Read Khiamniungan Naga 2 Ateng Chhi 28 Bible Online

2 Ateng Chhi 28 - Khiamniungan Naga bible

2 Ateng Chhi 28

¹Ahaz nokpao achetpon kheikü nime noi taoko tsalo, naiuso apaüh Yirusalem nai pon chekü luok nokshing shing. Apaüh apa paosipo Nokpao David athat amei yam nou tü tsühoilut; nungliko, apaüh APAOU khako ti tsümei nung chhisiya

²küta Israelhai nokpaohoi saiphi hoilutkü noiküla. Apaüh Baal sotsom son nou shankü taiuküla,

³Hinnom Tsamei nai angannyamtsün jahkiu, naiuso APAOU nou Israel hai süme tsalotsün taoko khaiunia sauhai ngüso khako komankiukü noiküla nungso ün achinyan chhisiya kheklotsün nai apaüh meshen thsoting nouso lüko sotsom nouso hau ajahtsün chaithio kium.

⁴King nouso chiai, paisilung amkhamthang nouso ko, naiuso paikhem pungkü nai Ahazüh aloat chaithio naiuso ajahtsün chaithio nouso kium.

⁵Nokpao Ahaz angei chhisiya shioko APAOU apa Goaüh apa Siriahai nokpao hau shiolowan-i küta Yihudahai Damaska ai sua khaiunia hau haove piakü kankü khuwan. APAOU nou loüh Remalia thso Israelhai nokpao Peka hau Ahaz shiolowan-i küta ajekhaiu tsakkolu Yihuda hai süpai akongting nouso heng 120, 000 loatan-i. APAOU, ngüso paosiposo Goa nou nung chhisiya thawao-iau ayam sopkiu, tiautenai Yihuda khaiunia nousoüh apa leankü noiküla.

⁷Israelhai süpai tsak nian Zikriüh Nokpao Ahaz thso nou Moseia, nokpao tsamtü paotsangtsün Azrikam naiuso nokpao tü thanting nou ahei Elkana nungso loatkü wan.

⁸Yihudahai nung ngüso goumchi dei- sinio noilüko, Israelhai süpaihoiüh ngüso methso menyiu heng 200, 000, naiuso sua khaiunia au jengtsaiu piakü yamlowantsün ko aikü Samaria ai laokü kankü khuwan.

⁹APAOU ün e-po, khaiunia tsak nian nou Oded, nung Samaria noknio nai kihkü noiküla, apaüh Yihudahai sua khaiuniahoi niakü laokü yatsün Israelhai süpaihoi noknio mongai napau taoko pheteküta ngiom, “Asam paosiposo Goa APAOU nou Yihuda haiko mongmatkü noiküla, küta asam hau ngüso shiolowan-i, lüko lo asamüh ngüso chaoattsün nou asam akausai lulakü noin.

¹⁰Naiuso lo asamüh Yirusalem si Yihudahai methso menyiu asam sua au theau ayang noin. Asamüh lüko APAOU asam Goa thako angei sunlo ta asamüh tsünge süne?

¹¹Ngütü a-anglu! Nung sua khaiunia nouso asam deisinioso naiuso nuosinioso noin. Ngüso lükhuwan-i, tsüdekünaito APAOU amongmat nai apaüh asam hau angja kiu-e.”

¹²Ajepekki nokshing nai nou ahei khaiunia püle: Jehohanan thso Azaria, Meshilemot thso Berekia, Shallum thso Jehozkia, naiuso Hadlai thso Amasa soüh lüko nung süpaihoi chhisiya tü khengshikü noiküla.

¹³Ngüsoüh ngiom, “Nung sua khaiunia nouso nungko lania- jikan! Samüh APAOU thako angei chhianiu naiuso apa mongmatkü sam angja kiuau maianiu. Lo asamüh tso chhisiya au mongchioji nungüh sam aphiolu lopiashi-e.”

¹⁴Nungtiphe süpaihoi nou sua khaiunia nouso naiuso ngüsoüh kamhetsün jengtsaiu nouso khaiuniahoi si ahei nouso chiai lelut,

¹⁵naiuso khaiunia püle nouso kamlokü shitsün neshe ainou losanküta sua khaiunia nouso hau neshe kiuau taiukium. Ngüsoüh sua khaiunia nouso hau neshe, hok- khut, eheshiu saiukü, kiuküta ngüso atawaitsün müo nai tsomkiuau olip- khiam lolutkiu. Akei au tsüshiokün thatü tsaosilaohoi nouso gado chiai taiu, naiuso Yihudahai goh Yeriko sübao tü chengsha noknio ta jonji nungai laokü kankü khushiküta Israelhai Samaria nai laokü khuwan.

¹⁶Edomhaiüh loüh Yihuda yanheanau tsalokü sua khaiunia au piakü thalokü khuwan, nungtiphe Nokpao Ahazüh Asiriahai nokpao Tiglat Pileser tü ahachu hongau sangkü noiküla.

¹⁸Nungtaoko nailu Filistiahaiüh ajenap kinghok nai noitsün naiuso ajepekki Yihuda nai noksong nouso yampekkü noiküla. Ngüsoüh Bet-Shemes noknio, Aijalon noknio, naiuso Gederot noknio, naiuso Sokohai noknio nouso Timna, naiuso Gederot noknio, naiuso Gimzo ko nok nouso hakü, thalowan küta nungko asaita hau nialowankü noi- küla.

¹⁹Yihudahai Nokpao Ahazüh apa khaiuniaso hokngam phiowan-i naiuso APAOU lochilotsaokü kankei- tsün shioko APAOU nou Yihuda khako angja nouso kankü shin.

²⁰Asiriahai nokpao nou, Ahaz hau ahachu kiutsün liko apatü khengshi naiuso apa angja-ikü noiküla.

²¹Nungtiphe Ahazüh Amkham Tsam ainou, nok- pao tsam ainou, naiuso khaiuniahoi ahei nouso tsam ainou chaiou lakkeng nou loküta nung nokpao hau kiuwan, lüko nungüh ti chhisanau tsüshiokü noiküla.

²²Tilai apa angja nouso tekkü tsü- meitingkü iulawan, nung khaiunia Ahazüh APAOU thako loüh tekkü angei chhishin.

²³Apa shiolowantsün Siriahai goa hau apaüh aloat chaithio nouso kiukü ngiom, “Siriahai goa nousoüh Siriahai nokpaohoi nouso tü hachukü shin, nungtiphe nungaito ngo lüko ngüso hau aloat chaithio kiunaito, ngüsoüh ngü lüko hachu-e.” Nung tsangkü apa khako naiuso goumchi nou khako akuothe nou kankü shin.

²⁴Nungko hakü, apaüh amkham tsam jengtsaiu nouso lo- küta nung nelangkü lopaikü lothean. Apaüh Amkham Tsam nou kiapan- küta Yirusalem athang alumei amthang nouso yachukü shan.

²⁵Yihuda noknio naiuso noksong pungkü nai, apaüh paisilung am- thang nouso shan, nungko gohmao goa nouso hau angannyamtsün jah au noiküla. Nungli, apa paosiposo Goa, APAOU amongmat apa chija meshen khako kankü shilokü noiküla.

²⁶Chongting ainou athon saokü apa nokshing chhisiya nouso naiuso amao chhisiya nouso chikü, Yihuda si Israel Nokpaohoi Ngiolat Thsam nai satkü taium.

²⁷Nokpao Ahaz ean naiuso apa Yirusalem nai khanan, lüko nokpaohoi etam nai tsüde. Apa thso Hezekiaüh apa nokpao lilokü noiküla.