Read Khiamniungan Naga 2 Ateng Chhi 29 Bible Online

2 Ateng Chhi 29 - Khiamniungan Naga bible

2 Ateng Chhi 29

¹Hezekia Yihudahai nokpao au achetpon kheikü pungo nai tsalo, naiuso apaüh Yirusalem nai pon kheikü lükao nokshingkü noiküla. Apa nyiu Zekaria thso menyiuthso nou Abija noiküla.

²Apa paosipo Nokpao David tü thatlokü, apaüh APAOU khako atha nou chhisiyakü noiküla.

³Hezekia nokpao tsalotsün pon chongting alei nouko nai, apaüh Amkham Tsam bekhan nouso ayan ta sopshiküta nungso ayan ta shan- shikü noiküla.

⁴Apaüh mesonhoi tsak naiuso Levihoi Amkham Tsam ajepek khengtaiu nai kamshi-in

⁵küta apa ngüsoko chitekü ngiom, “Asam Levihoi nouso asamüh asam chija losioloküta asam paosiposo Goa APAOU Amkham Tsam losioshiau noin. Alochinyantsün alum Amkham Tsam ainou ayanan.

⁶Sam paosiposo sam Goa APAOU ko tsüsaithakü noiküla naiuso apaüh ti tsümongchio nung chhisiyakü shin. Ngüsoüh apa leankü phoklekü khuwan.

⁷Ngüsoüh Amkham Tsam kuo nouso kiapan, tson nouso nyatlushian-i, naiuso angannyamtsün jahkiuau phiowan, tsüdekünai Israelhai Goa hau Amkham Tsam nai ajahtsün chaithio nouso tsükiushikü laowan.

⁸Nung shioko APAOU nou Yihuda si Yiru- salem tü mongmatkü shin, naiuso apaüh ngüsotü ti chhin nungüh khaiunia pungkü lekkat naiuso hatatkü shin. Asamüh nung thatü meikü ngekü noin.

⁹Sam poso ehlithang nai loatkü wan, naiuso sam tsammongnyiuso si thsoso sua khaiunia au kankü khuwan.

¹⁰“Ngo lo Israelhai Goa, APAOU nouko athalou-e tsak shanau thalou-iu, nungaito apa samko mongmattsün tsünoishi-e.

¹¹Jüthsoso, asapat nai atao lawan. APAOU nou apa hau angan nyamtsün jahkiu-iau chosankü taiutsün asam noin naiuso apa amkhamtsün nai khaiuniahoi nialutau asam noin.”

¹²Nungko Levihai nungso noiküla: Kohat kau ainou, Amasai thso Mahat naiuso Azaria thso Yoel. Merari kau ainou, Abdi thso Kis naiuso Jehollelel thso Azaria. Gershon kau ainou, Zimna thso Joa naiuso Joa thso Eden. Elizafan kau ainou, Shimri si Jeuel Asaf kau ainou: Zekaria naiuso Mattania. Asaf kau ainou, Zekaria naiuso Matania. Heman kau ainoi, Jehuel naiuso Shimei. Jeduthun kau ainou, Shemaia naiuso Uzziel.

¹⁵Nung khaiunia nousoüh ngüso Levihoi paiusihaiso kamsan, naiuso ngüso apemüh ngüso chija amkham yamko losiolokü noiküla. Nungai nokpao nou ngüsotü chhisiya au thoilut, nungai APAOU Ngiokhem tsangkü, ngüsoüh Amkham Tsam nou amkham yamko siokü shanau tsaloum.

¹⁶Meson nouso nung losioau Amkham Tsamai nap, naiuso APAOU Tsamai ngüsoüh amkham yamko tsüsiokü eptsün alum APAOU Tsam pemong ainou kengchiai kankü shin. Nungko nou apem Levihoi nou loküta noknio pechiai Kidron tsamei ai kankü khu.

¹⁷Nung chhisiya chongting alei nouko chongting ajekhaiu nouko tsaloum, naiuso ajekhaiu petjeinyi nouko Amkham Tsamai naptsünko chongting tsampai nou hakü ngüsoüh nung chhisiya apem khem. Nungthanko ngüsoüh amkham au thaiutha Amkham Tsam khemloau alei nouko ajekhaiu chekü luok saokü, ajekhaiu petjeinyi chhisiyakü noiküla.

¹⁸Nungai Levihoi nou Nokpao Hezekia dongai ngiongem kankü shikü ngiom, “Samüh jahkü chaithio kiutsün amthang thaiutha asio themtsai taiuau thaiutha puo, naiuso nungso jengtsaiu chikü hakü, Am- kham Tsam athum nou don yamko losiotsün chhisiya khemlo.

¹⁹Nokpao Ahaz APAOU ko mong tsükiukü noitsün pon nousoko nai apaüh kankü khuwantsün jengtsaiu nouso lüko apem samüh kankü shi-iu, küta samüh nung loüh losiowaniu. Nungso chikü APAOU ün amthang khako noin.”

²⁰Atao tsüwankü Nokpao Hezekiaüh noknio nai noitsün ahei khaiuniahoi kamshi-iküta ngüso kamlokü Amkham Tsamai khu.

²¹Nokpao tsammongso angei Yihu- dahai khaiunia thaiutha ko naiuso Amkham Tsam losioau angeiwan chaithio tsakli, ngüsoüh jangtsopong chinyat, onnemok chinyat, onnemok- tso chinyat, naiuso wontso chinyat ta kankü khu. Nokpao nou Aron thsaosithsoso sauhai meson nouso noin ngüsotü nung thainian nouso amthang nai aloat chaithio lükiu ta ngiom.

²²Meson nousoüh chongting nai jangtsopong nouso, nungthanko onnemok, nungthanko onnemoktso nouso loatküta ashe nou amthang nai chaithio pungkü ta satlut.

²³Aphi- tengnai, ngüsoüh won nouso nokpao naiuso amao amkham kiutsün nai noinso dongai kankü shin küta ngüsoüh ngüso pha nungso chiai thanglut.

²⁴Nungai meson nousoüh khaiunia chikü ün angei kankü khuwanau won nouso loatküta nungso she aloat chaithio tsakli amthang nou tü tsalut, tititenai Israel hai khaiunia chikü thaiutha ajah chaithio naiuso angei chaithio nouso kiuau Nokpao nou thoilutkü noiküla.

²⁵Nokpao nou nokpao ün e-po, Gad tsangkü Nokpao David hau APAOU nou kiutsün ayamhan nousotü hoilut, naiuso e-po Nathan tsangkü apaüh Levi hoi poipoi naiuso la,

²⁶sübao pe nai Nokpao Davidüh kankeitsün jengtsaiu nouso khekkü hakü Amkham Tsam nai taiukiu. Nungko meson nouso lüko jangong nouso semkü tsakü noiküla.

²⁷He- zekiaüh ajahtsün chaithio kiuau ngiokhem kium; chaithio tsaloküta khaiuniahoi nou APAOU hau nian- lomkiu jih hang, naiuso jihanghoi nousoüh jangong matau naiuso amao jengtsaiu chikü tsangkü lomsanau tsalo.

²⁸Khaiunia sauhai nungko noi- küla ngüso pungkü amkham kiuau tsalo naiuso jihangtsünso amao jih lomsantsün nou aloat chaithio chikü mochitekhemkün lektso tsülaokü hangkü noiküla.

²⁹Nungai Nokpao Hezikia naiuso khaiunia chikü singkaongam nou kauthio küta Goa hau amkham kium.

³⁰Mele nai nokpao naiuso ahei nousoüh Levihoi tü nianlom jih nouso hangau thoilutkü noiküla. Nungti khaiunia pungkü nou ngüso kauthiokü amongling asong nou ji hangkü Goa amkhamkü noiküla.

³¹Hezekiaüh khaiuniahoi nousotü ngiom, “Lo asam donyam nouko losiokü noin, nungtiphe APAOU hau nianlomkiu naiuso aloat chaithio nouso kankü ashi.” Ngüsoüh angio- tsün angkü ajantsoüh to meshen mongchio nou aloat chaithio kiuau thainian nouso ajahtsün chaithioli kankü shin.

³²Ngüsoüh jangtsopong aochinyat, onnemok tsom tsak, naiuso onnemoktso tsom nime APAOU hau ajah chaithio kiuau kankü shin,

³³loüh khaiuniahoi nou heau thaiutha aloat chaithio jangtsopong tsom luok naiuso onnemok heng süme kankü shin.

³⁴Nung thainian nouso loatau nungko mesonhoi nou tsüsaiuphe, nung chhisiya mokhem- kün lektso Levihoi nou ngüsotü hachukü noiküla. Nung taoko nai meson nousoüh momo chija don yamko losiolokhem. (Meson nousoko naito don yamko siolokü noitsün Le- vihoi nouso mongkiutsokü noiküla.)

³⁵Apem jahkü chaithio kiutsünko hakü khaiuniahoi nou hetsün chai- thio ainou iiu jahau thaiutha meson nouso thsale noiküla, naiuso nungko hakü ajahtsün chaithio nousoko aikü kiuhatsün theng thsalutau thaiutha noiküla. Nungti Amkham Tsam nai amkham kiutsün tsaloshikü khu.

³⁶Nokpao Hezekia naiuso khaiuniahoi nouso monglengkü noiküla, tiautenai Goa nou ngüsotü nung chikü chhisiya nouso liukü chhikhemau hachukü noiküla.