Read Khiamniungan Naga 2 Ateng Chhi 22 Bible Online

2 Ateng Chhi 22 - Khiamniungan Naga bible

2 Ateng Chhi 22

¹Arabhai ajantsoüh heikü yam- pek naiuso Nokpao Jehoram thsoso ongko niophiting Ahazialu poitaiukü amao thsoso apem loatkü wan. Nungtiphe Yirusalem khaiuniahoi nousoüh Ahazia apa po liko nokpao au shan.

²Ahazia, achetpon kheikü nime nouko nai nokpao tsalo, naiuso apaüh Yirusalem nai pon tsak nokshing. Ahaziaüh Nokpao Ahab tsamkhaiu saisile tü hoilutkü noiküla, tiautenai apa nyiu Athalia nung Nokpao Ahab menyiuthsophe naiuso Israelhai Nokpao Omri thsaophe, apa hau ayamhan tsangkü apaüh ngüso angei nai nialükhunkü noiküla.

⁴Apaüh APAOU thako angei chhin, tiautenai apa po ean küta amao nokpao Ahab tsammongso apa hau ayam hantsünso iula, küta ngüsoüh apa nokshing loian-ikü noiküla.

⁵Apa tü ayamhantsünso ngio angkü, apa Israelhai Nokpao Joram ko hakü Siriahai Nokpao Hazael thako ehli au tsalo. Süpaihoi nouso Gilead goumchi Ramot nai wao-e, naiuso Joram tü ehli nai tawaikü noiküla.

⁶Apa atawai ainou meiloau Jezreel noknio nai laokü khu, naiuso Ahazia nungai apa sailuau khukü noiküla.

⁷Ahazia nokshing loiantsün nung Joram sailu au khutsün Goa mong- yang noiküla. Tilai Ahazia nungko noiküla, APAOU nou Ahab nokpaoling lomowanau chosantsün Nimshi thso khaiunia tsak nian nou Jehu nung apa si Joram neko pheten.

⁸Jehuüh Ahab nokpaoling lomowanau ngio- kankü khutsünko, apa Yihudahai aheihoi tsak naiuso Ahaziaüh sailutsün taoko apako hatsün Ahazia ün le lüko hakü yanlükhunkü noiküla. Jehuüh ngüso apem loatkü wan.

⁹Ahazia tü yamkü khunai, apa Samaria nai pamtaiukü epsan. Ngüsoüh apa Jehu dongai nialokü khu naiuso apa loatkü wan. Lüko ngüsoüh apa mea apa pao Nokpao Jehoshafat, sauüh APAOU apaüh shiotsün lektso meikü yathsüokü shin nung asuhat nai khankü wan. Ahazia tsammongsoüh nokpao ün nokshing shiokü kanlükhunau ngüso khaiunia tsaktso tsüpoiküla.

¹⁰Nokpao Ahazia nyiu Athaliaüh apa thso loatkü waniu ta lulako thonkü, apaüh Yihuda kau nokpao thsoso apem loatkü wanau ngio- khemkiu.

¹¹Ahazia nuo tsak meson tsak nian nou Jehoiada ko tsamsigoh yangkü noiküla. Nung nyiuhai nou Ahazia thsoso ongko thso tsak nian nou Joas, akau ai kipsankü, apa amao nokpao thsoso aloatau noitsünso ainou tsanglokü ta Amkham Tsamai tsampai then tsak ko paotsangkü noiküla. Apa tsang- taiutsün tsangkü nung nyiuhai nou Athalia ün aloattsün ainou kipsan.

¹²Athalia menyiu nokpao nou pon luok nokshingtsün tao chikü, apa nungko pamkü noiküla.