Read Khiamniungan Naga 2 Ateng Chhi 24 Bible Online

2 Ateng Chhi 24 - Khiamniungan Naga bible

2 Ateng Chhi 24

¹Joas Yihudahai nokpao au achetpon chinyat nai tsalo, naiuso apaüh Yirusalem nai pon aopüle nokshing shingkü noiküla. Apa nyiu Zibia nung Beershebahai noknio ainou noiküla.

²Meson Jehoiada aakihtsün lektso apaüh APAOU khako ayam thakü noitsün chhisiyakü noiküla.

³Jehoiadaüh Nokpao Joas thaiutha tsammongnyiu nime tsamsigoh shankiu, naiuso ngüsoüh apa hau melothso si menyiuthsoso chetkiu.

⁴Apa nokpao tsalokü atao intso noiküla, Joasüh Amkham Tsam lo- mei shiau thatlokü noiküla.

⁵Apaüh mesonhoi naiuso Levihoi nousotü Yihudahai noknio nouso ai khuküta khaiuniahoi ainou Amkham Tsam lomeishiau tangka saiukü shikamau ngiokhem kiu. Apaüh ngüsotü liukü chhiau ngiom, lüko Levihoi nou ataoko chhisanau tsüshio,

⁶nungti- phe apaüh ngüso ahei Jehoiada jonküta sangkü ngiom, “Levihaiüh Yihuda naiuso Yirusalem ainou liukim sübao APAOU yathsüotsün Mosaüh khaiuniahoi ainou APAOU Nejenkhio nai chhitsünso hachu au ngiokhem kiukü taim nungtü ni tiauta tsüthap?”

⁷(Alothetsün nyiuhai Athalia tü hoiluttsün khaiuniahoi nousoüh Am- kham Tsam lochinyanan naiuso asio jengtsaiu nouso piakü Baal amkham nai kankeikü noiküla.)

⁸Nokpao nou Levihaitü chai shikamau thaiutha paidan tsak shan küta nung amkham tsam bekhan nai ataiukiu ta ngiokhem kiu.

⁹Goa yathsüotsün Mosaüh liutsa nai tsakei taoko chongting kamshitsün liukim khaiunia pungkü nou APAOU dongai kankü shiau thaiutha ngü- soüh Yirusalem si Yihuda thapekkü ngio hongpeng.

¹⁰Nungüh khaiunia- hoi naiuso aheihoi nouso monglengi nungtiphe ngüsoüh ngüso liukim chai kankü shikü nungüh paidan meankü noiküla.

¹¹Ajekhaiu pungkü Levihoiüh nung paotsangau nokpao khemko asonghoi sau noiküla apa dongai paidan kankü khukü noiküla. Titaoko nung paidan meane, nokpao asat naiuso nungko Akhengting meson niankü noitsün nou chai loküta paidan nou athang nailu laokü taiushi. Nungti ngüsoüh chai piakü kamshisankü noiküla.

¹²Nokpao nou naiuso meson Jeho- iadaüh nung chai nouso Amkham Tsam lomeishitsünso hau kiu, naiuso ngüsoüh nung chai nou long langhoi nouso tsamlahoi nouso, naiuso son chhisiyatsünso, sauhaiüh tsam ayan- shanshi au meji ngüso mephaiu tuh au kankei.

¹³Achhitsünso khaiunia- hoi chikü nou thatü kongkü chhisiya, naiuso ngüsoüh Amkham Tsam nou aya aililu mongkü shanshikü noiküla.

¹⁴Tilai tsamlahshitsün chhisiya nouso khem, chaiou lakkeng naiuso tangkason apoisan nouso nokpao si Jehoiada nehau kiuwan, naiuso nung Amkham Tsam nai chiukau nouso naiuso amao chiusilak shanau kankeikü noiküla.

¹⁵Apa thatü sonankü pon 130 kihküta ean.

¹⁶Apaüh Israelhai khaiuniahoi thaiutha ko, Goa thaiutha ko, naiuso Amkham Tsam thaiutha ko ayathsüotsün chhisiya tsüpeanau ngüsoüh David Noknio nokpaohoi etam nai apa khanan.

¹⁷Lüko Jehoiada eanküta to, Yihu- dahai aheihoi nousoüh ngüso ngio angau Nokpao Joas mong shiolowan.

¹⁸Nungtiphe khaiuniahoi nou ngüso paosiposo Goa, APAOU Amkham Tsam nai amkham kiutsün laowan, naiuso sotsom nouso amkhamau naiuso menyiu Ashera sotsom amkhamau yalokü noiküla. Ngüsoüh nungso angei sunhetsün aphio nou APAOU ün amongmat Yihuda si Yirusalem khako kankü shin.

¹⁹APAOU nou ngüso lotsüo küta apa dongai laokü shiau e-po nouso hong, lüko khaiuniahoi nou nung anglu au tsümongchio.

²⁰Nungai Goa onthso nou meson Jehoiada thso Zekaria chiai saom. Apa khaiuniahoi nou epau lümeikün athang nai tsaküta jonkü ngiom, “APAOU Goa nou asamüh tiauta apa athoilut nouso angio tsüangkü meshen khako chija akuothe kankü shiloji ta sangji! Asamüh apa leaniu, nungtiphe apaüh asam leaniu!”

²¹Nokpao Joas e-po Zekaria thako akausai mongthat thattsün nai hakü noiküla, naiuso nokpao ngiokhem nou khaiuniahoi nousoüh Zekaria amkham Tsam pemong nouko lung nou yakatkü wan.

²²Nokpao nou Zekaria po Jehoiadaüh apa hau amonglam chhisiya chhikiutsün thaiutha pean, naiuso apaüh Zekaria loatkü wan. Zekaria eantsün taoko, apaüh vekü ngiom, “Ni ti chhiji nungtü APAOU nou lüthap küta ni hau angja lünoi!”

²³Tilai ah-uo tao shisaom nung ponko Siriahai süpaiüh Yihuda naiuso Yirusalem kom, aheihoi nouso chikü loatkü wan, küta jengtsaiu piakü yamlokü Damaska ai kankü khuwan.

²⁴Siriahai süpaihoi ehen tsak noiküla, lüko APAOU nou ngüso yam niakü ngüso khengai süpaihoi apia noitsün Yihudahai süpai shiohean-ikü noiküla tiautenai khaiuniahoi nou ngüso paosiposo APAOU Goa leankü noiküla. Nungli Nokpao Joas tü thamshikü noiküla.

²⁵Apa thatü thsüokü tawaikü noiküla naiuso tilai ehoi nousoüh laolowan, apa khemko noitsün asonghoi khaiunia nimeüh apa thako tsalokü meson Jehoiada thso loattsün phaosan apa then ko apa loatkü wan. Apa David Noknio nai lüko nokpao hai etam ai tsüdekü khanan.

²⁶(Apa thako khengshikü loattsün Amnon nyiuhai nian Shimeat thso Zabad, naiuso Moab nyiuhai nian Shimrit thso Jehozabad noiküla.)

²⁷Apa thsoso thaiutha, apa thako khapiam ngio chitetsünso thaiutha, naiuso Amkham Tsam titi lashankü noiküla nung thaiutha nokpaohoi ngiolat thsam nou kiutsün noin nungko satkü taium. Apa thso Amaziaüh apa nokpao noikham liloum.