Read Khiamniungan Naga 2 Ateng Chhi 25 Bible Online

2 Ateng Chhi 25 - Khiamniungan Naga bible

2 Ateng Chhi 25

¹Amazia achetpon kheikü pungo taoko apa nokpao tsalou, naiuso apaüh Yirusalem nai pon kheikü lükao nokshing shingkü noiküla. Apa nyiu Jehoadin nung Yirusalem ainou noiküla.

²Apaüh APAOU mongchiotsün ti noin nung chhin, lüko henyinyikü noiküla.

³Apa nokshing oukong nai shiküta thunkü apaüh apa po loattsün asonghoi nouso loatkü wan.

⁴Lüko apaüh ngüso thsoso to tsüloat, lüko APAOU nou Mosa Ngiokhem nai thoiluttaiutsün tü hoilut: “Posinyiuhai ngüso thsosoüh phiotsün koko tsüloate, naiuso thsoso ngüso posinyiusoüh phiotsün koko tsüloate; khaiunia tsak apa chija phiokü chhisantsün kokolu loatkü wane.”

⁵Nokpao Amaziaüh Yihuda nai Benjamin kauso khaiunia chikü ngüso kau lingkü hoihoi ta shanküta heng tsak khako naiuso tsom tsak khako aheiau asonghoi nouso taiukiu. Nung mongko khaiunia achetpon khei tsüdekünai nung khengai nouso chikü nai 300, 000 noiküla. Ehli au montsün, shisilai dun au montsün khaiuniahoi noi- küla.

⁶Nung chiai apaüh tangkason tsoi heng 3, 400 nou Israel ainou süpai hoi heng 100, 000 nou tuhkü noiküla.

⁷Lüko e-po tsak nokpao dongai khuküta apatü ngiom, “Israelhai süpaihoi niko lakhuha-i. Ajepekki goumchi nokshing ainou yakü nung khaiunia nousoko APAOU hakü tsünoi.

⁸Nito ngüso tsangkü ni ehli naikongkü iula-e ta yange, lüko ashiolotsün tsüdekünai ashiohean- itsün oukongkiutsün nung Goa nou noin, naiuso apaüh a-ehoiso hau ni shiolowan-i-e.”

⁹Nungai Amaziaüh e-po noutü sangkü ngiom, “Nungaito ngo ngüso thaiutha tangkason kiuwankü noitsün nung titi the-e?” E-po nou thalakü ngiom, “Nungtü simkü APAOU nou nihau kiuau shio- e!”

¹⁰Nungtiphe Amaziaüh alaiu lotaiutsün Israelhai süpaihoi laolokü ngüso tsamai honganshin. Nungko ngüso Yihuda khaiuniako thatü mongmatkü tsamai laokü khuwan.

¹¹Amazia oukongloshiküta apa süpaihoi nialokü Jem Tsamei nai khu. Nungko ngüso ehlikü Edomhai süpai heng che loat,

¹²naiuso amao heng che thaloum. Ngüsoüh nung sua nouso Sela noknio kingson nai nialokü sungküta ngüso thoi-ian, nungko ngüso lung akheiai noitsün tü phetkü ean.

¹³Nung taokolu Amaziaüh Israel süpaihoi apako ehli nai tsükhuha-i künsoüh Samaria si Bet Horon ne jetko noitsün Yihudahai noknio nouso komhean, ngüsoüh khaiu- niahoi heng süme loatküwan, naiuso jengtsaiu piakü kamhean.

¹⁴Tilai Amaziaüh Edomhai shiolokü laokü yashin, apaüh ngüso ün amkham sotsom nouso lokü yaküta nung niokü yataiu, küta nungso khako angannyamtsün laoshang jahkü nungsotü amkham kiukü noiküla.

¹⁵Nungüh APAOU mongmat-i, nungtiphe apaüh Amazia dongai e-po tsak hongshin. Nung e-po nou sangkü ngiom, “A oukong ainou ngüso meshen khaiunia kipsanau tsüshiokün gohmaohai goa nouso ni tiauta amkhamji?”

¹⁶“Titaoko aita,” samüh ni nokpao hau alotsüo kiuau shantaim ta Amaziaüh thashin. Samüh ni nokpao hau alotsüo kiuau shan süne? Ach- hitetsün alaolowan, tsüdekünaito ngo ni loatkü wan-e!” E-po nou achitetsün laolowan, lüko apaüh nung ngio mongiokün khako tsülao; “Goa nou ni lomowanau thatlo-iu ta lo ngo ngeji, tiautenai ni nungso apem chhianiu naiuso jü alotsüo tsülusankü wananiu.”

¹⁷Yihudahai Nokpao Amazia naiuso apahau ayamhantsünsoüh Israel thako khengshikü tsalo. Apaüh Jehu thsao Jehoahaz thso Israelhai Nokpao Jehoas dongai apatü ehli au taikü ngiongem tsak hongkü noiküla.

¹⁸Jehoiasüh Ama- zia dongai athashitsün ngio nung hongshin: “Atao tsakko Lebanon king ai noitsün tsaopai tsaküh Cedar pai tsak dongai ngiongem tsak hong, ‘Athso menyiuthso nou jüthso ko tsamsigoh yangau akiu.’ Nungai liu thainian tsak yankü khunai nung tsaopai nou ngamthiowan.

¹⁹Nungti lo Amazia ni Edomhai shiohe-iu ta ni bülomji, lüko ngo ni tü tsamai lünoi ta lotsüoji. Ni naiuso akhaiuniaso khakolu asapat kankü shiau ni angja tiauta lotsüoji?”

²⁰Lüko Amaziaüh nung ngiotü angluau tsümongchio. Amazia shio- lowan-iau nung Goa mongchiotsün tsak noiküla, tiautenai apaüh Edomhai sotsom nousotü amkhamkü noiküla.

²¹Nungtiphe Israelhai Nokpao Jehoasüh Yihudahai Nokpao Amazia thako ehli au khu. Ngüso Yihuda nai Bet Shemes ko phete,

²²nungko Yihudahai süpai shio- lowan, naiuso süpaihoi nouso ngüso tsamai khupengan.

²³Jehoasüh Amazia aa thaloküta apa Yirusalem nai kankü khu. Nungko apaüh meter tsom nime thatso Efraim Bekhan ainou Aniokun Bekhan saokü nouko nou noknio pe lothekü wan.

²⁴Apaüh Amkham Tsam nai taiutsün chaiou lakkeng naiuso tangkason apem amkham jengtsaiu nouso naiuso nokpao tsam ainou jengtsaiu nouso apem Obed Edom thsaosithsosoüh ehükü Samaria ai laokü kankü khuwan. Apaüh loüh sua khaiunia nouso apako kankü khuwan.

²⁵Yihudahai Nokpao Amazia nung Israelhai Nokpao Jehoas eanphiai aakihllaiu pon chekü pungo kihshi.

²⁶Amaziaüh chongting ainou apa nokshing athon saokü amao chhisiya chhikü shitsün nung Yihudahai si Israelhai Nokpao nouso Ngiolat Thsam nai satkü taim.

²⁷Apaüh APAOU thako khengshitsün atao ai yanou Yirusalem nai apa thako khengshitsün noiküla. Aphiting nai apa Lakis noknio nai khuthio. Lüko apa ehoisoüh nungai apatü thaiukü shikü apa loatkü wan.

²⁸Apa mea mokthso tsak chiai Yirusalemai kanlükhun, küta apa David Noknio nokpaohoi etam nai khanan.