Read Khiamniungan Naga 2 Ateng Chhi 23 Bible Online

2 Ateng Chhi 23 - Khiamniungan Naga bible

2 Ateng Chhi 23

¹Pon luok taiuküta phiai meson Jehoiadaüh loto chhisiya tsa- loau atao noin ta thatlokü noikula. Apaüh süpai ahei pungo nouso ko athalou-e tsak shan; Nguso: Jeroham thso Azaria, Jehohanan thso Ismael, Obed thso Azaria, Adaia thso Maaseia, naiuso Zikri thso Elishafat noiküla.

²Ngüso Yihuda hai noknio nouso chikü nai tsakeikü khuküta Levi hai naiuso kau nai ashe nouso chikü Yirusalem nai ngüso ko aikü nialokü shin.

³Ngüso chikü Amkham Tsam nai kamshi küta, nokpao ün thso Joas, ko athalou-e tsak shan. Jehoiadaüh ngüso tü ngiom, “Ean nou nokpao methso nou nungko noin! APAOU nou Nokpao David thsaosithsoso nokshing athontsüyangkü noi-e ta thalotsünli, apa lo yakü nokpao theau noin.

⁴Samüh nung chhiau noin. Tilai me- sonhoi naiuso Levihoi Yihuda Anonyi chhisiya nai shi-e, haoson süme nouko haoson tsak nou amkham tsam bekhan noutü jime.

⁵Amao haoson tsak nou nokpao tsam tü jime, naiuso apoi nouso Athanya Bekhan nai taiuau noin. Khaiunia chikü amkham tsam amongnai kamshi-e.

⁶Mesonhoi si Levihoi sauhai chhisiya nai noin nungso tü simkü amkham tsam mongai tsaktso tsünappe. Mesonhoi si Levihoi to napau shio-e tiautenai ngüso to losiowaniu, lüko amao khaiuniahoi nouso to APAOU ayamhantsün angio angkü kengchiai noi-ela.

⁷Levihoi nousoüh sah lokkü nokpao lemjeikü ehükü tsaau noin, naiuso nokpao tilüsongai khushi-e nungko noiau noin. Ajantsoüh Am- kham Tsamai napau kowenai apato loatkü wanau noin.”

⁸Levihoi naiuso Yihuda khaiuniahoi nousoüh meson Jehoiada ayamhan nouso chhisiyakü khu. Yihuda Anonyi chhisiya ainou khemau lüko khaiuniahoi nou tsüwonan, nungti- phe chhisiya au shitsünso si chhisiya ainou wanantsünso thaiutha ahei nouso asaita saiukü epau shiokü noiküla.

⁹Meson Jehoiadaüh Nokpao David ün jengtsaiu Amkham Tsam ai taiutsün shisilai nouso aheihoi nouso hau kium.

¹⁰Apaüh nokpao nou kiploau sahsingiu loktsünso khaiuniahoi Amkham Tsam khako lemkü taiukiu.

¹¹Nungai meson Jehoiadaüh apa Joas nialokü khengai shin. Küta apa khaiu ai nokpao kandio keilutkiu, küta nokshingkü shitsün Nokpao ling sattaiu nou ngiokhem thsam lop tsak apa hau kium. Nungti apa nokpao au shankium. Meson Jehoiada si apa thsosoüh Joas tsomkiu, naiuso khaiunia pungkü nou vekü ngiom, “Nokpao aakihlaiukü lünoi!”

¹²Athaliaüh nokpao thaiutha ko khaiuniahoi monglengetsün lula, nungtiphe apa ahoi piakü kamthiokü noitsün Amkham Tsamai liuliukü khu.

¹³Nungko apaüh amkham tsamai naptsün dongko süpai aheihoi naiuso jangong mattsünsoüh lemjeikü ayan nokpao nou nokpaohoi thaiutha usankü taiutsün kheam tsak dongko tsakü ep. Nungko khaiunia chikü nou amongleng nou vekü naiuso jangong matkü, amkham tsam jihanghoi nou niakü ngüso jengtsaiu nouso lüko sunkü sümai niakeikü noiküla. Athaliaüh amongmat nou apa nepat chipek küta sang asong nou vekü ngiom, “Kausaiatiu! Kausaiatiu!”

¹⁴Meson Jehoiadaüh Athalia nung amkham tsam kemongko loati au tsüaiu, nungtiphe apaüh süpaihoi ahei nouso jonküta ngiom, “Nung nyiuhai nou ehü nouso jetko kankü lükhuwan, küta khaiunia ajantsoüh apa kipsanau kowe nai apa lüloat.”

¹⁵Ngüsoüh nung nyiuhai nou thaloküta Nokpao tsamai kankü khu naiuso ngüsoüh apa Mokthso Bekhan ta jontsün dongko loatkü wan.

¹⁶Meson Jehoiadaüh Nokpao Joas si khaiuniahoi nouso apa ko hakü ngüso APAOU ün khaiuniahoi theau athalou-e tsak shantsün nai mongshiolo.

¹⁷Nungai ngüso chikü Baal tü amkhamtsün tsamai khu- küta nung nelangkü hethekü wan. Ngüsoüh amthang nou thiopekan, naiuso nung ko taiutsün sotsom nou lotheanküta Baal ün meson Mattan nung amthang khako loatkü wan.

¹⁸Jehoiadaüh mesonhoi naiuso Levihoi nouso Amthang khako loatkü wan. Jehoiadaüh mesonhoi naiuso Levihoi nouso Amkham Tsam chhisiya nai paotsangau taiukiu. Ngüsoüh Nokpao David tsangkü sonkiutsün chhisiya kankü khuau naiuso Mosa ün Ngiokhem tsangkü APAOU hau loatkü jahkü thiotsün chaithio nouso kankü khuau noiküla. Loüh ngüso jihang naiuso nung sümai saohetsün tü paotsangau lüko noiküla.

¹⁹Meson Jehoiadaüh loüh Amkham Tsam bekhan nouso nai khaiunia ajantso amkham yamko tsüyanthsüokü noi nai shimkü tsüshi-iau thaiutha ehü nouso taiuküla.

²⁰Nokpao nou Amkham Tsam ainou nokpao tsamai nialokü shiau thaiutha Jehoiada ko sonthsa nai süpai asong nouso, nokpao nokshing hoi nouso, asonghai, naiuso apoi nouso khaiunia apem halutkü noi- küla. Ngüso bekhanpao nou tsangkü napküta nokpao nou apa nokpao noikham lokü noiküla.

²¹Lo Athalia loatkü wanküta khaiunia chikü amongling nou mean, naiuso noknio nou thatü tsamlokü noiküla.