Khiamnok etsakai nitü poau shikü noin. Ngüsoüh Hazazon Tamar to thalowaniu.” (Nung amao nian nou Enedi ta noin.)

³Jehoshafat lekatkü APAOU tü yam niaau misao sao. Nungai apaüh goumchi thapekkü keithon tsak noiau ngiokhem kium.

⁴Yihudahai noknio pungkü ainou khaiuniahoi liuliukü Yirusalem ai APAOU tü ayamhan sangau khu,

⁵naiuso apa si Yirusalem khainiahoi nouso Amkham Tsam keng ayan nai kamshin. Nokpao Jehoshafat ngüso khako khukü tsaküta sang asong nou misao saokü ngiom,

⁶“O APAOU sam paosiposo Goa, ni goumchi mele chikü khako aün nai nokshing shingji. Ni oukong naiuso akongting noin, naiuso sauüh nitü khengshiau tsüshioji.

⁷Ni sam Goa noin. Tilai akhaiunia Israelhai nung goumchi nai shin ni nungko kihtsün khaiuniahoi nouso komanküta nung goumchi Abramham, ahai, thsaosi- thsoso hau ngüsoüh asaita theau kium.

⁸Ngüso nungko kihkü ni lom- sanau amkham tsam tsak lahsankü noin

⁹ngüso tü akuo tsümeikün tsaküh shithan nai-ehli tsaküh imkia tsaküh, tsüdekünai naiusile tsaküh thio-e, nungai ngüso shikü ni hau Amkham kiutsün nung Amkham Tsam khako tsakü hau shio-e. Ngüsoüh nitü ngüso angja nai misao au shio-e, naiuso ni ngüso misao lulakü ta ngüso kipsane.

¹⁰“Lo Ammonhai, Moabhai, naiuso Edomhaiüh samtü pha nou puoji. Tilai sam paosiposo Ijip ainou shikhukü noiküla, ni ngüso nung goumchi nouso ai napau tsükiu nung- tiphe sam paosiposo ngüso lemlokü khuwan naiuso ngüso tsülomoküwan.

¹¹Ngüsoüh samhau nung laokü kiushiji-nung ni sam hau kiutaiu- tsün goumchi ainou sam komanau ngüso shikü noin.

¹²Ni sam goa noin! Ngüso hau angja akiu, tititenai sam tü komtsün nung süpaihoi asong khako sam ti ayang tsünoi. Samüh ti chhi-e samüh tsünge, lüko samüh nitü ahachu thaiutha yamji.”

¹³Yihuda pohai chikü, ngüso tsammongnyiuso naiuso methsoso hakü nung Amkham Tsam nai tsakü noiküla.

¹⁴Hoi asong ongko noitsün Levihoi tsak khako APAOU Onthso saom. Apa Zekaria thso Jahaziel ta niankü noiküla. Apa Asaf kau ainou mepem tsak noiküla naiuso Asaf ainou Mattania, Jeiel, naiuso Benaia tsangkü thsaosithso tsak noiküla.

¹⁵Jahazielüh ngiom, “Asuhatkü noitsün Nokpao naiuso Yihuda naiuso Yirusalem khaiuniahoi chikü, nung süpaihoi asongko wao-eau asam hatkü tsüdekünai monghenkü lanoi ta APAOU nou ngioji. Ehli nou asam chiai tsüde lüko APAOU chiai noin.

¹⁶Ngüso lühom Ziz Aoyan ai shinai ngüso lüko, asamüh ngüso liutsa goh dongai khutsün Jeruel dongko tsamei thun nai phete-e.

¹⁷Nung ehli nai asam li-eau tsünoi. Asam ehjiothang nouso lülo küta ataiu. APAOU nou asam hau ashiolo kiutsün asamüh eppe. Yihuda naiuso Yirusalem khaiuniaso, henyikü tsüdekünai hatkü lanoi. Ehli thang nai lükhu, naiuso APAOU nou asamko hakü noi-e!”

¹⁸Nungai Nokpao Jehoshafatüh apa kha goh nou ta saothankü kauthio, naiuso apa khaiuniaso chikü nou apako hakü kauthio naiuso APAOU amkham kiukü noiküla.

¹⁹Kohat si Kora kau Levihoi nouso mepem tsaküta sang asong nou APAOU Israel Goa nianlom kiukü noiküla.

²⁰Nungthan nyap ahom beta khaiuniahoi nou Tekoa shimkü liutsa goh nai khu. Ngüso tsalokü khutsün taoko, nokpao Jehoshafatüh ngüso tü nung ngio nouso chimkü noiküla: “Yihuda naiuso Yirusalem khaiunia- hoiso! Asam amonglam APAOU asam Goa da lütaiu, naito asam mongkü tsakü noi-e. Asamhau apa e-po nou- soüh ti chiten nung tü lümonglam, naiuso asamüh ashio nou eppe.”

²¹Khaiuniahoi nou tü sanglukütün phiai, nokpao nou jihanghoi ajantso tü ngüsoüh asio ajekhaiu nai thotsün phalaiu phakhut nouso thelokü süpaihoi khako nung jihangkü lükhu ta ngiokhem kium: “APAOU lülom! Apa atsüojin athontsüyang!”

²²Tilai ngüso jihangau yalo, APAOU nou akomheau shitsün süpai- hoi henyikü iula-i.

²³Ammonhai naiuso Moabhaiüh Edomhai süpaihoi tü pha puo naiuso nung moisemkü lomowan, küta ngüsosingüso jetko ehli thatü thsüokü tsaokü iulawan.

²⁴Tilai Yihudahai süpaihoi nou koilop tsak sübao liutsa nai noiküla nung athang shisaom, ngüsoüh ehoi nouso tü thapnai ngüso chikü goh ai loikü eankü ep. Ngüso tsaktso tsüthakhukü noiküla.

²⁵Jehoshafat naiuso apa süpaiso jengtsaiu yanloau nap, nungai ngüsoüh jang piakü, jimsivoi piakü, neshe piakü, naiuso amao chai apia mai jengtsaiu nouso epkü noiküla. Ngüsoüh nung jengtsaiu nouso kamloau ajekhaiu samnyi wan, lüko nungko ngüsoüh tsüthalo khemkü jengtsaiu apiating noiküla.

²⁶Aje- khaiu pülenyi nouko ngüso Beraka tsamei nai kamshiküta apaüh chhitsün chikü thaiutha APAOU hau nianlom kiukü noiküla. Nungshioko nung tsamei nou tü Beraka ta jon athat “Nianlom.”

²⁷Jehoshafatüh apa süpaihoiso Yirusalem, ai ashio epkü laokü niakü shin, tiautenai APAOU nou ngüso ehoi shiohean.

²⁸Tilai ngüsoüh noknio nou yasaom, ngüso poipoi naiuso jangongmattsün jihang dongai Amkham Tsamai khukü noiküla.

²⁹Mele pungkü APAOU nou Israelhai ehoi titi shiolo nung ngem lula nai hatatkü noiküla,

³⁰nungti Jehoshafatüh aalo nai nokshing shing, naiuso Goa nou apa hau aniokun pungkü ainou aalo kium.

³¹Jehoshafat Yihudahai nokpao au achetpon aosamkü pungo nai tsalo naiuso apaüh Yirusalem nai pon kheikü pungo nokshing shing. Apa nyiu Shilhi menyiuthso Azuba noiküla.

³²Apa khako apa po Asa khekkü, apaüh APAOU khako ti ayam thakü noin nung chhin,

³³lüko paisilung amkhamthang nouso tsülomowankü noiküla. Khaiuniahoi nou ngüso paosiposo Goa amkhamau mongpem apem nou tsüphoklekü noiküla.

³⁴Apa nokshing chongting ainou athon saokü, Jehoshafatüh chhisiya tsün alum Hanani thso nou Jehu Ngiolat Thsam sübao Israelhai nokpao nouso Ngiolat Thsam apaitso nou noin nungko sattaim.

³⁵Ataojam Yihudahai Nokpao Jehoshafatüh Israelhai Nokpao Ahazia sauüh akausai chhisiya piakü chhikü noiküla nungko amei-e tsak shankü noiküla.

³⁶Kheng shilaotsün Eziongeber athang nai ngüsoüh khiamnok nai kihtsün kheng asong nouso shankü noiküla.

³⁷Lüko Maresha noksong ainou, Dodavalu thso Eliezerüh Jehoshafat tü lohatkü noiküla. “Ni Ahazia ko mei-ekü shantsün shioko, ni ti shantaiu nung APAOU nou lothean-e.” Naiuso kheng nouso satkü ashikei au tsümeikü noiküla.